ULUKASI 21 - IsiNdebele 2012 Translation

Umnikelo womhlolokazi

¹ Kwathi uJesu naqalako, wabona iinkhumkani ziletha iminikelwazo ngethempelini.

² Godu wabona nomhlolokazi odududu anikela ngeempaparwana zekoporo ezimbili ezincani khulu.

³ Wathi: “Nginitjela iqiniso bona umhlolokazi odududu lo unikele ukwedlula boke abanye.

⁴ Boke abantwaba banikele ngokuthatha emnothwenabo; kodwana yena ebuchakeni bakhe unikele ngakho koke aphila ngakho.”

UJesu ukhuluma ngokugirizwa kwethempeli

⁵ Abanye babafundi bakhe bebakhuluma ngendlela ithempeli libatjazwa ubuhle ngakhona, basitjho bona liqaleka kuhle kangangani ngamatje walo amahle nezipho ezinikelwe uZimu. Kodwana uJesu wathi:

⁶ “Nakungilokho enikubona laphokhu, kuzokufika isikhathi lapha kungekhe kwasala khona ngitjho nelitje linye phezu kwelinye; elinye nelinye lawo lizokugirizwa.”

Iinhlupheko ezibuhlungu

⁷ Bambuza uJesu bathi: “Mfundisi, zizokwenzeka nini izintwezo na? Zizokuba yini iimbonakaliso zokobana sele zizokwenzeka na?”

⁸ UJesu waphendula wathi: “Tjhejani bona ningakhohliswa ngombana abanengi bazakuza ebizweni lami bathi, ‘Nginguye!’ begodu, ‘Yeke isikhathi sitjhidele!’ Kodwana ningabalandeli.

⁹ Nanizwa ngezipi nokuvukelana, ningethuki. Izintwezi kumele zenzeke qangi, kodwana isiphetho asizukufika msinyna.”

¹⁰ Waraga wathi kibo: “Isizwe sizakuvukela isizwe nombuso uvukele umbuso.

¹¹ Kuzakuba khona ukusikinyeka kwephasi okukhulu, indlala namatshwenyeko iindawo ngeendawo, kube nezehlakalo ezethusako kanye neembonakaliso ezikulu ezivela ezulwini.

¹² Kodwana ngaphambi kwakho koke lokho, bazonibamba bese bayanitlhorisa. Bazonisa emasinagogini neenkhungweni begodu nidoselwe phambi kwamakhosi nababusi, koke njalo kube ngebanga lami.

¹³ Ngalokho nizakuba bofakazi kibo.

¹⁴ Kodwana qedani nemikhumbulwenu bona ningakhathazeki isikhathi singakafiki ngokuthi nizozivikela njani.

¹⁵ Ngizonipha amezwi nokuhlakanipha okuzakwenza bona kungabikho noyedwa wabajamelani benu ozakukghona ukuphikisana namkha ukuphambana nakho.

¹⁶ Nizokukhatjhelwa ngitjho nangani babelethi benu, abafowenu, iinhlobo zenu nabangani benu; begodu abanye benu bazakubulawa ngibo.

¹⁷ Boke bazonihloya ngebanga lami.

¹⁸ Kodwana akunasihluthu nasinye seenhloko zenu esizakulahleka.

¹⁹ Ngokubambelela kwenu nizakuzuza ipilo.”

UJesu ukhuluma ngokubhujiswa kweJerusalema

²⁰ “Lokha nanibona iJerusalema iragelelwe mabutho, nizakwazi bona ukubhujiswa kwayo sekutjhidele.

²¹ Yeke akuthi labo abaseJudiya babalekele eentabeni, abangaphakathi kwalo baphume, nalabo abasemaphandleni bangangeni kilo.

²² Ngambala lesi kusikhathi sesibetho nokuzaliseka kwakho koke okutloliweko.

²³ Maye kuzokwesabeka kangangani emihleni leyo ebafazini abazithweleko nabamunyisako! Kuzokubakhona ukutshwenyeka okukhulu enarheni nobukhali phezu kwabantwaba.

²⁴ Abanye bazokubulawa ngesabula, abanye benziwe iimbotjhwa kizo zoke izizwe. IJerusalema izakugadangelwa phasi ngabatjhili kufikela lapha isikhathi sabo siphela khona.”

Ukuza kweNdodana yoMuntu

²⁵ “Kuzokuba khona iimbonakaliso elangeni, enyezini neenkwekwezini. Ephasini, izizwe zizakuba sesizini begodu zikhene lokha ilwandle nalihlokomako begodu likhiphizela.

²⁶ Abantu bazakuyatha ngevalo ngalokho okuzokwehlela iphasi loke ngombana umkhambathi wezulu uzakunyakaziswa.

²⁷ Ngesikhatheso bazakubona iNdodana yoMuntu isiza elifwini ngamandla nangephazimulo ekulu.

²⁸ Lokha izintwezi nazithoma ukwenzeka, sikimani niphakamise iinhloko zenu ngombana ukuhlengwa kwenu kutjhidele.”

Ifundiso ngomuthi wamakhiwani

²⁹ Yeke uJesu wabatjela umfanekiso lo: “Qalani umuthi wamakhiwani nayo yoke eminye imithi.

³⁰ Lokha nayitlhurha amakari, nani niyazibonela begodu niyazi bonyana ihlobo selitjhidele.

³¹ Ngokunjalo-ke nani nanibona izintwezi zisenzeka, niyazi bona umbuso kaZimu sewutjhidele.

³² “Ngiqinisile ngiyanitjela bona isizukulwanesi angeze sadlula kungakenzeki zoke izintwezi.

³³ Izulu nephasi kuzadlula, kodwana amezwami angekhe adlula.”

Ekufanele ukuyelelwa

³⁴ “Yelelani, nakungasinjalo, iinhliziyo zenu zizakudisibezwa kurhiribidela, kudakwa kanye neemfiso zepilo. Ilangelo lizanembatha njengesifu ningakatjheji.

³⁵ Lizakwembatha boke abahlala ebusweni bephasi loke.

³⁶ Yeke hlalani nilindile, nithandaze njalo ukuze nikghone ukuphunyurha koke okuzokwenzeka nokobana nikghone ukujama phambi kweNdodana yoMuntu.”

³⁷ Ilanga nelanga uJesu bekafundisa ethempelini, kuthi njalo nakuhlwako aphume ayokulala entabeni ye-Oliva.

³⁸ Njalo ekuseni, boke abantu bephele baye ngethempelini bayomlalela.