ULUKASI 24 - IsiNdebele 2012 Translation

Ukuvuka kwakaJesu

¹ Elangeni lokuthoma leveke, ngovivi, abafazi bathatha amakha ebebawalungisile, baya ethuneni.

² Bafumana ilitje ebelivale ithuna ligediwe,

³ kodwana nabangenako, azange basifumane isidumbu seKosi uJesu.

⁴ Kwathi basararekile ngalokho, khonapho kwaba khona amadoda amabili embethe izambatho eziphazima njengombani ajame hlanu kwabo.

⁵ Ngokwesaba okukhulu, abafazi bahloma iinhloko phasi, kodwana amadoda lawo athi kibo: “Nifunelani ophilako hlangana nabafileko na?

⁶ Akakho lapha, uvukile! Khumbulani bona wathini kini lokha nasese nani eGalile.

⁷ Angithi wathi, ‘INdodana yoMuntu kufanele inikelwe ezandleni zezoni, ibethelwe esiphambanweni, kuthi ngelanga lesithathu ivuke.’ ”

⁸ Yeke bakhumbula amezwakhe.

⁹ Bathi nababuya ethuneni, batjela abafundi abalitjhumi nanye kanye nabanye zoke iindabezi.

¹⁰ Begade kunguMariya Magdalina, uJwana, noMariya unina kaJakopo kanye nabanye abatjela abapostoli iindabezi.

¹¹ Kodwana abapostoli azange bakholwe abafazaba ngombana kibo amezwabo azwakala kuyintolwani nje kwaphela.

¹² Nanyana kunjalo, uPitrosi weqa wagijimela ethuneni. Wafika wagugubala, wabona itjhila lilodwa linganamuntu. Wabuyela emuva ararekile ngokwenzekileko.

Ikhambo eliya e-Emawusi

¹³ Yeke khona mhlokho abalandeli ababili bakaJesu gade basiya emzini ebekuthiwa yi-Emawusi, kulibanga elingaba makhilomitha alitjhumi nanye ukusuka eJerusalema.

¹⁴ Bebakhamba bakhuluma ngakho koke okwenzekileko.

¹⁵ Kwathi basakhuluma njalo babonisana ngezintwezi, uJesu ngokwakhe watjhidela wakhambisana nabo;

¹⁶ kodwana kwafihleka kibo kobana bamazi.

¹⁷ UJesu wathi kibo: “Nikhulumisana ngani ekhambeni lenweli na?” Bajama, ubuso babo bukhathazekile.

¹⁸ Omunye wabo ebekuthiwa nguKleyopasi, wambuza wathi: “Senguwe kwaphela isikhambi lapha eJerusalema esingaziko ngezinto ezenzeke lapha amalangana la na?”

¹⁹ Wabuza wathi: “Zizinto bani lezo?” Bamphendula bathi: “Zizinto ezenzeka kuJesu weNazaretha. Begade amphorofidi, anamandla ngelizwi nangezenzo phambi kwakaZimu nebantwini boke.

²⁰ Abaphristi abakhulu nababusi bamnikela kobana agwetjelwe ukufa, yeke bambethela esiphambanweni.

²¹ Kodwana besinethemba lokobona ungiloyo ozokuhlenga u-Israyeli. Okukhulu-ke kukuthi sele kulilanga lesithathu kwenzekile lokhu.

²² Phezu kwalokho abafazi besiqhema sethu basimangazile. Baye ethuneni ngamasa ekuseni nje

²³ kodwana akhange bafunyane umzimbakhe. Babuyile-ke bazositjela bona babone umbono weengilozi ezibatjele bona uvukile, uyaphila.

²⁴ Yeke abanye besiqhema sethu bayile ethunenapho, bafumana kunjengombana abafazi bebatjhwile, kodwana yena azange bambone.”

²⁵ Yeke uJesu wathi kibo: “Maye niziindlhayela kangangani! Nibuthaka eenhliziyweni ukukholwa koke okwakhulunywa baphorofidi!

