ULUKASI 10 - IsiNdebele 2012 Translation

UJesu uthuma abamatjhumi alikhomba nambili

¹ Ngemva kwalokho iKosi yakhetha abanye abamatjhumi alikhomba nambili, yabathuma ngababili bona bakhambe phambi kwayo baye kiyo yoke imizi nakizo zoke iindawo lapha beyizakuya khona.

² Yathi kibo: “Isivuno sinengi, kodwana iinsebenzi zimbalwa. Yeke khombelani eKosini yesivuno kobana ithumele iinsebenzi esiminayo.

³ Khambani! Qalani, nginithuma njengeemvana hlangana neempisi.

⁴ Ningaphathi isikhwama, imbada namkha amapatlagwana begodu ningabingeleli muntu endleleni.

⁵ Naningena kinanyana ngimuphi umuzi nithome ngokuthi, ‘Ukuthula akube nekhayeli.’

⁶ Nakube lapho kunendoda yokuthula, kuzakuhlala phezu kwayo. Nakungasinjalo ukuthula kuzakubuyela kini.

⁷ Hlalani emzini lowo, nigome benisele nanyana yini abanipha yona ngombana isisebenzi sifanelwa mrholo waso. Ningasoloko nitjhida niphuma kilomuzi ningene kilowaya.

⁸ Lokha naningena ngemzini bese niyamukeleka, gomani okubekwe phambi kwenu.

⁹ Pholisani abagulako abalapho, nithi kibo, ‘Umbuso kaZimu ubandamele kini.’

¹⁰ Kodwana naningena ngemzini banganamukeli, yiyani eendledlaneni nithi,

¹¹ ‘Sitjho nethuli lomuzi wenu elikghamathele eenyaweni zethu, silesulela phezu kwenu. Kodwana qinisekani ngalokhu: Umbuso kaZimu sewubandamele!’

¹² Ngiyanitjela ngithi iSodoma izokuba ngcono khulu mhlokho kunomuzi lowo.”

Imizi engakholwako

¹³ “Maye kuwe Rhorazini! Maye kuwe Bhethe-Sayida! Nakube imikarisomraro eyenziwe kini beyenziwe eTirosi neTsidoni, ngabe yaphenduka yembatha iinzilo beyahlala emlotheni.

¹⁴ Kodwana kuzokuba ngcono khulu kilo iTirosi neTsidoni kunakini.

¹⁵ Wena-ke Kapernawumi, udlumbana bona uzokuphakanyiselwa emkayini na? Uzokwehliselwa phasi endaweni yabafileko.”

¹⁶ “Loyo onilalelako, nami uyangilela; loyo onalako nami uyangala kodwana owala mina, wala loyo ongithumileko.”

Ukubuya kwabamatjhumi alikhomba nambili

¹⁷ Abamatjhumi alikhomba nambili babuya bathabe kwamambala, bathi: “Kosi, awukhuzi namadimoni asilalele lokha siwakhalimelako ngebizo lakho!”

¹⁸ Wabaphendula wathi: “Ngibone uSathana awa njengombani ovela ezulwini.

¹⁹ Lalelani-ke, ngininikele amandla wokukhamba phezu kweenyoka nabofezela benehlule woke amandla wesitha. Akunalitho elizanikhubaza.

²⁰ Nokho ningathatjiswa kukobana imimoya emimbi inilalele, kodwana thokoziswani kukobana amabizwenu atloliwe ezulwini.”

Ithabo lakaJesu

²¹ Khonapho uJesu waba nethabo lakaMoya oCwengileko wathi: “Ngiyakuthokoza, Baba, mnikazi wezulu nephasi ngombana izintwezi uzifihlile emehlweni wabahlakaniphileko nabanelemuko, kodwana wazembulela abantwana abancani. Iye, Baba ngombana lokhu kwaba yitokozo yakho ehle.

