UMARKOSI 11 - IsiNdebele 2012 Translation

UJesu ungena eJerusalema ngedumo

¹ Kwathi nabatjhidela eJerusalema, bafika eBhethifage neBhethaniya, entabeni ye-Oliva, uJesu wathumela babili babafundi bakhe phambi kwakhe,

² wathi kibo: “Khambani niye emzini ophambi kwenu, nizakuthi naningenako, nifumane udumbanyana ongazange akhwelwe, abotjhwe lapho. Mtjhaphululeni nimlethe lapha.

³ Nakukhona onibuzako athi, ‘Nikwenzelani lokhu?’ nimtjele nithi, ‘IKosi iyamdinga, izambuyisa msinyana.’ ”

⁴ Bakhamba-ke, bamfumana udumbanyana ngaphandle endledlaneni abotjhiwe hlanu komnyango. Kwathi nabasamtjhaphululako,

⁵ abantu ebebajame lapho babuza bathi: “Nenzani, nitjhaphulula udumbana lo na?”

⁶ Babaphendula ngendlela uJesu abayala ngakhona, abantwabo babalisa bakhamba.

⁷ Baletha udumbanyana kuJesu, babeka izambatho zabo phezu kwakhe, wakhwela.

⁸ Abantu abanengi baqhisa izambatho zabo endleleni, abanye baqhisa phambi kwakhe amahlahla abawephule emasimini.

⁹ Labo ebebakhamba phambili nalabo ebebamlandela barhuwelela bathi: “Hosana! Ubusisiwe loyo oza ngebizo lakaSomnini!

¹⁰ Ubusisiwe umbuso ozako kababethu uDavida! Hosana kweliphezulu!”

¹¹ UJesu wangena eJerusalema, waya ngethempelini. Waqala koke ebekungapho kodwana njengombana besele kuhlwile, waphuma waya eBhethaniya nabalitjhumi nambili.

UJesu unikelela umuthi wamakhiwani

¹² Ngelanga elilandelako, nabasuka eBhethaniya, uJesu bekaphethwe yindlala.

¹³ Kudanyana naye wabona umuthi wamakhiwani onamakari. Wayokuqala bona uthelile na. Nafika kiwo akhange afumane ilitho, ngaphandle kwamakari wodwa ngombana bekungasiso isikhathi samakhiwani.

¹⁴ Yeke wathi kiwo: “Akungasabi nomuntu ozakugoma iinthelo kuwe godu!” Abafundi bakhe bamizwa asitjho lokho.

UJesu uqotjha abathengisi ngethempelini

¹⁵ Ekufikeni kwabo eJerusalema, uJesu wangena ngethempelini, wathoma waqotjha labo ebebathengisa nebebathenga lapho. Wagubuda iintafula zalabo ebebananiselana ngemali, neenhlalo zalabo ebebathengisa amazuba.

¹⁶ Azange avumele nanyana ngubani bona avundle nepahla ethengiswako ngesirhodlweni sethempeli.

¹⁷ Wabafundisa wathi kibo: “Angithi kutloliwe kwathiwa, ‘Indlwami izakubizwa bona yindlu yokuthandaza yezizwe zoke.’? Kodwana nina niyenze irharha labahlanguli.”

¹⁸ Abaphristi abakhulu nabafundisi bomthetho bakuzwa lokho bafuna amaqhinga wokumbulala; bamesaba ngombana boke abantu barareka ngeemfundiso zakhe.

¹⁹ Kuthe nakurhwaqelako, baphuma ngedorobheni.

Umuthi wamakhiwani otjhwabileko

²⁰ Ekuseni nabadlulako godu, babona umuthi wamakhiwani utjhwabe ukusukela emirajinawo.

²¹ UPitrosi wakhumbula wathi kuJesu: “Rabi, qala! Umuthi owunikeleleko loya utjhwabile.”

²² UJesu wamphendula wathi: “Kholwani kuZimu.

²³ Ngiqinisile ngiyanitjela bona loyo othi entabeni le, ‘Khamba uyoziphosela ngelwandle’, angazazi ehliziywenakhe, kodwana akholwe bona lokho akutjhoko kuzakwenzeka, ngambala uzakwenzelwa khona.

²⁴ Ngalokho ngiyanitjela bona nanyana yini eniyikhombela ngomthandazo, kholwani bona seniyifumene, ngambala izakuba ngeyenu.

²⁵ Njalo lokha nanijamako nithandaza, libalelani nanyana ngubani eninamavundo naye ukuze noYihlo osezulwini anilibalele izono zenu.

²⁶ Kodwana naningalibaleliko, noYihlo osezulwini angekhe anilibalele izono zenu.”

Umbuzo ngamandla kaJesu

²⁷ Godu bafika eJerusalema, bekwathi uJesu asakhamba ngesirhodlweni sethempeli, abaphristi abakhulu nabafundisi bomthetho kanye nabaphathi beza kuye,

²⁸ bambuza bathi: “Uzenza ngamandla kabani izintwezi na? Njekhona ngubani okunikele igunya lokwenza lokhu na?”

²⁹ UJesu waphendula wathi: “Ngizanibuza umbuzo owodwa. Ngiphendulani, nami ngizanitjela bona ngizenza ngawaphi amandla izintwezi.

³⁰ Umbhabhadiso kaJwanisi bewuvela ezulwini namkha ebantwini na? Ngiphendulani!”

³¹ Bakhulumisana bodwa bese bathi: “Nasingathi, ‘Ezulwini,’ uzakuthi, ‘Alo-ke yini beningamkholwa na?’

³² Alo, kghani sithi, ‘Ebantwini’ ”? Gade besaba abantu ngombana boke bebasithi uJwanisi mphorofidi wamambala.

³³ Yeke baphendula uJesu bathi: “Awa, asazi.” UJesu wathi kibo: “Arha-ke, nami angizonitjela-ke bona ngiwathathaphi amandla engenza ngawo izintwezi.”