UMARKOSI 10 - IsiNdebele 2012 Translation

Isifundo ngokutlhalana

¹ UJesu wasuka lapho waya esifundeni seJudiya nangaphetjheya kweJordani. Godu iinqubuthu zambungelela, wazifundisa njengemhleni.

² AbaFarisi abathileko beza kuye, bamlinga bathi: “Kumthetho bona indoda itlhale umkayo na?”

³ Yena wabaphendula wathi: “UMosi waniyala wathini na?”

⁴ Bamphendula bathi: “UMosi wayivumela indoda bona itlole incwadi yesahlukaniso, imthokoze-ke.”

⁵ Godu uJesu wathi kibo: “UMosi wanitlolela umthetho lowo ngebanga leenhliziyokazi zenu ezilikhuni.

⁶ Kodwana ekuthomeni kwendalo uZimu wababumba, kwaba ngomduna nomsikazi.

⁷ Umtlolo uthi, ‘Indoda izakutjhiya uyise nonina inamathele emfazinayo

⁸ bese baba nyamanye.’ Nje-ke abasesebabili, sele bamunye.

⁹ Yeke lokho okuhlanganiswe nguZimu akungabi nomuntu ozakwahlukanisa.”

¹⁰ Kwathi nasele bangekumbeni abafundi bambuza godu ngendaba le.

¹¹ Wathi kibo: “Loyo otlhala umkakhe athathe omunye, uhlobongile kumkakhe.

¹² Godu nakube umfazi utlhala indodakhe, athathwe ngenye, uhlobongile.”

UJesu ubusisa abantwana

¹³ Abantu bebaletha abantwana kuJesu bona abasingathe, kodwana abafundi bakhe babakhalimela.

¹⁴ UJesu nakabona lokho, wasilingeka wathi kibo: “Vumelani abantwana beze kimi, ningabakhandeli ngombana umbuso kaZimu ungowabanjengalaba.

¹⁵ Ngiqinisile ngiyanitjela bona nanyana ngubani ongamukeli umbuso kaZimu njengomntwana, ngeze angena kiwo.”

¹⁶ Nje-ke wathatha abantwana wabasingatha, wabeka izandla phezu kwabo wababusisa.

Umuntu osigwili

¹⁷ Kuthe uJesu asathoma ikhambo lakhe, indoda yamgijimela yafese yawa eenyaweni zakhe yambuza yathi: “Mfundisi olungileko, ngingenza njani bona ngizuze ipilo engapheliko na?”

¹⁸ UJesu wathi: “Ungibizelani bona ngilungile na? Akakho noyedwa olungileko, ngaphandle koZimu yedwa tere.

¹⁹ Uyayazi imiyalo ethi, ‘Ungabulali, ungahlobongi, ungebi, ungafakazi amanga, ungagalaji, hlonipha uyihlo nonyoko.’ ”

²⁰ Yathi kuye: “Mfundisi, ngikulonde koke lokho kwebutjheni bami.”

²¹ UJesu wayiqala, wayithanda wathi kiyo: “Yinye kwaphela into otlhayela ngayo: Khamba, uthengise koke onakho unikele abadududu, uzakuba nomnotho ezulwini. Ngemva kwalapho-ke ungilandele.”

²² Kwathi lokha nayizwa lokho, ubuso bayo bakhena. Yakhamba idanile ngombana beyinomnotho omnengi.

²³ UJesu wathalaza wathi ebafundini bakhe: “Maye kubudisi kanganani kilabo abanomnotho kobana bangene embusweni kaZimu!”

²⁴ Abafundi bakhe barareka ngamezwakhe la. UJesu wathi kibo godu: “Bantwana, kubudisi ukungena embusweni kaZimu!

²⁵ Kulula ukuziluma indololwani kunobana isigwili singene embusweni kaZimu.”

²⁶ Abafundi barareka khulu, bathi omunye komunye: “Alo, nakunjalo ngubani ongasindiswa na?”

²⁷ UJesu wabaqala wathi: “Emuntwini lokhu kuyinto engekhe yenzeka, kodwana ingasi kuZimu. Koke kuyenzeka kuZimu.”

²⁸ UPitrosi wathi kuye: “Qala, sitjhiye koke kobana sikulandele.”

