ULUKASI 7 - IsiNdebele 2012 Translation

UJesu upholisa ikhoboka lomphathimabutho weRoma

¹ Kwathi bona uJesu aqede ukukhuluma koke lokhu eendlebeni zabantu, wangena eKapernawumi.

² Ikhoboka lomphathimabutho weRoma ebelithandeka khulu kuye beligulela ukufa.

³ Umphathimabutho wezwa ngoJesu, nje-ke wathumela abaphathi abathileko bamaJuda kuye bayomkhombela kobana eze azokupholisa ikhoboka lakhe.

⁴ Bathi nabafika kuJesu bamrabhela khulu kwamambala bathi kuye: “Iyafaneleka indoda le kobana isizwe nguwe

⁵ ngombana iyasithanda isizwe sekhethu begodu ngiyo esakhele isinagogi.”

⁶ Yeke uJesu wakhamba nabo. Bekangasikude nekumba lokha umphathimabutho nathumela abangani bakhe kobana bathi kuye: “Kosi, ungazitshwenyi ngombana akukangifaneli bona umuntu onjengawe angangena ngaphasi kwephahla lami.

⁷ Kungebangelo azange bengizibone ngifanelekile bona ngingeza kuwe ngokwami. Bengithi yewukhulume ilizwi nje kwaphela, isisebenzi sami sizakuphola.

⁸ Nami ngokwami ngimumuntu ongaphasi kweemphathimandla, nginamajoni angaphasi kwami. Nangithi komunye, ‘Khamba,’ uyakhamba; ngithi komunye, ‘Yizapha,’ eze; ngithi ekhobokeni lami, ‘Yenza lokhu,’ likwenze.”

⁹ Kwathi uJesu nezwa lokho, wamrarekela khulu, waphendukela ngesiqubuthwini ebesimlandela wathi: “Ngiyanitjela ngithi azange khengifunyane ukukholwa okungaka ngitjho nakwa-Israyeli!”

¹⁰ Iinthunywa zabuyela emzini womphathi zafumana isisebenzi sipholile.

UJesu uvusa indodana yomhlolokazi

¹¹ Msinyazana ngemva kwalokho, uJesu waya edorobheni elibizwa bona yiNayini, akhamba nabafundi bakhe nesiqubuthu esikhulu.

¹² Kwathi bona afike esangweni ledorobho, wabona umngcwabo uphuma. Umufi loyo bekuyindodana eyodwa tere yomhlolokazi. Nje-ke isiqubuthu esikhulu sedorobhenelo besinaye.

¹³ Kwathi bona iKosi imbone, yamdabukela kwamambala yathi kuye: “Ungalili!”

¹⁴ Yatjhidela yafese yakghwatha ihlaka, kwathi ebebalithwele bajama. Yathi: “Sokana! Ngithi kuwe, vuka!”

¹⁵ Umufi wavuka wathoma wakhuluma, uJesu wayithatha wayibuyisela kunina.

¹⁶ Boke bafikelwa kukwesaba bebadumisa uZimu, bathi: “Umphorofidi omkhulu ufikile hlangana nathi!” Godu bathi: “UZimu uze ukuzokusiza abantu bakhe!”

¹⁷ Iindabezi ngoJesu zarhatjheka eJudiya loke kanye neenarheni ezilibhodileko.

Abazenda abavela kuJwanisi uMbhabhadisi

¹⁸ Abafundi bakaJwanisi bambikela ngakho koke lokhu. Wabiza babili babo,

¹⁹ wabathumela eKosini bona bayokubuza bathi: “Unguye olindelwe bona afike namkha silindele omunye na?”

²⁰ Kwathi bona bafike kuJesu, bathi: “UJwanisi uMbhabhadisi usithume kuwe bona sizokubuza sithi, ‘Unguye olindelwe bona afike namkha silindele omunye na?’ ”

²¹ Khonokho uJesu wapholisa abanengi ebebanezifo, bagula begodu banemimoya emimbi, wenza nabanengi abaphopheleko babona.

²² Waphendula iinthunywa wathi: “Buyelani emuva niyokubikela uJwanisi ngalokho enikubonileko nenikuzwileko: Iimphofu seziyabona, abarholopheleko sebayakhamba, abanekhwekhwe bapholile, iinthulu ziyezwa, abafileko bayavuswa neendaba ezimnandi zitjhunyayelwa kabadududu.

²³ Ubusisiwe umuntu ongakhubekiko ngami!”

²⁴ Ngemva kobana iinthunywa zakaJwanisi sezikhambile, uJesu wathoma ukukhuluma ngoJwanisi esiqubuthwini wathi: “Beniyokubonani lokha naniye erhalawumbeni na? Umhlanga ophephethwa mumoya na?

