ULUKASI 6 - IsiNdebele 2012 Translation

Umbuzo ngeSabatha

¹ Kwathi ngeSabatha uJesu warabhula hlangana namasimu wekoroyi. Abafundi bakhe bakha iinqwambi zekoroyi bazihlikihla ezandleni, bagoma.

² Abanye babaFarisi bambuza bathi: “Kubayini nenza okungasisemthethweni ngeSabatha na?”

³ UJesu wabaphendula wathi: “Azange khenifunde bona uDavida wenzani lokha yena nabakhambisani bakhe nabalambileko na?

⁴ Wangena ngekumbeni kaZimu, wathatha isikwa esahlukaniselweko, wagoma ebekuvunyelwe bona kugonywe baphristi kwaphela. Wanikela nabakhambisani bakhe bona bagome.”

⁵ Godu wathi kibo: “INdodana yoMuntu iyiKosi yeSabatha.”

Indoda yesandla esikokoreneko

⁶ Kwathi ngelinye iSabatha waya ngesinagogini wafundisa. Khonapho bekunomuntu obekakokorene isandla sangesigomeni.

⁷ AbaFarisi nabafundisi bomthetho bebafuna isizathu sokusola uJesu, yeke bamtjhejisisa bona akazukupholisa ngeSabatha nje na.

⁸ Kodwana uJesu wakwazi ebebakucabanga, wathi emuntwini okokorene isandla: “Sikima ujame ngaphambi kwawo woke umuntu.” Wasikima wayokujama lapho.

⁹ Yeke uJesu wathi kibo: “Akhe ngibuze, ngikuphi okusemthethweni ngeSabatha, ukwenza okuhle namkha okumbi, ukusindisa ipilo namkha ukuyitjhabalalisa na?”

¹⁰ Wabaqala boke, wathi emuntwini loyo: “Thabulula isandla sakho.” Wasithabulula, isandla sakhe sabuyela esigeni ngokupheleleko.

¹¹ Bathukuthela bebathoma ukubonisana bona bangenzani ngoJesu.

UJesu ukhetha abapostoli abalitjhumi nambili

¹² Ngelinye lamalanga lawo uJesu wenyukela entabeni wayokuthandaza, wahlala lapho ubusuku boke athandaza kuZimu.

¹³ Kwathi bona kuse, wabizela abafundi bakhe kuye, wakhetha abalitjhumi nambili, wababiza bona babapostoli:

¹⁴ Bona bekunguSimoni, amthiya bona nguPitrosi, nomfowabo u-Andrisi, uJakopo, uJwanisi, uFlebhe, uBharitholomeyusi,

¹⁵ uMatewu, uTomasi, uJakopo umsa ka-Alfiyosi, uSimoni ebekuthiwa mZelothe,

¹⁶ uJudasi umsa kaJakopo noJudasi Iskariyodi owathengisa uJesu.

UJesu uyafundisa abuye apholise

¹⁷ Wehla nabo, wajama endaweni ehlelembekileko. Bekunesiqubuthu esikhulu sabafundi bakhe lapho kanye nabantu abanengi abavela kilo loke leJudiya, eJerusalema kanye neligwini leTirosi neTsidoni

¹⁸ ebebezele ukumlalela nokobana abaphilise ezifeni zabo. Labo ebebatshwenywa mimoya emimbi bapholiswa.

¹⁹ Boke abantu balinga ukumkghwatha ngombana kuye bekuphuma amandla, abapholisa boke.

Iimbusiso

²⁰ UJesu waqala abafundi bakhe wathi kibo: “Nibusisiwe nina enidududu ngombana umbuso kaZimu ungewenu.

²¹ Nibusisiwe nina enilambileko gadesi ngombana nizakusuthiswa! Nibusisiwe nina enililako gadesi ngombana nizakuhleka!

²² “Nibusisiwe lokha abantu nabanihloyako, baninina bebanithuke, balahla amabizwenu bathi mambi ngebanga leNdodana yoMuntu!

²³ “Thabani mhlokho neqayeqe ngetokozo ngombana mkhulu umvuzo wenu ezulwini. Naboyisemkhulu babaphatha ngayo indlela le abaphorofidi.

²⁴ “Kodwana maye kini eninjingileko ngombana senikufumene ukunethezeka kwenu.

²⁵ Maye kini enisuthako gadesi ngombana nizokulamba. Maye kini enihlekako gadesi ngombana nizokulila nirhahlawule.

²⁶ “Maye kini lokha boke abantu bakhuluma kuhle ngani ngombana nabaphorofidi bamala babaphatha ngaleyondlela.”

