ULUKASI 1 - IsiNdebele 2012 Translation

Isingeniso

¹ Abanengi baba nokuzimisela kobana batlole umlando wezehlakalo ezizalisekileko phakathi kwethu,

² njengombana sazinikelwa ngilabo okwathi kusukela ekuthomeni baba bofakazi kanye neenceku zelizwi.

³ Ngalokho-ke nami, ngemva kokuhlolisisa koke kusukela ekuthomeni, ngiqunte ukukutlolela umlando ohlelekileko wena Theyofilusi odumileko

⁴ ukuze wazi iqiniso loke ngezinto oyalwe ngazo.

Ukubelethwa kwakaJwanisi uMbhabhadisi kuyabikezelwa

⁵ Emihleni kaHerode ikosi yeJudiya, bekukhona umphristi, ibizo lakhe linguZakariya, ogade alilunga lobuphristi baka-Abiya. Umkakhe bekungu-Elisabethi, naye asizukulwana saka-Aroni.

⁶ Bobabili bebalungile phambi koZimu, balandela yoke imiyalo neemiso zakaSomnini.

⁷ Kodwana bebanganabantwana ngombana u-Elisabethi gade ayinyumba begodu bobabili besele baluphele.

⁸ Kwathi ngelinye ilanga uZakariya asenza umsebenzakhe wobuphristi ngethempelini phambi kwakaZimu,

⁹ wakhethwa ngefumbe ukuya ngokomkhuba wobuphristi kobana angene ngethempelini ayokutjhisela uSomnini itjhwalo.

¹⁰ Nakufika isikhathi sokutjhisa itjhwalo, woke umkhambathi wahlangana, wathandaza ngaphandle.

¹¹ Ingilozi kaSomnini yazibonakalisa kuye, ijame ngesigomeni se-aldari letjhwalo.

¹² Kwathi bona uZakariya ayibone, wethuka wafikelwa kukwesaba.

¹³ Kodwana ingilozi yathi kuye: “Ungesabi Zakariya! Umthandazwakho uzwakele. Umkakho u-Elisabethi uzakubelethela indodana; uyithiye ibizo bona nguJwanisi.

¹⁴ Izakuba lithabo nokuthokoza kuwe begodu abanengi bazakujekezela ngebanga lokubelethwa kwayo

¹⁵ ngombana izakuba yikulu emehlweni kaSomnini. Ingaseli iwayini namkha esinye nesinye isiselo esiwunyelweko. Izakuzaliswa ngoMoya oCwengileko kwekubelethweni kwayo.

¹⁶ Izakubuyisela inengi labantu bakwa-Israyeli kuSomnini uZimabo.

¹⁷ Yeke izakukhamba phambi kweKosi ngommoya nangamandla ka-Eliya kobana itjhugululele iinhliziyo zaboyise ebantwaneni, kuthi abangalaleliko batjhugulukele ekuhlakanipheni kwabalungileko. Godu izakwenza bona isizwe silungele iKosi.”

¹⁸ UZakariya wabuza ingilozi wathi: “Nginesiqiniseko siphi ngalokhu na? Sengiyindoda elupheleko, nomkami selaluphele.”

¹⁹ Ingilozi yamphendula yathi: “NginguGabhariyeli; ngijame ebukhoneni bakaZimu. Ngithunywe bona ngizokhuluma nawe, ngikutjele iindaba ezimnandezi.

²⁰ Qala-ke, njengombana ungazange ukholwe amezwami azakuzaliseka ngesikhathi sawo, uzakuba simumu ungakghoni ukukhuluma bekube kumhlana kuphethakalako lokhu.”

²¹ Kwenzeka koke lokhu nje, abantu bebasoloko balindele uZakariya, bararekile bona uhlaleleni kangaka ngethempelini.

²² Wathi naphumako, wabhalelwa kubakhulumisa. Yeke balemuka bona ubone umbono ngethempelini ngombana bekalokhu abenzela amatshwayo kodwana abhalelwa kuphimisela.

²³ Kwathi bona kuphele isikhathi somsebenzakhe ngethempelini, wabuyela ekhaya.

²⁴ Ngemva kwamalanga lawo umkakhe u-Elisabethi waba sidisi. Wahlala iinyanga ezihlanu zoke azifihlile.

²⁵ Wathi: “Ekhu! USomnini ungenzele lokhu. Ube nomusa kimi, wasusa ihlazo lami ebengiseze ngilithwele hlangana nabantu.”

Ukubikezelwa kokubelethwa kwakaJesu

²⁶ Enyangeni yesithandathu, uZimu wathumela ingilozi uGabhariyeli edorobheni leGalile ekuthiwa yiNazaretha,

²⁷ entombini ebegade yethenjiswe ukuthathwa lisokana ebekuthiwa nguJosefa, osizukulwana sakaDavida. Ibizo lentombi leyo belinguMariya.

²⁸ Ingilozi yeza kuye yathi: “Lotjha wena othandekileko! USomnini unawe!”

²⁹ Kodwana uMariya watshwenyeka khulu ngomlayezo lo, wazibuza bona kulotjhisa okunjani-ke lokhu.

³⁰ Ingilozi yathi kuye: “Ungesabi Mariya ngombana ufumene umusa emehlweni kaZimu.

³¹ Uzakuba sidisi, ubelethe indodana, uzayithiya ibizo bona nguJesu.

³² Izakuba yikulu, ibizwe bona yiNdodana kaZimu ongoPhezulu. USomnini uZimu uzayinikela isihlalo sobukhosi sakayise uDavida.

³³ Izakubusa phezu kwekumba kaJakopo ngokungapheliko. Umbuswayo angekhe waphela!”

