UMARKOSI 12 - IsiNdebele 2012 Translation

Umfanekiso ngabaqatjhi besidiribe

¹ UJesu wathoma ukukhuluma nabo ngemifanekiso wathi: “Indoda yatjala isidiribe, yasibiyela ngomthangala. Yemba umgodi wobutlhodlhelo bewayini, yakha isithala sabalindi. Yaqatjhisela abalimi isidiribeso, yathatha ikhambo.

² Ngesikhathi sokuvuna, yathumela ikhoboka ebaqatjhini bona liyokuthatha isabelo sayo.

³ Kodwana balibamba ikhobokelo, balidula, balibuyisela emuva limkhonoze.

⁴ Yeke yathumela elinye ikhoboka, balikhubaza ehloko, baliphatha ngehlazo.

⁵ Godu yathumela elinye, nalo balibulala. Yakanye yathumela amanye amanengi, amanye wawo bawadula, amanye bawabulala.

⁶ Besele isele ngoyedwa ebeyingamthumela. Loyo-ke bekuyindodanayo ethandekako. Ekugcineni yayithumela yathi: ‘Nakuyindodanami, bazayihlonipha.’

⁷ Kodwana abaqatjhabo bakhulumisana bodwa bathi: ‘Le yindlalifa. Asiyibulaleni, khona ilifa lizakuba ngelethu.’

⁸ Yeke bayibamba bayibulala bebayiphosela ngaphandle kwesidiribe.”

⁹ UJesu wababuza wathi: “Uzakwenza njani umninisidiribe na? Ngithi uzakuza afese abulale boke abaqatjhi labo, aqatjhisele abanye isidiribeso.

¹⁰ Akhange khenifunde umtlolo lo na? “ ‘Ilitje eladelwa babakhi libe ngeliqakathekileko ejikeni.

¹¹ Lokho kuzizenzo zakaSomnini; kusimangaliso emehlwenethu.’ ”

¹² Nje-ke bafuna indlela yokumbamba ngombana bebazi bonyana ukhulume umfanekiso lo ngabo. Kodwana bebesaba isiqubuthu, yeke bamsukela bakhamba.

Umbuzo ngomthelo wombusi

¹³ Ngemva kwesikhatjhana bathumela abanye babaFarisi nabantu bakaHerode kuJesu kobana bambambe ngamezwakhe.

¹⁴ Bafika kuye bathi: “Mfundisi, siyazi bona uyindoda eqotho. Awuthatheki ngomuntu ngombana awukhethi ubuso, kodwana ufundisa indlela kaZimu ngeqiniso. Kulungile ukukhokha umthelo kumbusi omkhulu namkha njani na?”

¹⁵ Kodwana uJesu wakulemuka ukuzenzisa kwabo, wabaphendula wathi: “Ningilingelani na? Lethanapha udenariyu loyo ngimbone.”

¹⁶ Bamnikela isipaparwana, wathi kibo: “Mfanekiso kabani lo? Kutlolwe bani lapha?” Bamphendula bathi: “Ngewombusi omkhulu.”

¹⁷ UJesu wathi kibo: “Arha-ke, nikelani umbusi omkhulu okungekwakhe, ninikele noZimu okungekwakaZimu.” Bamrarekela.

Umbuzo ngokuvuka kwabafileko

¹⁸ Yeke abaSadusi ebebathi akukho ukuvuka kwabafileko, beza kuJesu ngemibuzo

¹⁹ bathi: “Mfundisi, uMosi wasitlolela bona lokha indoda nayihlongakalako itjhiye umkayo khisibe abanabantwana, umfowabo lendoda leyo kufanele athathe umhlolokazi loyo abelethele umnakwabo abantwana.

²⁰ Bekukhona abafo abalikhomba. Izibulo lathatha umfazi, lahlongakala linganamntwana.

²¹ Umhlolokazi wathathwa ngewesibili. Naye godu wahlongakala anganamntwana. Newesithathu naye kwaba ngisweso.

²² Boke abalikhomba bahlongakala banganabantwana. Ekugcineni kwahlongakala umhlolokazi loyo.

²³ Alo, ngelanga lokuvuka kwabafileko uzakuba mkabani njengombana bekamfazi wabo bolikhomba njalo na?”

