ULUKASI 8 - IsiNdebele 2012 Translation

Abafazi abakhamba noJesu

¹ Ngemva kwalokho uJesu wakhamba wadabula hlangana nedorobho nomuzi atjhumayela iindaba ezimnandi ngombuso kaZimu. Abalitjhumi nambili gade bakhamba naye,

² kanye nabafazi abathileko ebebapholisiwe emimoyeni emimbi nezifeni: uMariya Magdalina, okwakhutjhwa kuye amadimoni alikhomba;

³ uJwana umkaKhuza, umphathi womkhaya kaHerode, uSusana kanye nabanye abanengi. Abafazaba ngibo ebegade basiza ngokusekela uJesu nabafundi bakhe ngeendleko zabo.

Umfanekiso ngomtjali

⁴ Kwathi nakusabuthene isiqubuthu esikhulu nabantu basiza kuJesu bavela emizini ehlukeneko, wacoca naku umfanekiso:

⁵ “Umlimi waphuma wayokutjala imbewakhe. Kwathi nasarhatjha imbewu esimini, enye yawela endleleni, yagadangwa ngeenyawo neenyoni zomkayi zayidobha zayidla.

⁶ Enye yawela ekhetheni, kwathi nayimilako yabuna ngombana bekomile.

⁷ Enye yawela hlangana nameva, akhula nayo ayiminyezela yafa.

⁸ Enye yawela ehlabathini evundileko. Yamila beyathela isivuno, kwaba ngokubuyelelwe kalikhulu kunangaphezu kwalokho ebekutjaliwe.” Wathi naqeda ukutjho lokho warhuwelela wathi: “Loyo oneendlebe akezwe!”

Isizathu semifanekiso

⁹ Abafundi bakhe bambuza bona umfanekiso lo utjho ukuthini na.

¹⁰ Wabaphendula wathi: “Nina niphiwe ilwazi lokulemuka ifihlo yombuso kaZimu, kodwana kabanengi ngikhuluma ngemifanekiso ukuze kuthi, “ ‘nanyana babona, kodwana bangabonisisi, nanyana basizwa kodwana bangalemuki.’ ”

UJesu uhlathulula umfanekiso ngomtjali

¹¹ “Nakhu okutjhiwo mfanekiso: Imbewu lilizwi lakaZimu.

¹² Abasendleleni ngilabo abezwako, bese uSathana uyeza afese ahlwithe ilizwi eenhliziyweni zabo ukuze bangakholwa bese basindiswe.

¹³ Abasekhetheni ngilabo abathi nabezwa ilizwi balamukele ngethabo, kodwana banganayo imirabhu. Bayakholwa kwesikhatjhana, kodwana nakufika isikhathi sokulingwa bawe.

¹⁴ Abasemeveni ngilabo abezwako kodwana nabalokhu bakhamba endleleni baminyaniswe matshwenyekwabo, umnotho kanye nobumnandi bepilo, bese bangatheli iinthelo ezivuthiweko.

¹⁵ Yeke labo abasequlwanini evundileko ngilabo abathi nabezwa ilizwi balibulunge ngeenhliziyo ezithembekileko nezihle, bese bathela isithelo ngokubekezela.”

Isibani ngaphasi kwesitja

¹⁶ “Akakho okhanyisa isibani asifihle ngesitjeni namkha asibeke ngaphasi kombhede. Esikhundleni salokho usibeka elithini laso ukuze labo abangenako bakwazi ukubona umkhanyo.

¹⁷ “Ngambala akunanto efihliweko engeze yavezwa emtarini, godu akunanto esitheziweko engeze yaziwa namkha yembulwa.

¹⁸ “Yeke yelelani bona nizwa njani ngombana loyo onelitho uzakungezelelelwa, kodwana loyo onganalitho uzakwemukwa ngitjho nokuncancani anakho.”

Unina nabafowabo kaJesu

¹⁹ Unina nabafowabo kaJesu beza bazombona, kodwana babhalelwa kufika kuye ngebanga lesiqubuthu.

²⁰ Omunye wamtjela wathi: “Unyoko nabafowenu bajame ngaphandle bafuna ukukubona.”

²¹ UJesu wabaphendula wathi: “Umma nabafowethu ngilabo abezwa ilizwi lakaZimu bebalenze.”

UJesu uthulisa isiwuruwuru

²² Ngelinye ilanga uJesu wakhwela ngemkhunjini nabafundi bakhe, wathi kibo: “Nambani seyamele ngaphetjheya kwelwandle.” Yeke bakhamba-ke.

²³ Kuthe basathaya njalo, uJesu walala. Khonokho kwavuka isiwuruwuru esikhulu ngelwandle kangangobana umkhumbi wazala amanzi, boke baba sengozini ekulu.

²⁴ Abafundi baya kuye bamvusa bathi kuye: “Kosi, Kosi! Safa!” UJesu wavuka, wakhalimela isiwuruwuru kanye namaza agubhuzelako, khonapho isiwuruwurweso sathula, kwathi du.

²⁵ Yeke wathi ebafundini bakhe: “Kuphi ukukholwa kwenu na?” Besaba, barareka bebabuzana bodwa bathi: “Kanti ngubani umuntu lo okghona ukukhalimela imimoya namaza kumlalele na?”

UJesu upholisa indoda enemimoya emimbi

²⁶ Bayamela esifundeni samaGerasene esingaphetjheya kwelwandle ukusuka eGalile.

²⁷ Kuthe bona uJesu ehlele eligwini, wahlangatjezwa yindoda enamadimoni ivela ngedorobheni. Besele kusikhathi eside indoda le isoloko ikhamba bulanzi begodu ingahlali ekhaya, kodwana ihlala emathuneni.

