ULUKASI 19 - IsiNdebele 2012 Translation

UJesu noZakewu

¹ UJesu wangena eJerikho, wadabula khona.

² Lapho bekunendoda ebekuthiwa nguZakewu imthelisi omkhulu begodu isikhumkani.

³ Yena wafuna ukubona bonyana uJesu lo ungubani, kodwana ngombana bekamfitjhani azange akghone ukumbona ngebanga lesiqubuthu.

⁴ Yeke wagijimela ngaphambili wayokukhwela emthini wamakhiwani wommango ngombana uJesu begade azokudlula lapho.

⁵ UJesu wathi nafika lapho, waqala phezulu wathi: “Zakewu, rhaba wehle emthinapho ngombana ngifanele ngiyokuhlala ngakwakho namhlanjesi.”

⁶ Yeke wehla msinyana, wamamukela ngethabo.

⁷ Boke abantu bakubona lokho, nje-ke bathoma ukunghonghoyila bathi: “Ungene kobana abe myeni emzini wesoni!”

⁸ Kodwana uZakewu wasikima wathi eKosini: “Qala, Kosi! Nginikela abadududu isiquntu selifa lami khona nje, begodu nakube kukhona engimgalaje ngananyana yini, ngizakukhokhela ngokubuyelelwe kane kwalokho.”

⁹ UJesu wathi: “Namhlanjesi isindiso ingene kilelikhaya ngombana naye lo uyindodana ka-Abrahamu.

¹⁰ INdodana yoMuntu izele ukuzokufuna nokusindisa okulahlekileko.”

Umfanekiso ngesipaparwana segolide

¹¹ Kuthe abantu basalalele lokho, uJesu waraga ngokubatjela umfanekiso ngombana begade aseduze kweJerusalema begodu abantu bebadlumbana bona umbuso kaZimu bewuzokuvela khonokho.

¹² Wathi kibo: “Umuntu obegade abelethwa emzini ohloniphekileko waya enarheni ekude ayokwenza bona abekwe ikosi bese uyabuya.

¹³ Yeke wabiza itjhumi lamanye wamakhobokakhe, wawanikela abomina. abalitjhumi wathi kiwo, ‘Sebenzisani lokhu kufikela bengibuye.’

¹⁴ Kodwana abantu bakhe bebamhloyile, yeke bathumela abazenda ngemva kwakhe bona bayokuthi, ‘Asimfuni umuntu lo bona abe yikosethu.’

¹⁵ “Nanyana kunjalo, wabekwa waba yikosi, yeke wabuyela ekhaya. Khonokho wabiza amakhoboka ebegade awanikele imali ukuze afunyane bona azuzeni ngayo.

¹⁶ Lokuthoma leza lafika lathi, ‘Kosi, umina wakho uzuze itjhumi ngaphezulu.’

¹⁷ Wathi kilo, ‘Wenze kuhle, khoboka lami elilungileko! Njengombana wethembekile kokuncani, ngizakubeka bona uphathe amadorobho alitjhumi.’

¹⁸ Lesibili nalo leza lathi, ‘Kosi, abomina bakho bazuze abahlanu ngaphezulu.’

¹⁹ Kilelo wathi, ‘Uzakuphatha amadorobho amahlanu.’

²⁰ “Yeke kweza elinye ikhoboka lathi, ‘Kosi, nangu umina wakho, bengimfihlile ngimphuthele ngetjhila.

²¹ Bengikwesaba ngombana umumuntu olikhuni. Uthatha ongakakubeki, uvune ongakakutjali.’

²² Wathi kilo, ‘Ngizokugweba ngamagamakho wena khoboka elikhohlakeleko ndina. Angithi bewazi bonyana ngimumuntu olikhuni, ngithatha engingakakubeki, ngivune engingakakutjali?

²³ Alo, kubayini-ke ungazange usisise imalami ebulungelweni ukuze kuthi nangibuyako ngiyifunyane inenzalo na?’

