ULUKASI 2 - IsiNdebele 2012 Translation

Ukubelethwa kwakaJesu

¹ Emihleni leyo umbusi omkhulu u-Arhostosi wakhupha isimemezelo bona kubalwe boke abantu ephasini loke leRoma.

² Lokhu bekukubalwa kokuthoma ngesikhathi uKureniyosi ambusi weSiriya.

³ Ngiloyo naloyo waya edorobheni lekhabo kobana ayokubalwa khona.

⁴ UJosefa naye wasuka edorobheni leNazaretha eGalile, waya eJudiya emzini kaDavida ebekuthiwa yiBhethelehema ngombana ubegade asizukulwana sekumba nomndeni kaDavida.

⁵ Waya wayokutlolisa yena noMariya, ebegade azomthatha bona abe mkakhe. UMariya gade asidisi.

⁶ Kwathi nabasese lapho, kwafika isikhathi sokobana abelethe.

⁷ Wabeletha, wazibula ngendodana, wayiphuthela ngamatjhila. Wayilalisa ngekerebheni ngombana bekunganandawo ngekumbeni yeenkhambi.

Abelusi neengilozi

⁸ Esifundeneso bekunabelusi ebebahlala emrhuleni baqaphe imihlambabo ebusuku.

⁹ Khonapho ingilozi kaSomnini yeza kibo, iphazimulo kaSomnini yabakhanyisa mahlangothi woke. Besaba kwamambala.

¹⁰ Kodwana ingilozi yathi kibo: “Ningesabi! Qalani, nginilethele iindaba ezimnandi neziletha ithabo ebantwini boke.

¹¹ Khona namhlanjesi ngemzini kaDavida nibelethelwe uMsindisi onguMesiya, iKosi!

¹² Nakhu okuzakuba siboniso kini: Nizakufumana umntwana aphuthelwe ngamatjhila alaliswe ngekerebheni.”

¹³ Khonokho kwabonakala umkhambathi wezulwini ukanye nengilozi leyo, udumisa uZimu usithi:

¹⁴ “Idumo kuZimu keliphezulu nokuthula ephasini, ebantwini abathokozelwa nguye.”

¹⁵ Kwathi bona iingilozi zemuke kibo zibuyele ezulwini, abelusi bathi komunye nomunye: “Nambani siye eBhethelehema siyokubona lokho okwenzekileko, uSomnini asitjele ngakho.”

¹⁶ Yeke barhaba, bafumana uMariya noJosefa kanye nomntwana alele ngekerebheni.

¹⁷ Kwathi nasele bambonile, bakhuluma ilizwi mayelana nalokho abakutjelwe ngomntwana lo.

¹⁸ Nje-ke boke abakuzwako lokho barareka khulu ngeendaba zabelusaba.

¹⁹ Kodwana uMariya wawalonda woke amezwi la, wazindla ngawo ngehliziywenakhe.

²⁰ Abelusi babuyela emva, badumisa, baphakamisa uZimu ngakho koke abakuzwileko nabakubonileko; okwaba njengombana bebatjeliwe.

UJesu uthiywa ibizo

²¹ Elangeni lobunane, sele kusikhathi bona umntwana asokwe, wathiywa ibizo bona nguJesu, ibizo aliphiwa yingilozi angakabiphi ngesiswini sakanina.

UJesu ulethwa ngethempelini

²² Kwathi bona kuphele amalanga wokuhlanjululwa kwabo ngokomthetho kaMosi, uJosefa noMariya bathatha umntwana bamusa eJerusalema kobana bayomveza phambi kwakaSomnini,

²³ njengombana kutloliwe emthethweni kaSomnini bona: “Lelo nalelo izibulo eliduna lizakwehlukaniselwa uSomnini.”

²⁴ Godu bebayokwenza nomhlabelo njengombana kusitjho umthetho kaSomnini nawuthi: “Amazuba amabili wekhaya namkha amabili wommango.”

²⁵ Bekunendoda eJerusalema, ibizo layo linguSimeyoni. Beyilungile begodu yesaba uZimu. Begade ilindele induduzo ka-Israyeli, yeke uMoya oCwengileko gade uphezu kwayo.

