ULUKASI 5 - IsiNdebele 2012 Translation

UJesu ubiza abafundi bokuthoma

¹ Ngelinye ilanga uJesu asajame eqadi kwelwandle leGenesaretha, isiqubuthu safuhlezelana kuye kobana silalele ilizwi lakaZimu.

² Wabona imikhumbi emibili ijame eligwini lelwandle, ababambi beenhlambi bebahlikile kiyo, bahlanza amanedabo.

³ UJesu wakhwela ngakomunye wemikhumbi ekungewakaSimoni, wamkhombela bona atjhide kancani eligwini lelwandle. Yeke wahlala ngemkhunjini wafundisa isiqubuthu.

⁴ Kwathi bona aqede ukukhuluma, wathi kuSimoni: “Sunduzelani umkhumbakho phakatjhana, niphosele amanede wenu kobana nibambe.”

⁵ USimoni wamphendula wathi: “Kosi, sisebenze kabudisi ubusuku boke akhange khesibambe ilitho, kodwana ngombana utjho njalo, ngizawehlisa amanede.”

⁶ Kwathi bona benze njalo, babamba iinhlambi ezinengi kangangobana amanedabo athoma ukudabuka.

⁷ Yeke bakhwaya abangani babo abangemkhunjini omunye bona bazobasiza. Beza bebazalisa yomibili imikhumbi, yazala kangangobana yabe yafuna ukucwila.

⁸ Kwathi lokha uSimoni Pitrosi nabona lokho, wawa emadolweni kaJesu wathi: “Suka kimapha Kosi ngombana ngimumuntu osisoni!”

⁹ Yena nabanye agade anabo barareka kwamambala ngeenhlambi ezinengi abazibambileko.

¹⁰ Kwaba njalo nakuJakopo noJwanisi amadodana kaZebediya ababasebenzisani bakaSimoni. Yeke uJesu wathi: “Ungesabi, ukusukela namhlanjesi uzokubamba abantu.”

¹¹ Bakhuphela imikhumbabo eligwini batjhiya koke khonapho bamlandela.

UJesu upholisa indoda

¹² Kwathi ngelinye ilanga uJesu akomunye umuzi, kweza indoda ebegade ikghamathelwe likhwekhwe. Yathi ingabona uJesu, yaguqa yahloma ihloko phasi beyamrabhela yathi: “Kosi, nawuthandako ungangihlambulula!”

¹³ UJesu wathabulula isandla sakhe wakghwatha indoda leyo wathi: “Ngiyathanda, hlambuluka!” Khonokho ikhwekhwe lasuka kiyo.

¹⁴ UJesu wayiyala wathi: “Ungatjeli namunye, kodwana khamba ulunge kumphristi akuhlolisise bewenze umhlabelo njengokutjho kwakaMosi mayelana nokuhlanjululwa kwakho, kube bufakazi kibo.”

¹⁵ Kodwana kwanjesi iindaba ngoJesu zanda khulu, iinqubuthu ezinengi bezibuthelelana kobana zimlalele bezipholiswe emagulwenazo.

¹⁶ Kodwana begade aphele atsomuka aye emmangweni ayokuthandaza.

UJesu upholisa umuntu orhwahlapheleko

¹⁷ Kwathi ngelinye ilanga uJesu asafundisa, abaFarisi nabafundisi bomthetho bebahlezi eduze nalapho, bavela kiyo yoke imizi yeGalile, eJudiya neJerusalema, amandla kaSomnini gade anaye kobana apholise.

¹⁸ Khonapho kweza amadoda athwele umuntu orhwahlapheleko ngomkghadi, alinga ukumngenisa ngekumbeni kobana ambeke phambi kwakaJesu.

¹⁹ Kodwana kwathi nabhalelwa kungena ngebanga lesiqubuthu, akhwela phezu kwephahla, avula itjhuba, amehlisela ngaphakathi ngomkghadi hlangana nesiqubuthu, afese ambeka phambi kwakaJesu.

²⁰ UJesu wathi nabona ukukholwa kwawo wathi: “Mngani, izono zakho zicolelwe.”

²¹ Abafundisi bomthetho nabaFarisi bathoma ukuzindlekela bathi: “Ngubani umrhali ohlambalazako lo? Ngubani ongacolela izono ngaphandle kwakaZimu na?”

²² UJesu bekayazi imikhumbulwabo, wathi kibo: “Nizindlelani ngezinto ezinje na?

²³ Ngikuphi okulula ukuthi, ‘Izono zakho zicolelwe,’ namkha ukuthi, ‘Vuka ukhambe’ na?

²⁴ Nokho-ke ngizanikhombisa bonyana iNdodana yoMuntu inamandla ephasinapha wokucolela izono.” Yeke wathi emuntwini orhwahlapheleko: “Ngithi kuwe, vuka uthathe umkghadi wakho ukhambe, uye ekhaya!”

²⁵ Khonokho umuntu loyo wavuka phambi kwabo boke, wathatha umkghadi agade alele kiwo waya ekhaya, adumisa uZimu.

²⁶ Boke barareka kwamambala, badumisa uZimu banokwesaba bathi: “Namhlanje khona sibone amabono!”

UJesu ubiza uLevi

²⁷ Ngemva kwalokho uJesu waphumela ngaphandle, wabona umthelisi, ibizo lakhe linguLevi ahlezi ngendlwanenakhe yokuthelisela. UJesu wathi kuye: “Ngilandela.”

²⁸ ULevi wasikima, watjhiya koke, wamlandela.

²⁹ Yeke uLevi wenzela uJesu imbedla yesidlo kwakhe, khonapho begade kunesiqubuthu sabathelisi kanye nabanye abantu ebebagoma nabo.

³⁰ Kodwana abaFarisi nabafundisi bomthetho ebebangebesiqubuthu sabo, banghonghoyila ebafundini bakhe bathi: “Nigomelani benisele nabathelisi nezoni na?”

³¹ UJesu wabaphendula wathi: “Akusibo abaphilileko abadinga inyanga, kodwana ngabagulako.

³² Angikezi ukuzokubiza abalungileko, kodwana ngizokubiza izoni bona zitjhuguluke.”

Umbuzo ngokuzila ukudla

³³ Abanye abantu bathi kuJesu: “Abafundi bakaJwanisi bazila njalonjalo ukudla bathandaze, nabafundi babaFarisi nabo benza njalo, kodwana bakho abafundi bayagoma, bayasela.”

³⁴ UJesu wabaphendula wathi: “Nitjho bona kungenzeka abantu emtjhadweni bazile umyeni asesenabo na? Awa, angekhe!

³⁵ Kodwana lizakufika ilanga mhlana umyeni azakususwa hlangana nabo, mhlokho bazakuzila ukudla.”

³⁶ UJesu wabatjela umfanekiso lo: “Akakho ongadabula isitjheza sesambatho esitjha, ayokutjheza isambatho esidala. Nangakwenza lokho, uzabe udabule isambatho esitjha, nje-ke isitjheza esitjha angekhe safanela isambatho esidala.

³⁷ Nanjalo-ke akakho ongathela iwayini elitjha ngeenkhwameni zesikhumba ezidala. ngombana iwayini elitjha lizazirathula iinkhwama, iwayini liphalake, iinkhwama zonakale.

³⁸ Endaweni yalokho iwayini elitjha kufanele lithelwe eenkhwameni ezitjha.

³⁹ Begodu akakho ofuna iwayini elitjha, nakhe wasela elidala phele athi: ‘Elidala limnandi.’ ”