UMALAKI 4 - IsiNdebele 2012 Translation

¹ “Ngambala liyeza ilanga elizakutjhisa njengekehla. Boke abazaziko ngitjho esinye nesinye isoni sizakuba mawunguwungu begodu ilanga elizakwelo lizabatjhisa, batjhe thokgho.” Kutjho uSomnini uSomandla.

² “Kodwana kini enesaba ibizo lami, kuzakuphuma ilanga lokulunga linokuphilisa emisebenalo. Nizakuphuma nitune njengamathole nakaphuma egoqweni.

³ Yeke nizakugadangela phasi iinkhohlakali: Zizakuba mlotha ngaphasi kweenyawo zenu mhlana ngenza izintwezi.” Kutjho uSomnini uSomandla.

Isiphetho

⁴ USomnini uthi: “Khumbula umthetho wencekwami uMosi, imiyalo nemithetho engamnikela yona entabeni iHorebe mayelana no-Israyeli woke.

⁵ Qala ngizakuthumela umphorofidi u-Elija ngaphambi kokuza kwelanga elikhulu nelesabekako lakaSomnini.

⁶ Uzokuphendulela iinhliziyo zaboyise ebantwaneni, neenhliziyo zabentwana kiboyise; nakungasinjalo, ngizakuza ngiyirhayile nya inarha.”