ULUKASI 3 - IsiNdebele 2012 Translation

Ukutjhumayela kwakaJwanisi uMbhabhadisi

¹ Ngomnyaka wetjhumi nahlanu wokubusa kombusi omkhulu uTibheriyasi, uPontiyasi Pilatu gade ambusi weJudiya, uHerode yena angumtetrarerhesi wesifunda seGalile, umfowabo uFlebhe angumtetrarerhesi wesifunda se-Ithuriya kanye neTrakoniti, uLisaniya angumtetrarerhesi wesifunda se-Abileni.

² U-Anasi noKhayafasi bona bebabaphristi abakhulu. Ngesikhatheso ilizwi lakaZimu lafika kuJwanisi, umsa kaZakariya, aserhalawumbeni.

³ Wakhamba yoke inarha magegana neJordani, atjhumayela umbhabhadiso wokuphenduka mayelana nokucolelwa kwezono.

⁴ Njengombana kutloliwe encwadini yamezwi womphorofidi u-Isaya nakasithi: “Ilizwi lorhuwelela erhalawumbeni, lithi: ‘Lungisani indlela yeKosi; yenzeleni indlelakhe enqophileko.

⁵ Yoke imirhoba kumele ihlelenjwe, zoke iintaba nemibundu zibe libhabhadu; iindawo ezimigodigodi zenziwe itatawu neziziindunduma zilelezwe.

⁶ Boke abantu bazakubona isindiso kaZimu.’ ”

⁷ UJwanisi wakhuluma neenqubuthu zabantu ezeza kuye bona azozibhabhadisa, wathi: “Nina nzalo yeenyoka ndina! Ngubani onitjele bona nibalekele ubukhali obuzako na?

⁸ Vezani isithelo esikhambisana nokuphenduka kwenu. Ningathomi nizitjele nithi, ‘Sino-Abrahamu ongubabethu’ ngombana ngiyanitjela bona uZimu angavusela u-Abrahamu abantwana ematjeni la.

⁹ Izembe selibekiwe emirajini yemithi, nje-ke woke umuthi ongatheli iinthelo uzokugawulwa, uphoselwe emlilweni.”

¹⁰ Isiqubuthu sambuza sathi: “Alo-ke kufanele senze njani na?”

¹¹ Waphendula wathi: “Loyo onezambatho ezimbili akabelane naloyo onganalitho, naloyo onokudla enze njalo.”

¹² Nabathelisi beza kobana bazokubhajadiswa, bambuza bathi: “Mfundisi, alo, kufuze senzeni na?”

¹³ Wabaphendula wathi: “Ningathelisi ngaphezu kokufaneleko.”

¹⁴ Nje-ke namanye amajoni ambuza athi: “Kumele senzeni na?” Waphendula wathi: “Ningemuki umuntu imali godu ningasoleli abantu ngokungekho. Yaneliswani ngomrholo wenu.”

¹⁵ Abantu bebalinde ngethemba, bararekile eenhliziyweni zabo bona kghani uJwanisi lo angaba nguKrestu na.

¹⁶ Yeke, uJwanisi wathi kibo boke: “Nginibhabhadisa ngamanzi kodwana ukhona ozako onamandla khulu kunami, engingakafaneli ukutjhaphulula amapatlagwanakhe. Yena uzanibhabhadisa ngoMoya oCwengileko nangomlilo.

¹⁷ Uphethe iforogwakhe yokwela kobana ahlwengise iselelo sakhe nokubuthelela ikoroyi ayifake ngesilulwini sakhe, kodwana uzokutjhisa iinhluba ngemlilweni ongekhe wacima.”

¹⁸ Ngamezwi ahlukahlukeneko wokuyelelisa, uJwanisi watjhumayela iindaba ezimnandi ebantwini.

¹⁹ Kodwana kwathi lokha uJwanisi nasola uHerode umtetrarerhesi, ngokungena kwakhe uHerodiya umkamfowabo, nangakho koke okumbi akwenzileko,

²⁰ wenza okungaphezu kwalokho, wavalela uJwanisi ngesikhungweni.

Ukubhajadiswa kwakaJesu

²¹ Ngemva kobana boke abantu sebabhajadisiwe, uJesu naye wabhajadiswa. Kwathi asathandaza, izulu lavuleka.

²² UMoya oCwengileko wehlela kuye ngesibumbeko sezuba. Khonapho kwavela ilizwi ezulwini lisithi: “Wena uyiNdodanami ethandekako. Ngeneme ngawe.”

Abokhokho bakaJesu

²³ UJesu begade aneminyaka ematjhumi amathathu lokha nathoma umsebenzakhe. Ngokwemicabango yabantu, begade amsa kaJosefa omsa ka-Eli,

²⁴ umsa kaMathati omsa kaLevi, umsa kaMelirhi omsa kaJanayi, umsa kaJosefa

²⁵ omsa kaMatathiyasi, umsa ka-Amosi omsa kaNawumi, umsa ka-Esili omsa kaNagayi,

²⁶ umsa kaMathi omsa kaMatathiyasi, umsa kaSimeyini omsa kaJoserha, umsa kaJoda

²⁷ omsa kaJowanani, umsa kaResa omsa kaZerubhabheli, umsa kaTjhaltiyeli omsa kaNeri,

²⁸ umsa kaMelirhi omsa ka-Adi, umsa kaKosamu omsa ka-Elimadamu, umsa ka-Eri

²⁹ omsa kaJotjhuwa, umsa ka-Eliyezeri omsa kaJorima, umsa kaMathati omsa kaLevi

³⁰ umsa kaSimiyoni omsa kaJuda, umsa kaJosefa omsa kaJonamu, umsa ka-Eliyakimu

³¹ omsa kaMeleya, umsa kaMena omsa kaMatatha, umsa kaNathani omsa kaDavida,

³² umsa kaJese omsa ka-Obede, umsa kaBhowazi omsa kaSala, umsa kaNarhitjhoni

³³ omsa ka-Aminadaba, umsa ka-Adimini omsa ka-Areni, umsa kaHesromu omsa kaPerezi, umsa kaJuda

³⁴ omsa kaJakopo, umsa ka-Isaka omsa ka-Abrahamu, umsa kaTerarhi, omsa kaNarhori,

³⁵ umsa kaSerugu omsa kaRewu, umsa kaPelegi omsa ka-Ebhere, umsa kaTjhelarhi

³⁶ omsa kaKenamu, umsa ka-Aripakitjhadi omsa kaTjhemu, umsa kaNowa omsa kaLemeki,

³⁷ umsa kaMetutjhelarhi omsa ka-Inogo, umsa kaJeredi omsa kaMahalaleli, umsa kaKhenani

³⁸ omsa ka-Enotjhi, umsa kaSethi omsa ka-Adamu, umsa kaZimu.