²⁸ Kwathi nayibona uJesu yarhuwelela beyaziphosela eenyaweni zakhe, yamemeza yathi: “Utjhiswa yini ngami wena Jesu, Ndodana kaZimu ongoPhezulu na? Ngiyakurabhela ungangihlukumezi!”

²⁹ UJesu begade ayale ummoya omumbi kobana uphume endodeni leyo. Esikhathini esinengi idimoneli beliyibamba, kuthi nanyana ibotjhwe ngeenketani izandla neenyawo begodu iqaphelwe, iqhusule iinketanezo, idimoni liyithumele erhalawumbeni.

³⁰ UJesu wayibuza wathi: “Ungubani ibizo lakho na?” Yathi: “NginguLegiyoni.” Yatjho njalo ngombana bekungene amadimoni amanengi kiyo.

³¹ Amadimoni arabhela uJesu kanenginengi bona angawayali kobana aye ngemgodini otjhingako.

³² Bekukhona umhlambi omkhulu wezavukazana utlabe entatjaneni. Yeke imimoya emimbi yarabhela uJesu bona ayithumele ngezavukazaneni, wayinikela-ke imvumo.

³³ Amadimoni lawo aphuma endodeni, angena ngezavukazaneni, umhlambi wagijimela emthewukeleni weligu wadlhumukela ngelwandle, wacwila.

³⁴ Kwathi lokha abelusi bezavukazana nababona okwenzekileko, bagijimela ngedorobheni nemaphandleni bayokubika.

³⁵ Abantu baphuma bayokuqala bona kwenzekeni. Kwathi bona bafike kuJesu, bafumana indoda ekukhutjhwe kiyo amadimoni ihlezi eenyaweni zakaJesu, yembethe begodu ihlokwayo ithatha kuhle; boke bangenwa kukwesaba.

³⁶ Labo ababonako batjela abantu bona ipholiswe njani indoda ebeyinemimoya emimbi leyo.

³⁷ Yeke boke abantu besifunda samaGerasene bakhombela uJesu bona abagadunge ngombana bebangenwe kukwesaba. Yeke uJesu wangena ngemkhunjini wakhamba.

³⁸ Indoda ekwakhutjhwa kiyo amadimoni yarabhela yathi ifuna ukukhamba noJesu. Kodwana uJesu wathi kiyo:

³⁹ “Buyela ekhaya uyobatjela bona kungangani uZimu akwenzele khona.” Yeke indoda leyo yakhamba-ke yangena loke idorobho ikhuluma bona kungangani ekwenzelwe nguJesu.

Indodakazi kaJayirosi nomfazi owakghwatha isambatho sakaJesu

⁴⁰ Kwathi bona uJesu abuye, isiqubuthu sabantu samhlangabeza ngombana besimlindele.

⁴¹ Khonapho kwafika kuye indoda ebekuthiwa nguJayirosi, imphathi wesinagogi, yafese yazilahlela eenyaweni zakhe. Yamrabhela bona eze emzinayo

⁴² ngombana indodakazayo ekukuphela kwayo, umntazanyana weminyaka elitjhumi nambili, beyigulela ukufa. Kwathi asakhamba, isiqubuthu samuminyanisa.

⁴³ Hlangana nesiqubuthweso bekunomfazi ogade aphopha iingazi iminyaka elitjhumi nambili. Begade arhutjhulele koke anakho eenyangeni, kodwana ayikho neyodwa eyakghona ukumelapha.

⁴⁴ Weza ngemva kwakaJesu wafese wakghwatha umphetho wesambatho sakhe, ukuphopha kwakhe kwaphela khonokho.

⁴⁵ UJesu wabuza wathi: “Ngubani ongikghwathileko na?” Boke balandula, uPitrosi wamphendula wathi: “Agu, Kosi! Qala bonyana abantu bakuminyezele kangangani.”

⁴⁶ Kodwana uJesu wathi: “Kukhona ongikghwathileko ngombana ngizwile lokha amandla naphumako kimi.”

⁴⁷ Kwathi lokha umfazi lo nabona bonyana angeze akwazi ukuzifihla, weza athuthumela wafese waguqa phambi kwakaJesu. Phambi kwabo boke abantu, wazihlambulula bonyana kubayini amkghwathile nokobana uphole njani khonokho.

⁴⁸ UJesu wathi kuye: “Ndodakazi, ukukholwa kwakho kukusindisile. Khamba ngokuthula.”

⁴⁹ Kwathi uJesu asakhuluma njalo, kwafika othileko avela emzini kaJayirosi, umphathi wesinagogi wathi: “Indodakazakho ihlongakele. Ungasatshwenya umfundisi.”

⁵⁰ Kodwana uJesu wakuzwa lokho wathi kuJayirosi: “Ungesabi, kholwa nje kwaphela, izakuphila.”

⁵¹ Kwathi bona afike emzini kaJayirosi, akhange avumele namunye bona angene naye ngaphandle kwakaPitrosi, uJwanisi noJakopo kanye noyise lomntwana nonina.

⁵² Ngesikhatheso boke ebebalapho begade barhahlawula bamlilela. UJesu wathi kibo: “Lisani ukurhahlawula! Akakahlongakali kodwana ulele.”

⁵³ Bamhleka ngombana gade basazi bona uhlongakele.

⁵⁴ Kodwana uJesu wambamba ngesandla wathi kuye: “Mntwanami, vuka!”

⁵⁵ Ummoyakhe wabuyela kuye, khonapho wasikima. Yeke uJesu wabatjela bona bamuphe okugonywako.

⁵⁶ Ababelethi bakhe barareka khulu, kodwana uJesu wabayala bona bangatjeli namunye ngokwenzekileko.