²⁵ Kanti beniyokubonani na? Umuntu owembethe izambatho zakanokutjho? Awa, abantu abembatha izambatho ezibizako bebahlale emnonweni bafunyanwa ngeengodlweni!

²⁶ Emanyeni naniyokubonani na? Kghani umphorofidi? Iye, ngiyanitjela ngithi ongaphezu komphorofidi.

²⁷ UJwanisi nguye okwatlolwa ngaye kwathiwa, “ ‘Ngizakuthumela isithunywa sami ngaphambi kwakho, esizakulungisa indlelakho.’

²⁸ “Ngiqinisile ngithi phakathi kwalabo ababelethwe ngowesifazana akakho omkhulu kunoJwanisi, kodwana omncancani embusweni kaZimu mkhulu kunaye.”

²⁹ Boke abantu ngitjho nabathelisi bawezwa amezwi kaJesu, bavuma bonyana indlela kaZimu iliqiniso ngombana bebabhajadiswe nguJwanisi.

³⁰ Kodwana abaFarisi nezazimthetho bawulahla umnqopho kaZimu ngabo ngombana bebangakabhajadiswa nguJwanisi.

³¹ UJesu wathi: “Alo-ke ngingabafanisa nani abantu banamhlanjesaba na? Kghani bafana nani na?

³² Banjengabantwana abahlezi endaweni yokuthengisela barhuwelelana basithi, “ ‘Sanibethela inghwani, akhange nigide; sanivumela iingoma zesililo, kodwana akhange nilile.’

³³ “UJwanisi uMbhabhadisi wafika angagomi sikwa begodu angaseli wayini, nina nathi, ‘Unedimoni!’

³⁴ INdodana yoMuntu yafika igoma begodu isela, nina nathi, ‘Nasi-ke isirhiribideli nesidakwa, umngani wabathelisi nezoni!’

³⁵ Kodwana ukuhlakanipha kuqinisekiswa ngibo boke abantwana bakho.”

UJesu ngendlini kaSimoni umFarisi

³⁶ Nje-ke omunye wabaFarisi wamema uJesu bona azokugoma naye isidlo sakusihlwa. UJesu waya emzini womFarisi, wazigedla etafuleni.

³⁷ Kwathi lokha umfazi obegade aphila ipilo yesono edorobhenelo nalemuka bonyana uJesu gade agoma ngekumbeni yomFarisi, waletha umjekana uzele amakha.

³⁸ Wajama ngemva kwakhe eenyaweni zakhe walila, wathambisa iinyawo zakhe ngeenyembezi. Wazesula ngeenhluthu zakhe, wazincwanga bewazithela ngamakha.

³⁹ Kuthe umFarisi omumemileko nabona lokhu, wazibuza wathi: “Nakube kwamambala umuntu lo mphorofidi, bekazakwazi bona ngubani omkghwathako lo nokobana umhlobo bani womfazi, okutjho bona usisoni!”

⁴⁰ UJesu wamphendula wathi: “Simoni, ikhona into engifuna ukukutjela yona.” USimoni wathi: “Yewungitjele mfundisi.”

⁴¹ UJesu wathi: “Bekukhona abantu ababili ebebakoloda umbolekisimali. Omunye bekamkoloda abodenariyu abahlanu , omunye amkoloda abodenariyu abamatjhumi amahlanu.

⁴² Bobabili azange babe nemali yokumbuyisela, nje-ke wasula isikolodo sabo bobabili. Alo-ke ngongiwuphi phakathi kwabo ozomthanda khulu na?”

⁴³ USimoni wathi: “Ngicabanga bona ngiloyo owesulelwe isikolodo esikhulu.” UJesu wathi: “Ubone kuhle.”

⁴⁴ Yeke waphendukela ngemfazini wathi kuSimoni: “Uyambona umfazi lo na? Ngize ngakwakho, akhange unginikele ngitjho namanzana wokwesula iinyawo zami, kodwana yena uthambise iinyawo zami ngeenyembezi zakhe bewazesula ngeenhluthu zakhe.

⁴⁵ Akhange ungamukele ngokungincwanga emhlathini, kodwana umfazi lo, akhange alise ukuncwanga iinyawo zami solo ngingene lapha.

⁴⁶ Akhange ungizese ngamafutha ehloko, kodwana yena uthele iinyawo zami ngamakha.

⁴⁷ Yeke ngiyakutjela bona izono zakhe ezinengi zicolelwe ngombana utjengise ithando elikhulu. Kodwana ocolelwe kancani naye uthanda kancani.”

⁴⁸ UJesu wathi emfazini loyo: “Izono zakho zicolelwe.”

⁴⁹ Ezinye iinthekeli zathoma ukubuzana zathi: “Ngubani lo, ocolela ngitjho nezono?”

⁵⁰ UJesu wathi emfazini loyo: “Ukukholwa kwakho kukusindisile, khamba ngokuthula.”