²⁹ UJesu wathi: “Ngiqinisile ngiyanitjela bona akakho noyedwa otjhiye umuzi, abafo, abodade, umma, ubaba, abantwana namasimu ngebanga lami nevangeli,

³⁰ ongekhe amukela ikhulu elibuyelelwe ngekhulu esikhathinesi, imizi, abafo, abodade, abomma, abantwana namasimu kanye nokuzunywa nesikhathini esizako kanye nepilo engapheliko.

³¹ Kodwana abanengi abangebokuthoma bazokuba ngebokugcina, kuthi bokugcina babe ngebokuthoma.”

UJesu ukhuluma kwesithathu ngokufa kwakhe

³² Bebasendleleni basiya eJerusalema, uJesu akhamba phambili. Abafundi bakhe bebamangale, nalabo ebebabalandela bebesaba. Godu wadosela abalitjhumi nambili ngeqadi, wabatjela bona kuzokwenzekani kuye.

³³ Wathi: “Qalani! Siyakhamba siya eJerusalema. INdodana yoMuntu izakukhatjhelwa ebaphristini abakhulu nebafundisini bomthetho. Bona bazoyigweba kobana ibulawe, bayinikele kabatjhili.

³⁴ Bazoyiphoqa, bayikhafulele, bayibethe bebayibulale. Ngemva kwamalanga amathathu izakuvuka.”

Isibawo sakaJakopo noJwanisi

³⁵ UJakopo noJwanisi, amadodana kaZebediya, beza kuJesu bathi kuye: “Mfundisi, sifuna bona usenzele nanyana yini esiyikhombelako.”

³⁶ Wathi kibo: “Nifuna bona nginenzeleni na?”

³⁷ Bathi kuye: “Vuma bona embuswenakho omunye wethu ahlale ngesigomeni sakho omunye ngesinceleni sakho.”

³⁸ UJesu wathi kibo: “Aniyazi into eniyikhombelako le. Ningayisela ikapho engiyiselako namkha nibhajadiswe ngombhabhadiso engibhajadiswe ngawo na?”

³⁹ Bamphendula bathi: “Iye, singakghona.” UJesu wathi kibo: “Nizakusela ikapho le engiyiselako, nibhajadiswe ngombhabhadiso engibhajadiswe ngawo,

⁴⁰ kodwana nakukuhlala ngesigomeni nangesinceleni sami akusingekwami. Iinkhundlezo zingezalabo ezilungiselwe bona.”

⁴¹ Kuthe bona abalitjhumi bezwe lokho, bararana noJakopo noJwanisi.

⁴² UJesu wababizela kuye wathi kibo: “Niyazi bona labo okuthiwa babusi babatjhili banamandla phezu kwabo, neenkhulu zabo eziphezulu zinegunya phezu kwabo.

⁴³ Kodwana akusinjalo ngani. Esikhundleni salokho, nanyana ngubani ofuna ukuba mkhulu phakathi kwenu kumele abe sisebenzi,

⁴⁴ naloyo ofuna ukuba ngewaqangi hlangana nani, kufanele abe likhoboka labo boke.

⁴⁵ Ngitjho neNdodana yoMuntu ayikezeli ukuzokwenzelwa, kodwana ukuzokwenzela nokunikela ipilwayo kobana ibe sihlengo sabanengi.”

UBhartimewu osiphofu uyabona

⁴⁶ Bafika eJerikho. UJesu nabafundi bakhe kanye nesiqubuthu esikhulu nabaphuma ngedorobheni, bekuhlezi isikhombeli esisiphofu eqadi kwendlela esinguBhartimewu, indodana kaThimewu.

⁴⁷ Nasele sizwile bona nguJesu weNazaretha, sarhuwelela sathi: “Jesu, Ndodana kaDavida, yewungirhawukele!”

⁴⁸ Abanengi basikhalimela bathi asithule; kodwana sasolo sirhuwelela sithi: “Ndodana kaDavida, yewungirhawukele!”

⁴⁹ UJesu wajama wathi: “Yenisibize.” Basibiza-ke, bathi kiso: “Qina amandla, sikima, uyakubiza.”

⁵⁰ Salahla ingubaso, seqa seza kuJesu.

⁵¹ UJesu wasibuza wathi: “Ufuna bona ngikwenzeleni na?” Isiphofu sathi kuye: “Rabi, ngifuna ukubona.”

⁵² UJesu wasiphendula wathi: “Khamba, ukukholwa kwakho kukusindisile.” Khonokho sabona, salandela uJesu endleleni.