ULUKASI 18 - IsiNdebele 2012 Translation

Umfanekiso ngomhlolokazi nomgwebi

¹ Yeke uJesu watjela abafundi bakhe umfanekiso abakhombisa bonyana bafanele bahlale bathandaza njalo bangapheli amandla.

² Wathi: “Emzini othileko bekunomgwebi obegade angesabi uZimu, anganandaba nabanye abantu.

³ Godu khona emzini loyo bekunomhlolokazi obekaphele aye kuye ayokubawa isizo athi, ‘Yewungihlambulule kumjamelanami!’

⁴ Kwaba sikhathi eside alokhu angafuni. Kodwana ekugcineni wazitjela wathi, ‘Ngitjho nanyana ngingamesabi uZimu namkha nginganandaba nabanye abantu,

⁵ kodwana ngombana nakhu umhlolokazi lo uhlalele ukungifundekela, ngizakwenza bonyana afumane ubulungiswa ukuze angasangikhathaza ngokuza kwakhe lapha.’ ”

⁶ IKosi yaraga yathi: “Yizwani bona umgwebi ongakalungi uthini.

⁷ Alo, nithi uZimu angeze abazwela abakhethiweko bakhe, abalilela kuye imini nobusuku na? Uzalokhu abaphayela ngeqadi na?

⁸ Ngiyanitjela bona uzobazwela msinyana. Nokho-ke nitjho bona iNdodana yoMuntu mhla ibuyako izakufumana ukukholwa ephasinapha na?”

Umfanekiso ngomFarisi nomthelisi

⁹ Godu wakhuluma umfanekiso lo kilabo ebebazethemba ngokulunga kwabo, banyaza boke abanye, wathi:

¹⁰ “Abantu ababili benyukela ethempelini ukuyokuthandaza. Omunye bekumFarisi, omunye kumthelisi.

¹¹ “UmFarisi wajama, wazithandazela wathi, ‘Zimu, ngiyakuthokoza ngombana mina angifani nabanye abantu: ababadlelezeli, abenzi bokumbi, iinhlobongi ngitjho naye umthelisi olapha lo.

¹² Ngizila ukudla kabili ngeveke, ngikhupha umnikelo wokwetjhumi kwakho koke engikuzuzako.’

¹³ “Kodwana umthelisi wajamela kudanyana. Wahlulwa ngitjho nakuqala ezulwini, kodwana wabetha isandla phezu kwesinye wathi, ‘Zimu, ngirhawukele, mina soni!’ ”

¹⁴ UJesu wathi: “Ngiyanitjela bona umthelisi wabuyela ekhaya alungisisiwe phambi kwakaZimu kunomFarisi ngombana nanyana ngubani oziphakamisako uzakwehliswa, nozithobako uzakuphakanyiswa.”

Abantwana balethwa kuJesu

¹⁵ Abantu baletha abantwana kuJesu kobana abathinte. Kwathi lokha abafundi bakhe nababona lokho, babakhalimela.

¹⁶ Kodwana uJesu wabizela abantwana kuye wathi: “Lisani abantwana beze kimi ningabakhandeli ngombana umbuso kaZimu ungewabanjalo.

¹⁷ Ngiqinisile ngiyanitjela bona nanyana ngubani ongekhe amukela umbuso kaZimu njengomntwana, angekhe angena kiwo.”

Umuntu osikhumkani

¹⁸ Umbusi othileko wambuza wathi: “Mfundisi olungileko, ngingenza njani ukuze ngizuze ukuphila okungapheliko na?”

¹⁹ UJesu wathi: “Kubayini ungibize ngolungileko na? Akakho noyedwa olungileko ngaphandle kwakaZimu kwaphela.

²⁰ Uyayazi imiyalo, ‘Ungahlobongi, ungabulali, ungebi, ungafakazi amanga, hlonipha uyihlo nonyoko.’ ”

²¹ Umbusi loyo wathi: “Koke lokho bengiseze ngikwenza kusukela ngisesemsana.”

²² Kwathi bona uJesu ezwe lokho, wathi: “Kusasele into eyodwa ekufanele uyenze. Thengisa koke onakho, wabele abatlhagileko, nje-ke uzakuba namagugu ezulwini. Ngemva kwalapho-ke ungilandele.”

²³ Kwathi bona ezwe lokho, watlhuwa khulu ngombana bekasikhumkani samambala.

²⁴ UJesu wamqala wathi kuye: “Kubudisi kangangani bona abantu abaziinkhumkani bangene embusweni kaZimu!

²⁵ Ngambala kulula bona uzilume indololwani kunobana isikhumkani singene embusweni kaZimu.”

²⁶ Abantu abamzwako bambuza-ke bathi: “Alo, ngubani-ke ongasindiswa na?”

²⁷ UJesu wabaphendula wathi: “Lokho okungenzekiko ebantwini kuyenzeka kuZimu.”

²⁸ UPitrosi wathi kuye: “Qala, sitjhiye koke esinakho bona sikulandele!”

²⁹ UJesu wathi kibo: “Ngiqinisile ngiyanitjela bona akakho noyedwa otjhiye ikhaya lakhe namkha umkakhe, abafowabo, ababelethi bakhe nabantwabakhe ngebanga lombuso kaZimu,

³⁰ ozakubhalelwa kuzuza ipilo engapheliko ngokubuyelelwe kanengi esikhathinesi, nesikhathini esizako.”

UJesu ukhuluma kwesithathu ngokufa kwakhe

³¹ UJesu wabizela abafundi bakhe ngeqadi wathi kibo: “Sizokwenyukela eJerusalema, lapho koke okutlolwe baphorofidi ngeNdodana yoMuntu kuzakuzaliseka khona.

³² Izakunikelwa kwabatjhili. Bazayiphoqa, bayithuke, bayikhafulele ngamathe, bayimadlhe bebayibulale.

³³ Ngelanga lesithathu izakuvuka godu.”

³⁴ Kodwana abafundi bakhe akhange bazwisise nakunye kwalokho. Begade kufihlakele kibo bebangazi bonyana ukhuluma ngani.

UJesu upholisa isiphofu esisikhombeli

³⁵ Bekunesiphofu ebesihlezi ngeqadi kwendlela sikhombela lokha uJesu natjhidela eJerikho.

³⁶ Kwathi nasizwa isiqubuthu sidlula, sabuza bona kwenzekani.

³⁷ Basitjela bathi: “UJesu weNazaretha uyadlula.”

³⁸ Sarhuwelela sathi: “Jesu, Ndodana kaDavida, ngirhawukela!”

³⁹ Abantu ebebaphambi kwaso basikhalimela bathi asithule. Kodwana sarhuwelela khulu, sathi: “Ndodana kaDavida, ngirhawukela!”

⁴⁰ UJesu wajama, wathi abasilethe kuye. Kwathi nasitjhidelako, uJesu wasibuza wathi:

⁴¹ “Ufuna ngikwenzeleni na?” Samphendula sathi: “Kosi, ngifuna ukubona.”

⁴² UJesu wathi kiso: “Bona! Ukukholwa kwakho kukusindisile.”

⁴³ Khonokho sabona, besalandela uJesu sithokoza uZimu. Kwathi lokha boke abantu nababona lokho, nabo badumisa uZimu.