²² “Zoke izinto uBaba uzibeke ezandleni zami. Akakho noyedwa owaziko bona ngubani iNdodana ngaphandle koBaba, begodu akakho noyedwa owaziko bona uBaba ngubani ngaphandle kweNdodana kanye nalabo iNdodana ekhetha ukumbonakalisa kibo.”

²³ Yeke waphendukela ebafundini bakhe wathi kibo ngasese: “Abusisiwe amehlo abona enikubonako,

²⁴ ngombana ngiyanitjela bona banengi abaphorofidi namakhosi ebekafuna ukubona izinto enizibonakwezi, kodwana azange azibone bekafisa nokuzwa enikuzwako, kodwana azange akuzwe.”

Umfanekiso ngomSamariya olungileko

²⁵ Qalani, kwasikima isazimthetho kobana simzizinye, sathi: “Mfundisi, ngingenza njani ukufumana ipilo engapheliko na?”

²⁶ UJesu wasiphendula wathi: “Kutlolweni emthethweni na? Uwufunda njani?”

²⁷ Saphendula sathi: “Thanda uSomnini uZimakho ngayo yoke ihliziywakho nangomphefumulwakho woke, ngawo woke amandlakho nangomkhumbulwakho woke begodu uthande umakhelwanakho njengombana uzithanda wena.”

²⁸ UJesu wathi kiso: “Uphendule kuhle, yenza lokho, uzakuphila.”

²⁹ Kodwana safuna ukuzibeka ngebuhleni sathi kuJesu: “Alo, ngubani umakhelwanami na?”

³⁰ UJesu wasiphendula wathi: “Kwaba nomuntu ogade asuka eJerusalema asiya eJerikho, wawela ezandleni zabadlelezeli. Bamhlubulisa izambatho zakhe, bambetha, bamtjhiya lapho afe isigiyani.

³¹ Kwenzeka bona umphristi akhambe ngendlela leyo, kwathi lokha nabona umuntu loyo, wamdlula, agegeda eqadi kwakhe.

³² Ngokunjalo nomLevi wathi nafika lapho, wambona, wamgegeda.

³³ Kodwana kwathi umSamariya asakhamba, wafika lapha bekunomuntu loyo, yeke kwathi nambonako, wamrhawukela.

³⁴ Waya kuye, wafese wambopha amanceba, wathela amafutha we-oliva newayini emancebeni. Wamkhweza kudumbanakhe, wamusa ngekumbeni yeenkhambi wamnakekela.

³⁵ Elangeni elilandelako wakhupha iimpaparwana zesiliva ezimbili wanikela umninikumba, wathi kuye: ‘Yewumhlenge, kuzakuthi nangibuyako, ngikukhokhele zoke iindleko ezinye obe nazo ngaye.’ ”

³⁶ “Alo-ke, ngimuphi kilaba abathathu ocabanga bona ube ngumakhelwana emuntwini owele ezandleni zabadlelezeli na?”

³⁷ Isazimthetho sathi: “Ngiloyo omrhawukeleko.” UJesu wathi kiso: “Arha-ke! Khamba nawe uyokwenza njalo.”

UJesu uthekela uMarta noMariya

³⁸ UJesu nabafundi bakhe bakhamba, bafika emzini lapha bekunowesifazana ebekuthiwa nguMarta, wamamukela.

³⁹ Bekanodadwabo ebekuthiwa nguMariya, owahlala eenyaweni zeKosi, walalela lokha nayifundisako.

⁴⁰ Kodwana uMarta wakhathazeka ngawo woke umsebenzi ebekumele awenze, yeke wathi kuJesu: “Kosi, awukhathazeki bona udadwethu ungiliselele ngomsebenzi omkhulu kangaka na? Mtjele bona azongisiza!”

⁴¹ IKosi yamphendula yathi: “Marta, Marta-ke! Ukhathazeka bewuwurubajeke ngezinto ezinengi,

⁴² kodwana kunye kwaphela okufunekako: UMariya ukhethe okungcono, yeke angekhe emukwa khona.”