²⁴ UJesu waphendula wathi: “Anitjhaphi na? Kuyabonakala bona aniyazi imitlolo namandla kaZimu!

²⁵ Mhlana abafileko bavuka ekufeni, abazokuthatha namkha bende. Bazokufana neengilozi ezulwini.

²⁶ Mayelana nokuvuka kwabafileko, akhange khenifunde encwadini kaMosi ngomlando womuthi ositjhutha kobana uZimu wathi kuye: ‘NginguZimu ka-Abrahamu, uZimu ka-Isaka noZimu kaJakopo.’

²⁷ Akasuye uZimu wabafileko, kodwana wabaphilako. Nitjhaphe kwamambala!”

Umyalo omkhulu

²⁸ Omunye wabafundisi bomthetho wezwa ipikiswano le. Walemuka bona uJesu ubaphendule kuhle, wambuza wathi: “Ngimuphi umyalo ongomkhulu ukwedlula yoke na?”

²⁹ UJesu wamphendula wathi: “Omkhulu uthi, ‘Yizwa wena Israyeli! USomnini nguZimethu, nguye yedwa uSomnini.

³⁰ Kufanele uthande uSomnini uZimakho ngehliziywakho yoke, ngomphefumulwakho woke, ngomkhumbulwakho woke nangamandlakho woke.’

³¹ Wesibili ngilo, ‘Thanda umakhelwanakho njengombana uzithanda wena.’ Awukho omunye umyalo omkhulu ukwedlula le.”

³² Umfundisi womthetho wathi kuye: “Iye, mfundisi, uqinisile nawuthi uZimu munye, akakho omunye ngaphandle kwakhe.

³³ Ukumthanda ngehliziyo yoke, ngomkhumbulo woke nangamandla woke nokuthanda umakhelwana njengombana sizithanda thina, kuqakatheke khulu ukwedlula yoke imihlabelo yokutjhiswa neminikelo.”

³⁴ Kwathi bona uJesu abone bonyana uphendule ngokuhlakanipha, wathi kuye: “Awusikude nombuso kaZimu.” Emva kwalokho akakho noyedwa owakhe wagabaza wambuza imibuzo.

Umbuzo ngoKrestu

³⁵ Kwathi uJesu asafundisa ngesirhodlweni sethempeli, wabuza wathi: “Batjho njani abafundisi bomthetho bona uKrestu yiNdodana kaDavida na?

³⁶ UDavida ngokwakhe nakhuluma ngokurholwa nguMoya oCwengileko wathi, “ ‘USomnini wathi eKosinami: Hlala ngesidleni sami bekube kulokha nangenza izitha zakho zibe sinabelo seenyawo zakho.’ ”

³⁷ “UDavida ngokwakhe umbiza ngokuthi, ‘Kosi.’ Alo-ke uKrestu angaba njani yindodanakhe na?” Isiqubuthu samuzwisisa kuhle uJesu.

UJesu ulemukisa abantu ngabafundisi bomthetho

³⁸ Ekufundiseni kwakhe wathi: “Lemukani abafundisi bomthetho, abathanda ukuzakalala ngeemphuraphura ezide, bathanda ukulotjhiswa eendaweni zokuthengisela.

³⁹ Bathanda iinhlalo eziphambili ngemasinagogini, neendawo ezihlonitjhwako eminyanyeni.

⁴⁰ Barhiribidela iinkumba zabahlolokazi, babukisa ngokwenza imithandazo emide. Abantu abanjalo bazokuhlunguphazwa kabuhlungu.”

Umnikelo womhlolokazi

⁴¹ UJesu wahlala phasi malungana nesilulu somnikelo, wabukela isiqubuthu siphosela imalaso ngesilulwini sethempeli. Iinjinga ezinengi zaphosela imali enengi.

⁴² Khonapho kweza umhlolokazi ochakileko, waphosela iimpaparwana ezimbili ezincani zekoporo ebezilingana nendibilitjhi.

⁴³ UJesu wabizela abafundi bakhe ndawonye, wathi kibo: “Ngiqinisile ngiyanitjela bona umhlolokazi okhwahlileko lo uphosele enengi ngesilulwini kunabo boke.

⁴⁴ Boke banikele ngokudzubhula emnothwenabo, kodwana yena ukghuthulele koke anakho okumele aphile ngakho.”