ULUKASI 22 - IsiNdebele 2012 Translation

Amasu wokubulala uJesu

¹ Nje-ke umnyanya wesiKwa esinganaNgumelo ebekuthiwa yiPhasika besele utjhidele.

² Abaphristi abakhulu nabafundisi bomthetho bebafuna indlela yokususa uJesu ngombana begade besaba abantu.

³ Kodwana uSathana wangena kuJudasi okuthiwa ngu-Iskariyodi, ongomunye wabafundi abalitjhumi nambili.

⁴ Yena wakhamba wayokukhuluma nabaphristi abakhulu neenkhulu zethempeli bona angamkhaphela njani uJesu.

⁵ Bathaba kwamambala, bavuma bona bazamkhokhela.

⁶ UJudasi wakuvuma lokho, wathoma ukufuna ithuba lokunikela ngoJesu kibo, isiqubuthu singekho.

UJesu uzilungisela ukugoma iPhasika

⁷ Lafika-ke ilanga lomnyanya wesiKwa esinganaNgumelo lapha bekuzokuhlatjwa khona imvana yePhasika.

⁸ UJesu wathumela uPitrosi noJwanisi wathi: “Khambani niyokwenza amalungiselelo ukuze sigome iPhasika.”

⁹ Bambuza bathi: “Bewufuna siyokulungiselela kuphi na?”

¹⁰ Wabaphendula wathi: “Kuzakuthi naningena ngedorobheni, nihlangatjezwe mumuntu athwele umjeka wamanzi. Mlandeleni beniyokungena emzini angena kiwo,

¹¹ nithi kumninimuzi loyo, ‘Umfundisi uyabuza bona liphi ilawu labayeni lapha azakugomela khona iPhasika nabafundi bakhe na?’

¹² Uzanikhombisa ilawu elikhulu elingaphezulu, elinepahla. Yenzani lapho-ke amalungiselelo.”

¹³ Bakhamba, bafumana kunjengombana uJesu bekabatjelile. Yeke balungiselela iPhasika.

Isidlo seKosi sakusihlwa

¹⁴ Kwathi nakufika isikhathi, uJesu nabafundi bakhe bazigedla etafuleni.

¹⁵ Wathi kibo: “Bengithande khulu bona ngigome iPhasikeli nani ngaphambi kobanyana ngitlhagiswe!

¹⁶ Ngambala ngiyanitjela bona angekhe ngaligoma godu bekube kulapha lizaliseka khona embusweni kaZimu.”

¹⁷ Nje-ke wathatha ikapho, wathokoza uZimu, ngemva kwalapho wathi: “Thathani lokhu nirhamulisane,

¹⁸ ngombana ngiyanitjela bona angeze bengisasela godu esithelweni sesidiribe bekube kumhlana kufika umbuso kaZimu.”

¹⁹ Yeke wathatha isikwa, wathokoza uZimu, wasihlephula wabanikela, asithi: “Lokhu kumzimbami, onikelwe nina. Yenzani lokhu ukuze ningikhumbule.”

²⁰ Ngokunjalo, kwathi ngemva kwesidlo santambama, wathatha ikapho wabanikela, asithi: “Ikapho le isivumelwano esitjha eengazini zami ezithululelwa nina.

²¹ “Kodwana qalani, isandla saloyo ozongikhaphela sinami etafulenapha.

²² INdodana yoMuntu izokukhamba njengombana sele kuquntiwe, kodwana maye kiloyo muntu oyikhaphelako!”

²³ Yeke bathoma ukubuzana babodwa bonyana ingaba ngubani hlangana nabo ozokwenza lokho.

Ipikiswano ngobukhulu

²⁴ Kwaqubuka ipikiswano phakathi kwabo kobana ngubani wabo othathwa bona ngomkhulu.

²⁵ UJesu wathi kibo: “Amakhosi wabatjhili abusa phezu kwabo, bese kuthi labo abanegunya phezu kwabo bazibize bona babasekeli babo.

