ULUKASI 23 - IsiNdebele 2012 Translation

UJesu ulethwa phambi koPilatu

¹ Yeke, woke umkhambathi wasikima, wamdosela kuPilatu.

² Bathoma ukumsola ngomlandu bathi: “Sifumene umuntu lo akhohlisa isizwe sekhethu. Ujamelene nokukhokhwa komthelo wombusi omkhulu, begodu ukhamba azitjho bona yena unguKrestu.”

³ UPilatu wambuza wathi: “Uyikosi yamaJuda na?” UJesu wamphendula wathi: “Iye, kunjengombana usitjho.”

⁴ Yeke uPilatu wathi kumphristi omkhulu nesiqubuthwini: “Angisifumani isizathu sokuthwesa indoda le umlandu.”

⁵ Kodwana baphikelela bathi: “Idlhadlhabalisa abantu kilo loke leJudiya ngefundiswayo le. Ithome le eGalile kwanjesi sele ilapha.”

UJesu usiwa kuHerode

⁶ Ekuzweni kwakhe lokho, uPilatu wabuza bona umuntu lo mGalile na?

⁷ Kwathi bona alemuke bonyana uJesu bekangaphasi kwelawulo lakaHerode, wamthumela kuHerode ogade aseJerusalema isikhatheso.

⁸ UHerode wathaba kwamambala lokha nabona uJesu ngombana besele kusikhathi eside amfuna. Ukuya ngalokho ebekakuzwe ngaye, begade anethemba lokobana uzambona asenza imikarisomraro.

⁹ Yeke uHerode wabuzabuza uJesu imibuzo eminengi, kodwana akhange amphendule.

¹⁰ Abaphristi abakhulu nabafundisi bomthetho bebajame ubuhlomohlomo lapho basola uJesu kumbi ngomlandu.

¹¹ UHerode namajoni wakhe bahlekisa ngaye bebamphoqa. Bamembathisa ingubo ehle, bambuyisela kuPilatu.

¹² Mhlokho uHerode noPilatu baba bangani, ngaphambi kwalokho gade bazizitha.

UJesu ugwetjwa ukufa

¹³ UPilatu wabizela ndawonye abaphristi abakhulu, ababusi kanye nabantu,

¹⁴ wathi kibo: “Ningilethele umuntu lo, nathi utjitjizela abantu bona bahlubuke. Yeke ngimhlolisisile phambi kwenu noke, angisifumani isizathu sokumsola kwenu ngomlandu.

¹⁵ NoHerode azange amfumane amlandu ngombana nakhu umbuyisele kithi. Njengombana nani nibona nje, umuntu lo akakenzi ilitho bonyana angabulawa.

¹⁶ Ngalokho ngizakuthi akarithwe bese ngiyamtjhaphulula.”

¹⁷ Ubegade akatelelekile bona abatjhaphululele isibotjhwa sinye njalo ngomnyanya wePhasika.

¹⁸ Isiqubuthu soke sarhuwelela ngalizwi linye sathi: “Yewusisusele thina ngomuntu lo! Sitjhaphululela uBharabhasi!”

¹⁹ UBharabhasi bekadlhunywe ngesikhungweni ngebanga lomguruguru obegade ungedorobheni kanye nokubulala.

²⁰ UPilatu bekafuna ukuthukulula uJesu, yeke wakhuluma nesiqubuthu godu.

²¹ Kodwana salokhu sirhuwelela sisithi: “Mbethele! Mbethele esiphambanweni!”

²² Wakhuluma nabo ihlandla lesithathu wathi: “Kubayini? Ngibuphi ubelelesi abenzileko na? Azange ngifunyane kuye iinzathu zokumgweba isigwebo sokufa! Yeke ngizakuthi akabethwe bese ngimtjhaphulule.”

²³ Kodwana ngokurhuwelela okukhulu bathi akabethelwe esiphambanweni, yeke ukurhuwelela kwabo kwaphumelela.

²⁴ UPilatu waqunta ukubanikela abakufunako.

²⁵ Watjhaphulula umuntu obegade afakwe ngesikhungweni ngebanga lokubanga umguruguru nokubulala, yena loyo abambawileko, wanikela uJesu entandwenabo.

UJesu ubethelwa esiphambanweni

²⁶ Kwathi nabakhamba naye njalo, bahlangana noSimoni weSirene, ebegade asiya ngemzini avela ngaphandle. Bathatha isiphambano bamthwesa sona kobana alandele uJesu.

²⁷ Isiqubuthu esikhulu sabantu samlandela, kukhona nabafazi ebebalila bamrhahlawulela.

