UMALAKI 3 - IsiNdebele 2012 Translation

¹ “Qala, ngizokuthuma isithunywa sami esizakulungisa indlela phambi kwami. Kuthi msinyazana, isikhulu osifunako sifike ethempeleni lami; iye, isithunywa sesivumelwano somuzi osihlulukeleko siyeza.” Kutjho uSomnini uSomandla.

² Alo, ngubani ongabhesela ilanga lokuza kwaso? Ngubani ozakujama ekubonakaleni kwaso na? Ngambala ilangelo lizakufana nomlilo womncibilikisi nanjengesibha somhlanzi.

³ Isithunywa sizakuhlala njengomncibilikisi nomcwengisisi wesiliva; uzakucwengisisa amaLevi awahlunge njengegolide nesiliva ukuze abe ngewakaSomnini, abaphristi abaletha iminikelo ngendlela efaneleko.

⁴ Yeke iminikelo yakwaJuda neJerusalema izakwamukeleka kuSomnini njengemihleni yaphambilini neminyakeni eyadlulako.

⁵ “Ngizakubandamela kini-ke bona ngigwebe. Ngizakuba msinyana ekufakazeni ngokujamelana nezanusi, iinhlobongi, nabafunga amanga, godu ngokujamelana nabadlelezela iinsebenzi imirholwazo, abagandelela abahlolokazi neentandani, bamuka neenkhonzi amalungelwazo, kodwana bangangesabi mina.” Kutjho uSomnini uSomandla.

Isibusiso salabo abaphendukako

⁶ “Mina Somnini angiphenduki, nani nzukulwana zakaJakopo anikatjhuguluki.

⁷ Kusukela emihleni yaboyihlo nitjhidile emiyalwenami begodu akhange niyilonde. Nanibuyela kimi, nami ngizakubuyela kini,” kutjho uSomnini uSomandla. “Kodwana nibuza nithi, ‘Sibuye bunjani?’

⁸ “Kunomuntu ongagalaja uZimu na? Kodwana nina niyangigalaja. Niyabuza nithi, ‘Sikugalaje njani?’ Ngokwetjhumi nezipho.

⁹ Ninikelelwe ngamanikelela, sizwe soke, ngombana niyangigalaja.

¹⁰ Lethani koke kwetjhumi ngesilulwini, ukuze kube nokudla endlinami. Ngilingani ngalokhu.” Kutjho uSomnini uSomandla. “Nibone nangingazukunivulela izulu liwuluke, nginithululele iimbusiso ezizakuba mhlumba.

¹¹ Ngizakukhalimela intethe bona ingadli iintjalo zenu ukuze iindiribe emasiminenu zingabhalelwa kuhloma.” Kutjho uSomnini uSomandla.

¹² “Nje-ke izizwe zoke zizakuthi nibusisiwe ngombana inarhenu izakuba ngeganukejako.” Kutjho uSomnini uSomandla.

Isiduduzo sabalingwako

¹³ USomnini uthi: “Ningihlabe ngamagama, kodwana niyabuza nithi, ‘Sikhulume ngawe sathini?’

¹⁴ Nithe, ‘Akusizi ukulotjha uZimu. Yini njekhona esiyizuzileko ngokwenza akufunako nokukhamba sizilile phambi kwakaSomnini uSomandla?

¹⁵ Khonanje sibiza abazaziko njengababusisiweko. Iye, iinkhohlakali ziyaphumelela nabajamelene noZimu bayaliswa.’ ”

¹⁶ Lokha abesaba uSomnini nabakhulumisana bodwa, uSomnini uyabezwa. Umtlolo osongiweko wesikhumbuzo watlolwa phambi kwakhe mayelana nalabo abesaba uSomnini bahlonipha nebizo lakhe.

¹⁷ USomnini uSomandla uthi: “Ngambala bazakuba ngebami mhlana ngenyula igugu lami. Ngizabarhawukela njengomuntu orhawukela indodanakhe emsebenzelako.

¹⁸ Nizakubona godu umehluko phakathi kwabalungileko nabakhohlakeleko naphakathi kwabalotjha uZimu nabangamlotjhiko.”