²⁶ Kodwana anikameli ukuba njalo. Esikhundleni salokho, omkhulu phakathi kwenu kumele abe njengomncani bese kuthi obusako abe njengosebenza etafuleni.

²⁷ Ngubani omkhulu na? Ngiloyo ohlezi etafuleni namkha ngiloyo osebenzako na? Akusingiloyo osetafuleni? Kodwana mina ngiphakathi kwenu njengaloyo osebenzako.

²⁸ “Nina ningilabo abangisekeleko ekulingweni kwami.

²⁹ Nje-ke nginethwesa umbuso njengombana noBaba angethwese wona

³⁰ ukuze nigome benisele etafuleni lami embuswenami, nihlale eenhlalweni zobukhosi, nigwebe iinkoro ezilitjhumi nambili zakwa-Israyeli.”

UJesu ubona ngaphambili ukuphikwa nguPitrosi

³¹ UJesu wathi: “Simoni, Simoni! Qala, uSathana ukhombele ukukuhlunga njengekoroyi,

³² kodwana ngikuthandazele Simoni kobana ukukholwa kwakho kungabhalelwa. Wena-ke nasele uphendukile, uqinise abafowenu.”

³³ UPitrosi waphendula wathi: “Kosi, ngilungele ukuya nawe ngesikhungweni nekufeni!”

³⁴ UJesu waphendula wathi: “Ngiyakutjela Pitrosi, ngaphambi kobana umkukurumbu ulile namhlanjesi uzabe sele ungiphike kathathu bona awungazi.”

Isikhwama, imbada nesabula

³⁵ Yeke uJesu wabuza abafundi bakhe wathi: “Mhlana nginithume ninganasikhwama, imbada namapatlagwana nakhe naswela okuthileko na?” Bamphendula bathi: “Azange.”

³⁶ UJesu wathi: “Kodwana kwanjesi onesikhwama akasithathe, nonembada ayithathe, onganasabula akathengise isambatho sakhe ayoyithenga.

³⁷ Ngambala ngithi kini umtlolo lo kumele uzaliseke kimi, ‘Wabalwa kanye nezoni.’ Iye okutlolwe ngami kuyazaliseka.”

³⁸ Abafundi bamphendula bathi: “Qala, Kosi, nanzi iinsabula ezimbili.” UJesu wathi: “Kwanele.”

UJesu uthandaza eNtabeni ye-Oliva

³⁹ UJesu waphuma emzini njengokujayelekileko waya entabeni ye-Oliva, abafundi bakhe bamlandela.

⁴⁰ Kwathi nabafika endaweni leyo, wathi kibo: “Thandazani bona ningangeni ekulingweni.”

⁴¹ Yeke wasuka kibo waba sebangeni elingaba kuphoswa kwelitje, waguqa, wathandaza

⁴² wathi: “Baba, nawuthandako susa ikapho le kimapha, nokho kungabi ngentandwami kodwana kwenziwe yakho.”

⁴³ Kweza kuye ingilozi ivela ezulwini yamqinisa.

⁴⁴ Kwathi asebuhlungwini njalo, waqinisela khulu emthandazweni, umjulukwakhe waba njengamathosi weengazi athontela equlwanini.

⁴⁵ Kwathi bona asikime lapha begade athandaza khona, walunga ebafundini bakhe, wabafumana balele, badiniwe ngokudabuka.

⁴⁶ Wathi kibo: “Nilaleleni na? Sikimani nithandaze, khona ningazukungena ekulingweni.”

Ukubotjhwa kwakaJesu

⁴⁷ Kwathi asakhuluma, kwafika isiqubuthu sirholwa mumuntu ebekuthiwa nguJudasi nebegade angomunye wabafundi abalitjhumi nambili. Weza kuJesu kobana amncwange emhlathini.

