ULUKASI 9 - IsiNdebele 2012 Translation

UJesu uthuma abafundi bakhe abalitjhumi nambili

¹ UJesu wabizela kuye abafundi bakhe abalitjhumi nambili, wabapha amandla negunya lokuqotjha woke amadimoni nokupholisa izifo.

² Yeke wabathuma bona bayokutjhumayela ngombuso kaZimu bebapholise nabagulako.

³ Wathi kibo: “Ningaphathi ilitho ekukhambeni kwenu, ingaba yintonga, imbada, isikwa, imali nanyana isambatho ngaphezu kwaleso enisembetheko.

⁴ Nanyana ngiyiphi ikumba eningena kiyo, hlalani lapho bekube kumhlana nikhambako emzini lowo.

⁵ Nakube abantu balapho abanamukeli, thintithani ithuli eenyaweni zenu naniphuma ngemzinabo, lokho kube bufakazi obujamelene nabo.”

⁶ Yeke bakhamba-ke bangena umuzi nomzana, batjhumayela iindaba ezimnandi, bapholisa nabantu kizo zoke iindawo.

UHerode urarekile

⁷ UHerode umtetrarerhesi wezwa ngakho koke okwenzekako. Warareka khulu ngombana abanye bebasithi uJwanisi uvusiwe kabahlongakeleko.

⁸ Abanye bebasithi u-Eliya ubonakele, abanye godu bathi omunye wabaphorofidi bekadeni uvukile.

⁹ Kodwana uHerode wathi: “UJwanisi ngamqunta ihloko. Alo, ngubani-ke engizwa izinto ezinjalo ngaye lo?” Nje-ke walinga ukubonana naye.

UJesu upha iinkulungwana ezihlanu ukudla

¹⁰ Abapostoli nababuyako, babikela uJesu ngalokho abakwenzileko. Wabathatha wakhamba nabo bodwa baya edorobheni ebekuthiwa yiBhethe-Sayida.

¹¹ Kodwana isiqubuthu sabantu sezwa ngalokho, samlandela. Wabamukela, wakhuluma nabo ngombuso kaZimu, wapholisa labo ebebafuna ukwelatjhwa.

¹² Sekuhlwile ngemva kwedina, abafundi bakhe beza kuye bathi: “Besithi tjhaphulula abantwaba baye ngemizini neendaweni eziseduze bayokufuna okugonywako nendawo yokulala ngombana sisemmangweni lapha.”

¹³ Kodwana uJesu wathi kibo: “Bapheni okugonywako.” Bamphendula bathi: “Esinakho sezizikwa ezihlanu neenhlambi ezimbili. Kuzakufuneka bona siyokuthengela soke isiqubuthwesi okugonywako.”

¹⁴ Bekunamadoda angaba ziinkulungwana ezihlanu. UJesu wathi ebafundini bakhe: “Bahlaliseni phasi ngeenqhema zamatjhumi amahlanu ngasinye.”

¹⁵ Abafundi bakwenza lokho, yeke woke umuntu wahlala phasi.

¹⁶ UJesu wathatha izikwa ezihlanu neenhlambi ezimbili waqala ezulwini, wathokoza wazihlephula. Wanikela abafundi bakhe bona baphe isiqubuthu.

¹⁷ Boke bagoma basutha, abafundi bakhe babuthelela iintshutshuru bazalisa iinqwebu ezilitjhumi nambili.

Ubufakazi bakaPitrosi ngoJesu

¹⁸ Kwathi uJesu asathandaza ngasese, abafundi bakhe banaye lapho, wababuza wathi: “Abantu bathi ngingubani na?”

¹⁹ Bamphendula bathi: “Abanye bathi unguJwanisi uMbhabhadisi. Abanye bathi ungu-Eliya, godu abanye bathi ungomunye wabaphorofidi bekadeni ovukileko.”

²⁰ Wababuza wathi: “Alo-ke, nina nithi ngingubani na?” UPitrosi wamphendula wathi: “UnguKrestu kaZimu.”