²⁶ Kanti uKrestu ubekangakafaneli adlule emtlhagweni lo ngemva kwalapho-ke angene ephazimulwenakhe na?”

²⁷ Yeke uJesu wabahlathululela bona kwathiwani ngaye kiyo yoke imitlolo ecwengileko, kusukela emthethweni kaMosi nakiyo yoke imitlolo yabaphorofidi.

²⁸ Kuthe nasele batjhidele emzini ogade beze kiwo, uJesu wenza sengathi udlulela phambili.

²⁹ Kodwana bamrabhela bathi: “Hlala nathi, qala sekuhlwile. Ilanga selitjhingile.” Yeke wangena, wahlala nabo.

³⁰ Kwathi nasetafuleni kanye nabo wathatha isikwa, wathokoza uZimu, wasihlephula wabapha.

³¹ Yeke amehlwabo avuleka, khonapho bamazi, kodwana wanyamalala emehlwenabo.

³² Babuzana bathi: “Iinhliziyo zethu bezingavuthi ngaphakathi kwethu lokha nakhuluma nathi endleleni nazasihlathululela imitlolo na?”

³³ Basikima khonokho babuyela emuva eJerusalema. Lapho bafumana abafundi abalitjhumi nanye nalabo ebebanabo bahlangene ndawonye

³⁴ basithi: “Kuliqiniso! IKosi ivukile beyazibonakalisa kuSimoni.”

³⁵ Yeke ababili bademba ngalokho okwenzeke endlelenabo nangendlela amehlwabo avuleke ngakhona lokha uJesu nahlephula isikwa.

UJesu uzibonakalisa ebafundini bakhe

³⁶ Kwathi nabasakhuluma ngezintwezi, uJesu ngokwakhe wajama hlangana nabo wathi kibo: “Ukuthula akube nani!”

³⁷ Barareka bethukile, badlumbana bona babona isipuku.

³⁸ Kodwana wathi kibo: “Nikhathazekeleni na? Kubayini kuvuka ukuzaza emikhumbulweni yenu na?

³⁹ Qalani izandla zami neenyawo zami. Ngimi ngenyama! Ngikghwathani nizizwele ngokwenu, isipuku asinanyama namathambo njengombana nibona nje.”

⁴⁰ Wathi bona atjho njalo, wabatjengisa izandla neenyawo zakhe.

⁴¹ Kwathi khonapho bangakakholwisisi ngebanga lethabo nokurareka, wababuza wathi: “Ninakho okugonywako lapha na?”

⁴² Yeke bamupha isiqana sehlambi ebasiweko,

⁴³ wasithatha wasigoma phambi kwabo.

⁴⁴ Wathi kibo: “Lezi zizinto enganitjela zona ngisesenani. Zoke izinto ezitlolwe ngami emthethweni kaMosi nemitlolweni yabaphorofidi kanye nakumaRhubo, zimele zizaliseke.”

⁴⁵ Yeke waqaqulula imikhumbulwabo ukuze bazwisise imitlolo.

⁴⁶ Wathi kibo: “Nakhu okutloliweko: UKrestu uzokutlhaga bese avuke kabafileko elangeni lesithathu.

⁴⁷ Nje-ke kuzokutjhunyayelwa ukuphenduka nokuthethelelwa kwezono ebizweni lakhe kizo zoke izizwe, ukuthoma eJerusalema.

⁴⁸ Nina nibofakazi bezintwezi.

⁴⁹ Ngizonithumela lokho uBaba akwethembisileko. Kodwana hlalani ngedorobheni kufikela lapha nembeswa khona ngamandla avela phezulu.”

UJesu unyukela ezulwini

⁵⁰ Waphuma nabo baya endaweni yeBhethaniya, waphakamisa izandla, wababusisa.

⁵¹ Kwathi asababusisa njalo, waphuma hlangana nabo wanyuselwa ezulwini.

⁵² Bamlotjha, babuyela emuva eJerusalema ngethabo elikhulu.

⁵³ Bahlala soke isikhathi ngethempelini, badumisa uZimu.