²⁸ UJesu waphendukela ngakibo wathi: “Madodakazi weJerusalema! Ningangilileli, kodwana zilileleni nina nabantwabenu.

²⁹ Mbala isikhathi siyeza lapha nizakuthi khona, ‘Babusisiwe abafazi abaziinyumba, iimbeletho ezingazange zibelethe, namabele angazange amunyise!’

³⁰ Yeke “bazokuthi eentabeni, ‘Sigubuzesani!’ bese bathi emibundwini, ‘Sigirikelani!’

³¹ “Nakube abantu benza lokhu emthini omanzi, kuzakwenzakani-ke kowomileko na?”

³² Amadoda amanye amabili ebegade aziinlelesi, nawo athathwa kanye naye kobana ayokubulawa.

³³ Kwathi nabafika endaweni ekuthiwa liKhakhayi, bambethela lapho kanye neenlelesi. Esinye ngesidleni, esinye ngesinceleni.

³⁴ UJesu wathi: “Baba, balibalele ngombana abakwazi abakwenzako.” Bahlukaniselana izambatho zakhe ngokwenza ifumbe.

³⁵ Abantu bajama, babukela. Nakubabusi bona bebamphoqa nokumphoqa bathi: “Wasindisa abanye, akazisindise-ke nakube mbala unguKrestu kaZimu, ongoKhethiweko.”

³⁶ Amajoni nawo akhuphuka, afese amphoqa. Amnikela iwayini elinesibharha

³⁷ athi kuye: “Nakube uyikosi yamaJuda, zisindise!”

³⁸ Ngehla kwakhe bekutlolwe amezwi la: LE YIKOSI YAMAJUDA.

³⁹ Esinye seenlelesi ebesibethelwe lapho samthela ngeenhlamba sathi: “AwusinguKrestu na? Zisindise bese usindisa nathi!”

⁴⁰ Esinye iselelesi sasikhalimela sathi: “Awumesabi uZimu na? Angithi nawe ulapho nje ngesigwebo esifanako?

⁴¹ Thina sibethwa ngokusifaneleko ngokwezenzo zethu. Kodwana indoda le ayikenzi ilitho elimbi.”

⁴² Yeke sathi kuJesu: “Jesu, ungikhumbule nawufika embuswenakho!”

⁴³ UJesu wathi kiso: “Ngiqinisile ngiyakutjela bona namhlanjesi uzakuba nami ePharadesi.”

Ukufa kwakaJesu

⁴⁴ Besele kuyisimbi yetjhumi nambili emini, ubumnyama bembatha yoke inarha bekwaba yisimbi yesithathu ngemva kwedina

⁴⁵ ngombana ilanga lafiphala. Kwathi irharideni lethempeli latlebhuka phakathi.

⁴⁶ UJesu warhuwelela khulu wathi: “Baba, nginikela umphefumulwami ezandleni zakho!” Wathi bona atjho njalo, wahlongakala!

⁴⁷ Umphathimabutho wathi nabona okwenzekileko, wadumisa uZimu, wathi: “Kwamambala umuntu lo bekalungile!”

⁴⁸ Kwathi bona boke abantu ebegade babuthene lapho ukuzokubukela, babone okwenzekileko, bathwala imikhono ehloko, baphadlhalala.

⁴⁹ Kodwana boke ebegade bamazi, nabafazi abamlandelako bavela eGalile, bajamela kude, babukela koke lokhu kusenzeka.

Ukubulungwa kwakaJesu

⁵⁰ Bekunendoda ebekuthiwa nguJosefa, alilunga lesigungu begodu ayindoda elungileko neqotho.

⁵¹ Yena akazange azihlanganise nesiqunto kanye nesenzo sabo. Bekavela eJudiya edorobheni le-Arimathiya, alindele umbuso kaZimu.

⁵² Waya kuPilatu wayokubawa isidumbu sakaJesu.

⁵³ Yeke wasethula isidumbu sakaJesu, wasiphuthela ngetjhila, wasibulunga ngethuneni ebelikghedlhwe edwaleni ebelingazange lisetjenziswe.

⁵⁴ Bekulilanga lokulungiselela iSabatha ebesele lizokuthoma.

⁵⁵ Abafazi ebegade beze noJesu basuka eGalile balandela uJosefa, babona ithuna nangendlela umzimba kaJesu bewulaliswe ngakhona kilo.

⁵⁶ Yeke babuyela ekhaya bayokulungisa amakha wokuzesa isidumbu sakhe. Kodwana baphumula ngeSabatha njengokutjho komyalo.