²⁶ USimeyoni loyo gade embulelwe ngoMoya oCwengileko bonyana angekhe afe angakaboni uKrestu kaSomnini.

²⁷ Ngokurholwa nguMoya oCwengileko, waya ngesirhodlweni sethempeli. Kwathi lokha ababelethi nabaletha umntwana uJesu kobana bazokwenza kuye umkhuba wabo ukuya ngokomthetho,

²⁸ uSimeyoni wathatha umntwana wamgona, wadumisa uZimu, wathi:

²⁹ “Kwanjesi sewungalitjhaphulula likhambe ngokuthula ikhoboka lakho Kosi. Kube njengokwelizwi lakho

³⁰ ngombana amehlwami ayibonile isindiswakho

³¹ oyilungiselele phambi kwabantu boke.

³² Umkhanyo wesambulo sabatjhili nephazimulo ebantwini bakho u-Israyeli.”

³³ Uyise lomntwana kanye nonina barareka ngalokho okukhulunywe ngaye.

³⁴ Yeke uSimeyoni wababusisa, wathi kuMariya unina: “Umntwana lo ukhethelwe ukuwa nokuvuka kwabanengi kwa-Israyeli nokuba litshwayo elizakuphikiswa,

³⁵ ukuze kwambulwe imizindlo yabanengi. Isabula izakukhekhebula ngitjho neyakho ihliziyo.”

³⁶ Godu bekunomphorofidikazi ebekuthiwa ngu-Ana, indodakazi kaFanuweli wekoro ka-Atjheri. Bekasele aluphele khulu. Wahlala iminyaka elikhomba kwaphela nomyenakhe ngemva kobana amthethe.

³⁷ Ngemva kwalapho waba mhlolokazi bewaba neminyaka ematjhumi abunane nane. Azange akhe asuke ethempelini kodwana bekadumisa ubusuku nemini, azila ukudla athandaza.

³⁸ Khonapho naye weza, waphakamisa uZimu bewakhuluma ngomntwana kibo boke ebebalindele ukuhlengwa kweJerusalema.

Ukubuyela eNazaretha

³⁹ Kwathi bona uJosefa noMariya baqede ukwenza koke ebekufunwa mthetho kaSomnini, babuyela eGalile edorobheni lekhabo eNazaretha.

⁴⁰ Umntwana wakhula waba namandla, gade ahlakaniphile, nomusa kaZimu uphezu kwakhe.

UJesu ngethempelini

⁴¹ Umnyaka nomnyaka ababelethi bakhe bebasiya eJerusalema emnyanyeni wePhasika.

⁴² Kwathi naneminyaka elitjhumi nambili ubudala, bakhuphukela emnyanyeni njengokujayelekileko.

⁴³ Ngemva kobana umnyanya uphele, ababelethi bakaJesu babuyela ekhaya, kwabe yena usele eJerusalama. Kodwana bebangakatjheji bona usele ngemuva.

⁴⁴ Badlumbana bona uphakathi kwesiqubuthu seenkhambi. Sele bakhambe ibanga lelanga loke, bathoma ukumfuna eenhlotjeni zabo nebanganini babo.

⁴⁵ Bathi nabangamfumaniko, babuyela eJerusalema ukuyomfuna khona.

⁴⁶ Ngemva kwamalanga amathathu, bamfumana ngesirhodlweni sethempeli ahlezi hlangana nabafundisi, abalalele begodu ababuza imibuzo.

⁴⁷ Boke abamzwako barareka ngendlela azwisisa ngayo nangeempendulo zakhe.

⁴⁸ Kwathi ababelethi bakhe nabambonako, barareka. Unina wathi kuye: “Mntwanami, ukwenzeleni lokhu kithi na? Sinoyihlo besitshwenyekile ngawe, sikhamba sikufuna.”

⁴⁹ Wabaphendula wathi: “Beningifunelani na? Beningazi bona kufanele ngibe ngekumbeni kaBaba?”

⁵⁰ Kodwana azange bayilemuke ipendulwakhe.

⁵¹ Yeke wehlela nabo eNazaretha, wabalalela. Kodwana unina wabulunga zoke izintwezi ngehliziywenakhe.

⁵² UJesu wakhula ngokuhlakanipha nangesithunzi, wathandwa nguZimu nabantu.