UJesu ukhuluma ngokutlhaga nangokufa kwakhe

²¹ UJesu wabadosa ngendlebe bona bangatjeli namunye ngalokho.

²² Godu wathi: “INdodana yoMuntu kumele itlhage ngezinto ezinengi beyilahlwe baphathi, baphristi abakhulu nabafundisi bomthetho. Godu kumele ibulawe bese elangeni lesithathu ivuswe ekufeni.”

²³ Yeke wathi kibo boke: “Nakube kukhona ofuna ukungilandela, akazidele, atjathe isiphambano sakhe malanga woke angilandele.

²⁴ Ngambala nanyana ngubani ofuna ukusindisa ipilwakhe, izomlahlekela, kodwana nanyana ngubani olahlekelwa yipilwakhe ngebanga lami, uzabe uyisindisile.

²⁵ Kuzamsiza ngani umuntu ukuzuza iphaseli loke nje, kodwana yena alahleke namkha azilobe yena ngokwakhe na?

²⁶ Nanyana ngubani oba neenhloni ngami nangamezwami, neNdodana yoMuntu izakuba neenhloni ngaye lokha nayifika ephazimulwenayo, nephazimulweni kaBaba kanye neengilozini ezicwengileko.

²⁷ Kodwana nginitjela iqiniso, abanye benu abajame lapha angekhe bakuzwa ukufa bangakawuboni umbuso kaZimu.”

Ukuphenduka kwejamo lakaJesu entabeni

²⁸ Emalangeni abunane ngemva kobana uJesu akhulume lokho, wathatha uPitrosi, uJwanisi noJakopo wakhuphukela nabo entabeni wayokuthandaza.

²⁹ Kuthe asathandaza, ubuso bakhe baphenduka nezambatho zakhe zadarha njengokunyazima kombani.

³⁰ Khonapho amadoda amabili, uMosi no-Eliya,

³¹ babonakala ngephazimulo ekulu, bakhuluma noJesu. Bakhuluma ngokwemuka kwakhe ebekuzakwenzeka eJerusalema.

³² UPitrosi nabangani bakhe gade baphethwe buthongo, kodwana kwathi nabaphaphamako babona iphazimulo kaJesu namadoda amabili agade ajame naye.

³³ Kwathi lokha amadoda lawo nasuka kuJesu, uPitrosi wathi kuye: “Kosi, maye kuhle kangangani bona sibe lapha! Yeke asakheni imitlhatlhana emithathu, owodwa ube ngewakho, owodwa ube ngewakaMosi, owodwa ube ngewaka-Eliya.” Bekangazizwa bona uthini.

³⁴ Kuthe asakhuluma njalo kwavela ilifu labagubuzesa, abafundi bethuka nabangena ngelifwini.

³⁵ Kwezwakala ilizwi livela elifwini lithi: “Le yiNdodanami, engiyikhethileko, ilaleleni!”

³⁶ Ngemva kobana ilizwelo likhulumile, bafunyana uJesu ayedwa. Abafundi bayigcina kibo indaba le, akhange batjele muntu ngalokho abakubonileko.

UJesu upholisa umsana onommoya omumbi

³⁷ Ngelanga elilandelako nabehla entabeni, bahlangatjezwa siqubuthu esikhulu.

³⁸ Kwarhuwelela indoda hlangana nesiqubuthu yathi: “Mfundisi, ngiyakurabhela! Akhe uqale indodanami ekungiyo kwaphela, umntwana enginaye!

³⁹ Ummoya uyayibamba, khonapho bese iyarhuwelela, uyidule phasi ibe nesithunthwana, ibhubhudlhe amagwebu ngomlomo. Awuyiphi ithuba kanti nokuyilimaza uyayilimaza.

⁴⁰ Fese ngarabhela abafundi bakhwaba bona bawuqotjhe, kodwana babhalelwa.”

