UMARKOSI 1 - IsiNdebele 2012 Translation

UJwanisi umbhabhadisi ulungisa indlela

¹ Ukuthoma kwevangeli ngoJesu Krestu, iNdodana kaZimu.

² Nakhu okutlolwe encwadini yomphorofidi u-Isaya: “Ngizokuthumela isithunywa sami ngaphambi kwakho, esizokulungisa indlelakho;

³ iye, ilizwi lorhuwelela erhalawumbeni lisithi, ‘Lungiselani iKosi indlela, yenzeleni indlela enqophileko!’ ”

⁴ Nje-ke uJwanisi wafika, wabhabhadisa erhalawumbeni bewatjhumayela umbhabhadiso wokutjhuguluka malungana nokucolelwa kwezono.

⁵ Yoke imizana yeJudiya nabo boke abantu beJerusalema baphuma baya kuye. Bavuma izono zabo, wababhabhadisa ngemlanjeni iJordani.

⁶ UJwanisi gade ambatha izambatho ezenziwe ngoboya bekamela, azibophe ngebhande lesikhumba edinini. Gade agoma iintethe neliju lemmangweni.

⁷ Watjhumayela wathi: “Emva kwami kuza onamandla khulu kunami, engingasililitho kobana ngingabe ngiguqe ngitjhaphulule imitjana yamapatlagwanakhe.

⁸ Mina nginibhabhadisa ngamanzi, kodwana yena uzanibhabhadisa ngoMoya oCwengileko.”

Ukubhajadiswa nokulingwa kwakaJesu

⁹ Emihleni leyo kwafika uJesu avela eNazaretha ngeGalile, wabhajadiswa nguJwanisi ngeJordani.

¹⁰ Kuthe asaphuma ngemanzini, wabona izulu livuleka, uMoya wehlela phezu kwakhe njengezuba.

¹¹ Ilizwi lavela ezulwini lithi: “Wena uyiNdodanami ethandekako, ngithabe khulu ngawe.”

¹² Khonokho uMoya wamusa erhalawumbeni.

¹³ Wahlala lapho amalanga amatjhumi amane, alingwa nguSathana. Bekukhona neembandana, iingilozi zeza zamsiza.

UJesu ubiza ababambi beenhlambi abane

¹⁴ Emva kokubotjhwa kwakaJwanisi, uJesu waya eGalile, watjhumayela ivangeli lakaZimu,

¹⁵ wathi: “Isikhathi sesifikile! Umbuso kaZimu sewutjhidele! Tjhugulukani, nikholwe ivangeli!”

¹⁶ Kuthe uJesu asakhamba eqadi kwelwandle leGalile, wabona uSimoni nomfowabo u-Andrisi baphosela inedabo ngelwandle ngombana gade bababambi beenhlambi.

¹⁷ UJesu wathi kibo: “Ngilandelani, ngizanenza ababambi babantu.”

¹⁸ Khonokho balisa amanedabo, bamlandela.

¹⁹ Kwathi sele akhambakhambe ibangana, wabona uJakopo umsa kaZebediya nomfowabo uJwanisi, bebangemkhunjini balungisa amanedabo.

²⁰ Msinyazana wababiza, yeke batjhiya uyise uZebediya angemkhunjini kanye neensebenzi bamlandela.

UJesu uqotjha imimoya emimbi

²¹ Baya eKapernawumi, kwathi nakufika iSabatha, uJesu wangena ngesinagogini wathoma ukufundisa.

²² Abantu bamangaliswa yindlela uJesu afundisa ngayo ngombana wabafundisa njengomuntu onegunya ingasi ngendlela abavane bafundiswe ngayo bafundisi bomthetho.

²³ Khonapho gade kunendoda ngesinagogini ebegade inommoya omumbi, yarhuwelela,

²⁴ yathi: “Usifunani wena Jesu weNazaretha na? Uze ukuzosibhubhisa na? Ngiyakwazi bona ungubani, ungoCwengileko kaZimu!”

²⁵ UJesu wawukhalimela wathi: “Thula, uphume kiyo!”

²⁶ Ummoya omumbi warutharutha indoda leyo, waphuma kiyo ngokutlewula okukhulu.

²⁷ Abantu barareka khulu kangangobana babuzana babodwa bathi: “Yintobani esiyibonako le? Yifundiso etja nenamandla! Ukhalimela ngitjho nemimoya emimbi, imlalele!”

²⁸ Khonokho iindaba ngaye zasabalala nesifunda soke seGalile.

UJesu upholisa abantu abanengi

²⁹ Kuthe bona basuke esinagogini, bakhamba noJakopo noJwanisi baya ekumbeni kaSimoni no-Andrisi.

³⁰ Ngesikhatheso umkhwekazi kaSimoni begade alele, aphethwe mgomani. Nje-ke bambika kuJesu khonokho.

³¹ UJesu weza, wambamba ngesandla, wamphakamisa. Umgomani wamlisa, wabenzela ukudla.

³² Ngokuhlwa kwamhlokho abantu baletha kuJesu boke ebebagula nabanamadimoni.

³³ Boke abantu bedorobho babuthelelana emnyango.

³⁴ Wapholisa abanengi ebegade bagula baphethwe malwelwe ahlukahlukeneko, bewaqotjha namadimoni amanengi. Azange avumele amadimoni kobana akhulume ngombana bekamazi.

UJesu uthandaza endaweni efihlakeleko

³⁵ Ngelanga elilandelako ngesamarimarima, kusese mnyama, uJesu wasikima, waphuma ngekumbeni waya endaweni enganamuntu lapha afika khona wathandaza.

³⁶ USimoni nabakhambisani bakhe bakhamba bayomfuna,

³⁷ kwathi nabamfunyanako, bakhuza bathi: “Abantu bafunana nawe!”

³⁸ Wathi kibo: “Nambani siyeni kwandawo emizini eseduze ukuze ngitjhumayele nakhona. Ngikho lokho engikuphumeleko.”

³⁹ Wayikhamba yoke iGalile atjhumayela ngemasinagogini wabo, waqotjha namadimoni.

Indoda enekhwekhwe

⁴⁰ Indoda enekhwekhwe yeza kuJesu, yamncenga iguqe ngamadolo yathi: “Nakube uyathanda, ungangihlambulula.”

⁴¹ UJesu wayizwela ubuhlungu, wathabulula isandla sakhe, wayikghwatha wathi: “Ngiyathanda, hlambuluka!”

⁴² Khonokho ikhwekhwe lasuka, yeke yahlambuluka.

⁴³ UJesu wayitjhaphulula kobana ikhambe, wayiyalisisa

⁴⁴ wathi kiyo: “Qinisekisa bonyana awutjeli noyedwa ngalokhu. Kodwana khamba uyozibonakalisa kumphristi bese wenza imihlabelo uMosi ayale ngayo mayelana nokuhlanjululwa kwakho, kube bufakazi kibo.”

⁴⁵ Kodwana esikhundleni salokho, indoda leyo yakhamba izikhulumela, irhatjha iindaba zokupholiswa kwayo. Ngebanga lalokho, uJesu azange asakghona ukungena edorobheni bamqalile. Kodwana wahlala ngaphandle kwedorobho eendaweni ezinganabantu. Nanyana kunjalo abantu beza kuye bavela kizo zoke iindawo.