ULUKASI 4 - IsiNdebele 2012 Translation

Ukulingwa kwakaJesu

¹ UJesu wabuya eJordani azele uMoya oCwengileko, wamdosela erhalawumbeni

² lapho alingwa khona nguSathana amalanga amatjhumi amane. Azange agome ilitho emalangeni lawo, kwathi ekupheleni kwawo, walamba.

³ USathana wathi kuye: “Nakube uyiNdodana kaZimu, tjela amatje la aphenduke isikwa.”

⁴ UJesu waphendula wathi: “Kutloliwe kwathiwa, ‘Umuntu akaphili ngesikwa kwaphela.’ ”

⁵ Yeke uSathana wamkhuphulela ekuphakameni, wamtjengisa yoke imibuso yephasi ngokuphazima kwelihlo.

⁶ Wathi kuye: “Ngizakunikela boke ubuphaziphazi bayo kanye nawo woke amandla ngombana kusezandleni zami. Koke lokhu ngingakunikela nanyana ngubani ngendlela engifuna ngayo.

⁷ Yeke nawungangilotjha, koke lokhu kuzakuba ngekwakho.”

⁸ UJesu wamphendula wathi: “Kutloliwe kwathiwa, “ ‘Thandaza uSomnini uZimakho, ulotjhe yena yedwa!’ ”

⁹ Yeke uSathana wamthatha wamusa eJerusalema, wamjamisa esiqongolweni sethempeli, wathi kuye: “Nakube uyiNdodana kaZimu, ziphosele phasi lapha,

¹⁰ ngombana kutloliwe kwathiwa, “ ‘Uzakuyala iingilozi zakhe ngawe kobana zikulonde.’

¹¹ “Godu kwathiwa, “ ‘Zizakuthwala ngezandla zazo ukuze inyawo lakho lingakhutjwa lilitje.’ ”

¹² Kodwana uJesu wamphendula wathi: “Kutloliwe kwathiwa, “ ‘Ungamlingi uSomnini uZimakho.’ ”

¹³ Kuthe bona uSathana aqede ngazo zoke iinlingo zakhe, wamgadunga isikhatjhana.

UJesu uthoma umsebenzi wakhe eGalile

¹⁴ UJesu wabuyela eGalile ngamandla kaMoya oCwengileko. Iindaba ngaye zarhatjheka kiyo yoke inarha yakhona.

¹⁵ Wafundisa ngemasinagoginabo, wadunyiswa ngiwo woke umuntu.

UJesu uyaninwa eNazaretha

¹⁶ UJesu waya eNazaretha, lapha akhulela khona. Kwathi ngeSabatha waya ngesinagogini njengombana bekajayele ukwenza. Wasikima kobana afunde imitlolo ecwengileko.

¹⁷ Wanikelwa umtlolo womphorofidi u-Isaya. Wawuthabulula, wafumana lapha kuthi:

¹⁸ “UMoya kaSomnini uphezu kwami ngombana ungizesile kobana ngilethe iindaba ezimnandi kabadududu. Ungithume bona ngizokumemezela ukuthukululwa kwabathunjiweko, ukubona kwabaphopheleko, ukuthukululwa kwabagandelelweko

¹⁹ nokumemezela umnyaka wesisa sakaSomnini.”

²⁰ Yeke wasonga umtlolo, wawubuyisela kugosa, wahlala phasi. Woke amehlo walabo ebebangesinagogini anamathela kuye.

²¹ Wathoma ngokuthi kibo: “Namhlanjesi umtlolo lo uzalisekile eendlebeni zenu.”

²² Boke bakhuluma kuhle ngaye begodu bebararekile ngamezwi anesisa esingako aphuma emlonyenakhe. Bathi: “Akusuye umsa kaJosefa na?”

²³ Wathi kibo: “Kwamambala nizakutjho isitjhwesi kimi nithi, ‘Nyanga, yewuzelaphe!’ godu nithi, ‘Yenza khona ekhenwapha owasenza eKapernawumi.’ ”

²⁴ UJesu waraga wathi: “Ngiqinisile ngiyanitjela bona akunamphorofidi owakhe wamukeleka enarheni yekhabo.

²⁵ Kodwana iqiniso kukobana bekunabahlolokazi abanengi kwa-Israyeli ngesikhathi saka-Eliya, lokha izulu nalizakuvaleka iminyaka emithathu nesiquntu; kwaba nendlala ekulu phezu kwayo yoke inarha.

²⁶ Khonapho u-Eliya azange athunywe ngitjho nakoyedwa wabo kwaphela emhlolokazini weSarephitha eseTsidoni.

²⁷ Bekunabantu abanengi kwa-Israyeli ebebaphethwe likhwekhwe ngesikhathi somphorofidi u-Eliya, kodwana akakho noyedwa wabo owapholiswako ngaphandle koNamani umSiriya.”

²⁸ Kwathi lokha nabezwa lokho, boke abantu abangesinagogini, babibhelana.

²⁹ Basikima, bamkhuphela ngaphandle kwedorobho, bamusa ekuthulameni kwentatjana lapha bekwakhiwe khona idorobho, kobana bamsunduzele ngerharheni.

³⁰ Kodwana wangena hlangana nesiqubuthu wazikhambela.

Indoda enommoya omumbi

³¹ Yeke uJesu wehlela eKapernawumi ebekulidorobho leGalile, wafundisa khona abantu ngeSabatha.

³² Boke bamangala ngefundiswakhe ngombana umyalezwakhe bewunamandla.

³³ Ngesinagogini bekunomuntu onedimoni, okutjho ummoya osilapheleko. Warhuwelela khulu wathi:

³⁴ “Hlukana nathi! Unandabani nathi wena Jesu weNazaretha na? Uze ukuzosirhayila na? Ngiyakwazi bona ungubani, ungoCwengileko kaZimu.”

³⁵ UJesu wawukhalimela wathi: “Thula! Phuma kuye!” Yeke idimoni ladula umuntu loyo phasi phambi kwabo boke, laphuma ngaphandle kokumkhubaza.

³⁶ Boke abantu barareka babuzana bathi: “Lilizwi bani-ke leli? Ngegunya nangamandla, uyala imimoya emimbi bese iyaphuma!”

³⁷ Kwanda idumo ngaye kiyo yoke indawo esifundeneso.

UJesu upholisa abantu abanengi

³⁸ UJesu waphuma ngesinagogini waya emzini kaSimoni. Yeke umkhwekazi kaSimoni gade aphethwe mgomani onamandla. Bakhombela uJesu kobana amsize.

³⁹ Wamengama wabese ukhalimela umgomani, ngambala waphuma kuye. Wavuka khonokho, wabatenda.

⁴⁰ Kwathi bona kutjhinge ilanga boke abantu baletha kuJesu abagulako abanezifo ezihlukeneko. Wabeka izandla phezu komunye nomunye wabo, wabapholisa.

⁴¹ Amadimoni aphuma ebantwini abanengi, arhuwelela asithi: “Wena uyiNdodana kaZimu!” Kodwana wawakhalimela, wangawavumela bona akhulume ngombana gade amazi bona unguKrestu.

UJesu utjhumayela ngesinagogini

⁴² Kwathi nakusako uJesu waphuma, waya emmangweni. Isiqubuthu samfuna besayokufika lapha akhona, salinga ukumvimba bona angakhambi.

⁴³ Kodwana wathi kiso: “Kufanele ngitjhumayele iindaba ezimnandi ngombuso kaZimu nakezinye iindawo ngombana ngithunyelwe khona lokho.”

⁴⁴ Yeke waragela phambili watjhumayela ngemasinagogini eJudiya.