Ukuthanda amanaba

²⁷ “Kodwana nina eningizwako ngithi kini: Thandani izitha zenu, nenze okulungileko kilabo abanizondako.

²⁸ Busisani abanithukako, nithandazele nalabo abaniphatha kumbi.

²⁹ Lokha umuntu nakuwahla emhlathini, mnikele nomunye umhlathi godu. Lokha omunye nakuthathela imbajakho, mlise athathe nejasakho.

³⁰ Yipha woke umuntu okukhombela okuthileko, begodu nanyana ngubani okuthathela ekungekwakho, ungamtjeli bona akubuyise.

³¹ Yenza kabanye njengombana nawe ungathanda bona benze kuwe.

³² “Nanithanda kwaphela labo abanithandako, kunisiza ngani lokho na? Ngitjho nezoni zithanda labo abazithandako!

³³ Nanenza okulungileko kilabo abalungileko kini, kunisiza ngani lokho na? Ngitjho nezoni zenza njalo!

³⁴ Naniboleka kwaphela labo enaziko bona bazakubuyisa, kunisiza ngani lokho na? Ngitjho nezoni ziyabolekana, bese zilindele ukubuyiselwa ngokuzeleko.

³⁵ Nje-ke nina thandani izitha zenu nizenzele okulungileko, zibolekeni ningafuni imbuyiselo. Yeke umvuzo wenu uzakuba mkhulu bese niba madodana wongoPhezulu ngombana yena ulungile kilabo abangathokoziko nabakhohlakeleko.

³⁶ Yibani nesirhawu njengombana noYihlo anesirhawu.”

Ningagwebi abanye

³⁷ “Ningagwebi ukuze nani ningagwetjwa. Ningalahli ukuze nani ningalahlwa. Colelani ukuze nani nicolelwe.

³⁸ Yiphani, nani nizakuphiwa. Isilinganiso esihle, esigandelweko, sakutluzwa besaphuphuma, sizakuthelwa ezandleni zakho. Ngambala isilinganiso osisebenzisa ukupha abanye, sizakusetjenziselwa ukupha wena.”

³⁹ Godu wabatjela umfanekiso lo: “Isiphofu singakhe sidose esinye na? Azizukuwela zombili njalo ngemgodini?

⁴⁰ Umfundi akasingaphezu komfundisakhe, kodwana woke obandulwe ngokuzeleko uzakuba njengomfundisakhe.

⁴¹ “Uqalelani itserana engelihlweni lakamfowenu, kodwana ungaboni isigodokazi esingelihlweni lakho na?

⁴² Ungatjho njani kumfowenu uthi, ‘Mfowethu, yithi ngikhuphe itserana ngelihlweni lakho,’ khisibe wena ubhalelwa kubona isigodokazi ngelihlweni lakho na? Wena mzenzisi ndina! Thoma ngokukhupha isigodokazi esingelihlweni lakhwelo qangi, yeke uzakukghona ukubona kuhle, ukghone ukukhupha itserana engelihlweni lomfowenu.”

Umuthi neenthelo zawo

⁴³ “Akunamuthi omuhle othela iinthelo ezimbi, namkha omumbi othela iinthelo ezihle.

⁴⁴ Ngilowo nalowo muthi waziwa ngeenthelo zawo. Abantu abakhi amakhiwani esitjhutheni sameva namkha amadiribe emeveni.

⁴⁵ Umuntu olungileko uveza okulungileko okuvela ngehliziywenakhe, ngokunjalo nomuntu omumbi uveza okumbi okuvela ngehliziywenakhe. Ngambala umlomo ukhuluma ukuphuphuma kwehliziyo.”

Abakhi bezindlu ababili

⁴⁶ “Ningibizelani nithi, ‘Kosi, Kosi,’ khisibe kanti anikwenzi enginitjela khona na?

⁴⁷ Ngizanikhombisa bonyana unjani loyo oza kimi bese ulalela amezwami awenze.

⁴⁸ Unjengendoda eyathi nayakha ikumbayo, yemba kwatjhinga yabese ibeka isisekelo phezu kwedwala. Kwathi nakufika iinkhukhula, zabetha phezu kwayo kodwana azange ziyinyakazise ngombana beyakhiwe kuhle.

⁴⁹ Kodwana ozwa amezwami angawenzi, unjengendoda eyakha ikumbayo equlwanini ngaphandle kwesisekelo. Kwathi nakufika iinkhukhula zayimadlha, yabhusuka, begodu kwaba kukhulu ukonakala kwayo.”