⁴⁸ Kodwana uJesu wathi kuye: “Judasi, ukhaphela iNdodana yoMuntu ngokuyincwanga na?”

⁴⁹ Kwathi bona abafundi ebebanoJesu babone bonyana kuzokwenzekani, babuza bathi: “Kosi, sibamadlhe ngeensabula zethu na?”

⁵⁰ Khonapho omunye wabo wakhekhebula ngesabula indlebe yangesidleni yekhoboka lomphristi omkhulu.

⁵¹ Kodwana uJesu wathi: “Kwanele lokho!” Wathinta indlebe yekhobokelo, walipholisa.

⁵² Yeke uJesu wathi kubaphristi abakhulu, iinkhulu zethempeli nakubaphathi ebebazombamba: “Ngimrholi wabokanabo kobana ningabeze ningiphumele ngeensabula nangeembhuku na?

⁵³ Benginani ngesirhodlweni sethempeli woke amalanga, azange niphakamisele isandla phezu kwami. Kodwana lesi sikhathi senu namandla wobumnyama.”

UPitrosi uphika uJesu

⁵⁴ Yeke bambamba uJesu bakhamba naye bamusa ngekumbeni yomphristi omkhulu. UPitrosi walandela kudanyana.

⁵⁵ Babasa umlilo ekabeni yesirhodlo, bahlala phasi botha ndawonye. UPitrosi naye weza wazokotha kanye nabo.

⁵⁶ Ikhobokakazi lambona ahlezi emlilweni. Lamqalisisa lathi: “Umrhali lo gade anaye!”

⁵⁷ Kodwana uPitrosi waphika wathi: “Heyi wena mfazi, angimazi umuntu loyo!”

⁵⁸ Ngemva kwesikhatjhana omunye wambona wathi: “Wena ungomunye wabo!” Kodwana uPitrosi waphendula wathi: “Madekhethu, ngithi angisuye!”

⁵⁹ Ngemva kwe-awara, omunye naye wayiqinisa indaba le wathi: “Ngambala umrhali lo bekakhamba naye ngombana naye umGalile!”

⁶⁰ Kodwana uPitrosi waphendula wathi: “Heyi wena ndoda ndina, angazi bona ukhuluma ngani!” Khonapho asakhuluma njalo, umkukurumbu walila.

⁶¹ IKosi yaphenduka yaqala poro kuPitrosi. UPitrosi wakhumbula ilizwi iKosi elikhulume kuye lokuthi: “Ngaphambi kobana umkukurumbu ulile namhlanjesi, uzabe sele ungiphike kathathu.”

⁶² Waphumela ngaphandle, walila kabuhlungu.

Ukubukisa ngoJesu

⁶³ Amadoda ebegade aqaphe uJesu amphoqa abe ambetha.

⁶⁴ Ambopha ngetjhila emehlweni athi: “Phorofida! Ngubani okubethileko?”

⁶⁵ Ambiza ngeenhlamba ezinengi.

UJesu ulethwa esigungwini sabaphathi

⁶⁶ Kwathi bona kuse, isigungu sabaphathi babantu, abaphristi abakhulu kanye nabafundisi bomthetho bahlangana ndawonye, uJesu walethwa phambi kwabo.

⁶⁷ Bathi kuye: “Nakube unguKrestu, yewusitjele.” Wabaphendula wathi: “Nanginganitjela, angekhe nangikholwa.

⁶⁸ Begodu nanginganibuza, angekhe nangiphendula.

⁶⁹ Kodwana kusukela gadesi, iNdodana yoMuntu izakuhlaliswa ngesidleni sakaZimu uMninimandlawoke.”

⁷⁰ Boke bathi: “Alo-ke, uyiNdodana kaZimu na?” Wabaphendula wathi: “Kunjengombana nisitjho.”

⁷¹ Yeke godu bathi: “Alo, sisafunelani obunye ubufakazi na? Angithi sele sizizwele asitjho ngomlomakhe!”