ULUKASI 14 - IsiNdebele 2012 Translation

UJesu upholisa indoda egulako

¹ Ngelinye lamaSabatha lokha uJesu nayokugoma ngekumbeni yomFarisi odumileko, begade atjhejwe ngelihlo elibukhali.

² Lapho ngaphambi kwakhe bekunendoda ebegade iphethwe sisifo samanzi.

³ UJesu wabuza abaFarisi nezazimthetho wathi: “Kumthetho ukupholisa ngeSabatha namkha njani na?”

⁴ Kodwana bazithulela. Yeke uJesu wathatha indoda leyo, wayipholisa, wathi ikhambe.

⁵ Yeke wababuza wathi: “Nakube omunye wenu unomntwana namkha ikomo ewele ngemgodini ngeSabatha, angekhe ayoyikhupha khonokho na?”

⁶ Kodwana boke batlhoga umlomo.

Ukuzithoba nobuntu

⁷ Kwathi uJesu nabona bonyana abamenywa bazikhethela iindawo ezihloniphekileko etafuleni, wabatjela umfanekiso lo:

⁸ “Lokha omunye nakumemela emtjhadweni, ungahlali endaweni ehloniphekileko ngombana kungenzeka bona kukhona omenyiweko oqakatheke khulu kunawe.

⁹ Kuthi kusesenjalo onimemileko, eze afese athi kuwe, ‘Akhe utjhidele umuntu lo esihlalweneso,’ yeke uzakuhlaziseka ukhambe uyokuhlala endaweni enyazekako.

¹⁰ Kodwana nawumenyiweko, hlala endaweni enyazekako khona kuzakuthi okumemileko nezako, athi kuwe, ‘Mngani, yewenyukele endaweni engcono.’ Ngaleyondlela uzakuhlonitjhwa phakathi kwabo boke abamenyiweko.

¹¹ Ngambala woke oziphakamisako uzakuthotjiswa naloyo ozithobako uzakuphakanyiswa.”

¹² Yeke uJesu wathi komumemileko: “Lokha nawenza isidlo semini namkha sakusihlwa, ungamemi abangani bakho, abafowenu, iinhlobo zakho namkha abomakhelwana bakho abanjingileko ngombana nawenza njalo, nabo bazakumema ngaleyondlela uzakuvuzwa.

¹³ Kodwana nawenza umnyanya, mema abadududu, abarholopheleko, abangakwazi ukukhamba neemphofu,

¹⁴ khona-ke uzakubusiswa. Nanyana bangekhe bakuvuze, uzakuvuzwa ekuvusweni kwabalungileko.”

Umfanekiso ngomnyanya omkhulu

¹⁵ Kwathi lokha omunye wabagade bahlezi naye etafuleni ezwe lokho, wathi kuJesu: “Ubusisiwe umuntu ozakugoma emnyanyeni embusweni kaZimu!”

¹⁶ UJesu wathi kuye: “Umuntu othileko bekalungiselela umnyanya omkhulu, wamema nabantu abanengi.

¹⁷ Ngesikhathi somnyanya, wathuma ikhoboka lakhe kobana liyokuthi kabamenyiweko, ‘Yizani, koke sekulungile!’

¹⁸ Kodwana ngokufanako, boke bathoma ukuzilandula. Wokuthoma wathi, ‘Ngiqeda ukuthenga isimu, yeke kumele ngiyoyibona. Uzangilibalela, angiphumeleli.’

¹⁹ Wesibili wathi, ‘Ngiqeda ukuthenga itjhumi leenkomo ezibotjhelwako, yeke ngisendleleni yokuzibona bona zidosa njani. Uzangilibalela, angiphumeleli.’

²⁰ Khonapho omunye naye wathi, ‘Ngiqeda ukuthatha, ngaleyondlela angiphumeleli ukuza.’

²¹ “Ikhoboka labuyela ekosinalo layokubika. Umninikhaya wathukuthela khulu, wayala ikhoboka lakhe wathi, ‘Phuma msinyana ungene eendledlaneni nemikghotheni yedorobho ubize abadududu, abarholopheleko, iimphofu neengoga.’

²² Ikhoboka lathi, ‘Kosami, ngiwuphethile umyalwakho, kodwana kusese nendawo.’

²³ Yeke ikosi yathi ekhobokeni layo, ‘Phuma uye eendleleni nemikghotheni yemaphandleni, ubabize ukuze ikumbami igcwale.

²⁴ Ngiyanitjela bona akakho noyedwa kilabo abamenyiweko ozakufumana ukunandipha komnyanyami!’ ”

Ukuba mfundi kaJesu

²⁵ Isiqubuthu esikhulu besikhamba noJesu, khonapho waphendukela kiso wathi:

²⁶ “Nanyana ngubani oza kimi kodwana angazondi uyise nonina, umkakhe nabantwana, abafowabo nabodadwabo, ngitjho nepilwakhe, angeze aba mfundi wami.

²⁷ Nanyana ngubani ongatjathi isiphambano sakhe angilandele, angekhe aba mfundi wami.

²⁸ “Akhe sithi omunye wenu ufuna ukwakha umtlomogo. Akazokuhlala phasi ntange alinganise iindleko ukuze abone bonyana unemali eyaneleko yokuwakha bewuphele na?

²⁹ Ngambala nakube ubeka isisekelo kodwana angasakghona ukuqedelela, boke abakubonako lokho bazamphoqa

³⁰ bathi, ‘Umrhali lo uthome ukwakha, kodwana wangakghona ukuqeda!’

³¹ “Namkha akhe sithi ikosi izilungiselela ukuya epini ukuyokulwa nenye ikosi. Ayizokuhlala phasi ntange bese icabangisise bona izakukghona ngamadoda aziinkulungwana ezilitjhumi ukujamelana nenamadoda aziinkulungwana ezimatjhumi amabili na?

³² Nayingakghoniko, izakuthumela abazenda ekosini leyo isesekude, ikhombele bonyana kukhulunyiswane ngokuthula.

³³ Ngokunjalo-ke, nanyana ngubani wenu ongatjhiyi koke anakho angeze aba mfundi wami.”

Itswayi eliqwatjhileko

³⁴ “Itswayi lilungile, kodwana nasele liqwatjhile, lingavuselelwa njani na?

³⁵ Alikalungeli iqulwani ngitjho nanyana kungaba msuqwa, liyalahlwa. Oneendlebe zokuzwa akezwe.”