⁴¹ UJesu waphendula wathi: “Nina sizukulwana esingakholwako nesikhohlakeleko! Ngizakuhlala nginani bekube kunini na? Letha indodanakho leyo lapha.”

⁴² Kuthe umsana aseza kuJesu, idimoni lamdula phasi, waba nesithunthwana. Kodwana uJesu wakhalimela ummoya omumbi lowo, wapholisa umsana bewambuyisela kuyise.

⁴³ Boke abantu barareka ngobukhulu obungaka bakaZimu. Kwathi woke umuntu asararekile ngakho koke okwenziwe nguJesu, wathi ebafundini bakhe:

UJesu ukhuluma ngokufa kwakhe godu

⁴⁴ “Lalelisisani kuhle lokho engizonitjela khona: INdodana yoMuntu izokukhatjhelwa ezandleni zabantu.”

⁴⁵ Kodwana abafundi akhange bazwisise bona kutjho ukuthini lokhu. Bekufihlekile kibo ukuze bangalemuki, ngalokho bebesaba ukumbuza ngendaba le.

Omkhulu embusweni kaZimu

⁴⁶ Kwaba khona ukuphikisana hlangana nabafundi bakaJesu, bafuna ukwazi bona ngubani ozokuba mkhulu hlangana nabo.

⁴⁷ UJesu ngokwazi imikhumbulwabo, wathatha umntwana omncani wamjamisa eqadi kwakhe.

⁴⁸ Wathi kibo: “Nanyana ngubani owamukela umntwana omncani lo ebizweni lami, wamukela mina; naloyo owamukela mina, wamukela loyo ongithumileko. Ngambala loyo ongomncani phakathi kwenu noke nguye ongomkhulu.”

Ukusebenzela uZimu

⁴⁹ UJwanisi wathi kuye: “Mfundisi, sibone umuntu aqotjha amadimoni ngebizo lakho, salinga ukumkhandela ngombana angasuye omunye wethu.”

⁵⁰ Kodwana uJesu wathi: “Ningamkhandeli ngombana loyo ongararani nani ungowenu.”

Abantu beSamariya babhala ukwamukela uJesu

⁵¹ Kwathi lokha isikhathi nasitjhidelako sokobana enyuselwe ezulwini, uJesu wakhumbula ukuya eJerusalema.

⁵² Wathumela iinthunywa ngaphambi kwakhe bona ziye ngemzini weSamariya ziyomlungisela.

⁵³ Kodwana abantu balapho azange bamamukele ngombana bekasiya eJerusalema.

⁵⁴ Kwathi lokha abafundi bakhe, uJakopo noJwanisi, nababona lokhu bathi kuye: “Kosi, ufuna bona sibize umlilo ezulwini wehle ubaqothule na?”

⁵⁵ Kodwana uJesu waphenduka, wabakhalimela.

⁵⁶ Yeke uJesu nabafundi bakhe baya emzini omunye.

Ukulandela uJesu

⁵⁷ Kwathi basakhamba endleleni, umuntu omunye wathi kuJesu: “Ngizakulandela koke lapha uya khona.”

⁵⁸ UJesu wathi kuye: “Iimpungutjha zinemigodi, iinyoni zomkayi zineenhlakana, kodwana iNdodana yoMuntu ayinalapha ingabeka khona ihloko.”

⁵⁹ Wathi emuntwini omunye: “Ngilandela!” Kodwana umuntu loyo wathi: “Kosi, angibuyele ekhaya ngiyokubulunga ubaba qangi.”

⁶⁰ UJesu wamphendula wathi: “Lisani abafileko babulunge abafileko babo. Kodwana wena khamba uyokumemezela umbuso kaZimu.”

⁶¹ Omunye godu wathi: “Kosi ngizakulandela, kodwana akhe ngibuyele ekhaya qangi, ngiyokulayelisa.”

⁶² UJesu wathi kuye: “Umuntu obeka isandla sakhe eplurhwini, aphele arhedlule emuva, akakafaneli ukusebenzela umbuso kaZimu.”