ULUKASI 17 - IsiNdebele 2012 Translation

Isono

¹ UJesu wathi ebafundini bakhe: “Izinto ezenza abantu bone zimele ukubakhona, kodwana maye kiloyo eziza ngaye!

² Bekungaba ngcono kuye bona kubotjhelelwe ilitje lokusila entanyenakhe aphoselwe ngelwandle, kunobanyana enze abancancanaba bone.

³ Yeke yelelani enikwenzako! “Nakube umfowenu uyona, mkhalimele; naphendukako, mlibalele.

⁴ Nakube ukone kalikhomba ngelanga, eze kuwe kalikhomba athi, ‘Ngiyaphenduka,’ mlibalele.”

Ukukholwa

⁵ Abapostoli bathi eKosini: “Yandisa ukukholwa kwethu.”

⁶ IKosi yaphendula yathi: “Nakube beninokukholwa okungangembewu yemastadi, benizakuthi emthini womurbheyi lo, ‘Ruthuka uyokutjaleka ngelwandle,’ bewuzanilalela.”

Umsebenzi wenceku

⁷ “Akhe sithi omunye wenu unekhoboka elilima namkha elelusa izimvu. Bekazakuthi ekhobokenelo nalibuya esimini, ‘Ngena uhlale phasi sigome’ na?

⁸ Esikhundleni salokho ubangekhe athi, ‘Lungisa isidlo sami sakusihlwa, uzilungiselele bese ujama etafuleni mina lokha nangigoma bengisele, ngemva kwalapho-ke nawe ugome bewusele’ na?

⁹ Ubezalithokoza ikhoboka ngokwenza kwalo elikutjelwako na?

¹⁰ Ngokunjalo-ke nani, nasele nenze koke enitjelwe bona nikwenze, kumele nithi, ‘Simakhoboka anganabubhadekelo, senze umsebenzethu nje kwaphela.’ ”

UJesu upholisa amadoda alitjhumi

¹¹ Lokha uJesu nasendleleni eya eJerusalema, wadlula hlangana neSamariya neGalile.

¹² Kwathi nasangena ngemzini othileko, wahlangatjezwa madoda alitjhumi anobulwelwe bekhwekhwe. Ajamela kudanyana

¹³ arhuwelela athi: “Jesu, Kosi, sirhawukele!”

¹⁴ UJesu wawabona wathi kiwo: “Khambani niyoziveza kubaphristi.” Kuthe asakhamba, ahlanjululwa.

¹⁵ Enye yawo yathi ingabona bonyana ipholile, yabuya idumisa uZimu ngelizwi elikhulu.

¹⁶ Yaziphosa eenyaweni zakaJesu, yamthokoza. Begade imSamariya.

¹⁷ UJesu wathi: “Azange kuhlanjululwe woke wolitjhumi na? Alo, aphi-ke amanye alithoba?

¹⁸ Azange kufunyanwe namunye obuyako kobana azokudumisa uZimu ngaphandle komqhamuka lo na?”

¹⁹ Yeke wathi kuye: “Sikima ukhambe, ukukholwa kwakho kukusindisile.”

Umbuso ozako

²⁰ Kwathi bona abuzwe baFarisi bona umbuso kaZimu uzakuza nini, uJesu waphendula wathi: “Umbuso kaZimu awuzi ngokuyelela kwenu okubukhali,

²¹ namkha lokha abantu nabasithi, ‘Naku lapha ukhona’, namkha ‘Nakuya laphaya’ ngombana umbuso kaZimu ungaphakathi kwenu.”

²² Yeke wathi ebafundini bakhe: “Isikhathi siyeza lapha nizakukhanukela khona ukubona elinye lamalanga weNdodana yoMuntu, kodwana anizulibona.

²³ Abantu bazanitjela bathi, ‘Qalani nanguya!’ namkha bathi, ‘Qalani nangu!’ Ningagijimi ngemva kwabo.

²⁴ INdodana yoMuntu ngelanga layo, izakufana nombani ophazima bewukhanyise umkayi ukusuka ngapha ukuya ngale.

²⁵ Kodwana kufanele itlhage qangi, ilahlwe sizukulwanesi.

²⁶ Njengombana gade kunjalo emihleni kaNowa, kuzakuba njalo nemihleni yeNdodana yoMuntu.

²⁷ Abantu bebagoma, basela, bathatha begodu benda kufikela mhla uNowa angena khona ngemkhunjini. Yeke kwafika umthwalela, wabatjhabalalisa boke.

²⁸ Kwaba njalo nangesikhathi sakaLothi. Abantu bebagoma begodu basela, bathenga begodu bathengisa, batjala begodu basakha.

²⁹ Kodwana ngelanga uLothi asuka ngalo eSodoma, kwehla umlilo nesibabuli ezulwini, kwabaqothula boke.

³⁰ Kuzakuba njalo-ke namhlana iNdodana yoMuntu ibonakaliswako.

³¹ “Mhlokho ophezu kwephahla lekumbakhe angehliki aye ngekhaya athi uyokuthatha ipahlakhe. Ngokunjalo nosesimini angabuyeli kwakhe athi uyokuthatha okuthileko.

³² Khumbulani umkaLothi!

³³ Loyo olinga ukuzuza ipilwakhe izamlahlekela. Loyo olahlekelwa yipilwakhe uzayibulunga.

³⁴ Ngiyanitjela bona ngobusukobo, abantu ababili abazabe balele emsemeni owodwa, oyedwa uzakuthathwa, oyedwa atjhiywe.

³⁵ Abafazi ababili bazabe basila ndawonye, oyedwa uzakuthathwa, oyedwa atjhiywe.

³⁶ Amadoda amabili azabe asesimini, eyodwa izakuthathwa, eyodwa itjhiywe.”

³⁷ Abafundi bambuza bathi: “Kuphi, Kosi na?” Wathi kibo: “Lapha kunesidumbu khona, ubona ngamadlanga.”