²⁴ “Yeke wathi kilabo ebegade bajame lapho, ‘Lemukeni umina lo, ninikele onabomina abalitjhumi.’

²⁵ Kodwana bamphendula bathi, ‘Kosi, angithi loyo sele anabomina abalitjhumi!’

²⁶ Wabaphendula wathi, ‘Ngiyanitjela bona woke onokunengi, uzakuphiwa ngaphezu kwalokho, kodwana onganalitho yena, uzakwemukwa ngitjho nalokho anakho.

²⁷ Nje-ke ngithi nakuzizitha zami ebezingafuni bona ngibe yikosi phezu kwazo, yeniziletheni lapha, nizibulale phambi kwamapha.’ ”

UJesu ungena eJerusalema ngedumo

²⁸ UJesu watjho lokho wakhamba wayokungena eJerusalema.

²⁹ Kuthe natjhidela eBhethifage neBhethaniya embundwini obewubizwa bona yintaba ye-Oliva, wathumela babili babafundi bakhe,

³⁰ wathi kibo: “Khambani niye emzini ongaphambi kwenu, nizakuthi naningenako nifumane udumbana okungazange kukhwele muntu phezu kwakhe abotjhiwe. Mtjhaphululeni, nimlethapha.

³¹ Nakukhona onibuza athi, ‘Nimtjhaphululelani?’, nimtjele nithi, ‘IKosi iyamdinga.’ ”

³² Labo ebebathunyiwe bakhamba, bafunyana koke kunjengombana uJesu atjhwile.

³³ Kwathi nabasatjhaphulula udumbana, umnikazi wababuza wathi: “Nimtjhaphululelani udumbana na?”

³⁴ Bamphendula bathi: “IKosi iyamdinga.”

³⁵ Baletha udumbana loyo kuJesu, babeka izambatho zabo phezu kwakhe, bakhweza uJesu.

³⁶ Kwathi nakhambako, abantu baqhisa izambatho zabo endleleni.

³⁷ Nafika emehlelweni wentaba ye-Oliva, soke isiqubuthu sabafundi sathoma sadumisa uZimu ngetokozo, sihlokoma ngayo yoke imikarisomraro esiyibonileko,

³⁸ sathi: “Ubusisiwe loyo ozako, iye, iKosi eza ebizweni lakaSomnini! Ukuthula ezulwini nephazimulo keliphezulu!”

³⁹ Yeke abanye babaFarisi hlangana nesiqubuthu bathi kuJesu: “Mfundisi, khalimela abafundi bakhwaba!”

⁴⁰ UJesu wabaphendula wathi: “Ngiyanitjela bona nabathulako laba, amatje azakurhuwelela.”

UJesu ulilela iJerusalema

⁴¹ Kwathi natjhidelako, abona idorobho, walililela

⁴² wathi: “Ngathana namhlanjesi bewusazi bona yini engakulethela ukuthula! Kodwana kufihlekile emehlwenakho!

⁴³ Uzakufikelwa malanga lapho izitha zakho zizakwakhela khona isiqabo, zikuzombeleze bezikuvimbezele mahlangothi woke.

⁴⁴ Zizakumadlha phasi, wena nabantwana abangaphakathi kwemithangalakho. Azizokutjhiya ngitjho nalinye ilitje phezu kwelinye ngombana awuzange ulemuke isikhathi sokuza kwakaZimu kuwe!”

UJesu uya ethempelini

⁴⁵ Yeke wangena ngethempelini wathoma ukuqotjha ebebathengisa.

⁴⁶ Wathi kibo: “Kutloliwe kwathiwa, ‘Ikumbami izakuba yikumba yokuthandaza’ kodwana nina niyenze irharha labahlanguli!”

⁴⁷ Ngamalanga uJesu bekafundisa ngethempelini. Abaphristi abakhulu nabafundisi bomthetho kanye nabarholi babantu balinga ukumbulala.

⁴⁸ Kodwana azange bafunyane indlela yokwenza lokho ngombana boke abantu babambelela emezwinakhe.