³⁴ UMariya wabuza ingilozi wathi: “Lokhu kungenzeka njani ngombana azange khengihlangane nendoda?”

³⁵ Ingilozi yamphendula yathi: “UMoya oCwengileko uzakuba phezu kwakho, namandla wongoPhezulu azakusibekela. Yeke ocwengileko ozakubelethwa uzakubizwa bona yiNdodana kaZimu.

³⁶ Ngitjho nesihlobo sakho u-Elisabethi usidisi nanyana sele amdala nje. Sele aphethe inyanga yesithandathu, yena lo ebekuthiwa uyinyumba

³⁷ ngombana ayikho into engenzekiko kuZimu.”

³⁸ UMariya waphendula wathi: “Ngiyincekukazi kaSomnini, akwenzeke kimi njengombana utjhwile!” Yeke ingilozi yasuka kuye.

UMariya uthekela u-Elisabethi

³⁹ Ngesikhatheso uMariya wazilungiselela waya edorobheni leJudiya elingenarheni yeentatjana.

⁴⁰ Wafika lapho wangena kwaZakariya, walotjhisa u-Elisabethi.

⁴¹ Kwathi bona u-Elisabethi ezwe ukulotjhisa kwakaMariya, umntwana weqayeqa ngesibelethweni sakhe. U-Elisabethi wazaliswa ngoMoya oCwengileko.

⁴² Warhuwelela ngelizwi elikhulu wathi: “Ubusisiwe hlangana nabafazi, sibusisiwe nesithelo sesibeletho sakho!

⁴³ Kubayini ngithandwe kangaka bona ngithekelwe ngunina leKosami na?

⁴⁴ Kuthe nje nangizwa ukulotjhisa kwakho, umntwana wathaba beweqayeqa ngaphakathi kwami.

⁴⁵ Ubusisiwe umfazi ofese wakholwa bonyana okutjhiwo nguSomnini kuye kuzakuzaliseka!”

Ukudumisa kwakaMariya

⁴⁶ UMariya wathi: “Umphefumulwami udumisa uSomnini.

⁴⁷ Ummoyami uyenama kuZimu uMsindisami

⁴⁸ ngombana ungikhumbulile, mina ncekukazi yakhe enyazekako. Kusukela kwanjesi, zoke iinzukulwana zizongibiza ngobusisiweko,

⁴⁹ ngombana ongoPhezulu, ungenzele okukhulu. Ibizo lakhe licwengile.

⁵⁰ Umusakhe ungowabamesabako, iinzukulwana ngeenzukulwana.

⁵¹ Ukhombise amandlakhe ngengalwakhe, wahlakaza abakhukhumeleko emizindlwenabo.

⁵² Wehlise amakhosi eenhlalweni zawo, waphakamisa abathobekileko.

⁵³ Usuthise abalambileko ngokuhle, iinkhumkani waziqotjha zimkhonoze.

⁵⁴ Uyisizile incekwakhe u-Israyeli, wakhumbula isirhawu sakhe,

⁵⁵ njengombana athembisa ku-Abrahamu nakizo zoke iinzukulwana zakhe ngokungapheliko.”

⁵⁶ UMariya wahlala pheze iinyanga ezintathu no-Elisabethi, wabuyela ekhaya.

Ukubelethwa kwakaJwanisi uMbhabhadisi

⁵⁷ Kwathi nakufika isikhathi sokobana u-Elisabethi abelethe, wabeletha indodana.

⁵⁸ Abomakhelwana kanye neenhlobo zakhe zezwa bona uSomnini umenzele isirhawu esikhulu, zathaba kanye naye.

⁵⁹ Ngelanga lobunane zeza bona zizokusoka umntwana, yeke bezizomthiyelela ngoyise uZakariya,

⁶⁰ Kodwana unina wathi: “Awa! Ibizo lakhe lizakuba nguJwanisi.”

⁶¹ Zathi kuye: “Kodwana akukho noyedwa hlangana neenhlobo zakho onebizo elinjalo.”

⁶² Zakhuluma noyise ngezandla, zambuza bona yena angathanda ibizo lomsana libe ngubani na.

⁶³ UZakariya wakhombela umqebethu wokutlolela, watlola wathi: “Ibizo lakhe nguJwanisi.” Barareka boke.

⁶⁴ Khonokho umlomakhe wavuleka nelimu lakhe lararuluka, wathoma ukukhuluma, wadumisa uZimu.

⁶⁵ Boke abomakhelwana behlelwa kukwesaba bekwathi kiyo yoke inarha yeentatjaneni zeJudiya, abantu bakhuluma ngeendabezi.

⁶⁶ Woke owakuzwako lokho wazindla ngakho wabuza wathi: “Alo, umntwana lo uzokuba yini na?” Isandla sakaSomnini besiphezu kwakhe.

Isiphorofido sakaZakariya

⁶⁷ Khonapho uZakariya uyise wagcwala ngoMoya oCwengileko, waphorofida wathi:

⁶⁸ “Akadunyiswe uSomnini, uZimu ka-Israyeli! Ngambala ube nesirhawu, wahlenga abantu bakhe.

⁶⁹ Usivusele uMsindisi onamandla ngekumbeni yencekwakhe uDavida,

⁷⁰ njengombana akhuluma ekadeni ngomlomo wabaphorofidi bakhe abacwengileko

⁷¹ bonyana sizakusindiswa ezitheni zethu nemandleni wabo boke abasizondako.

⁷² Ngalokho ukhombise isirhawu asithembisa abokhokho bethu, wakhumbula isivumelwano sakhe esicwengileko

⁷³ okusifungo asifunga kukhokho wethu u-Abrahamu

⁷⁴ sokobana uzosenyela ezandleni zezitha zethu, asivumele simlotjhe ngaphandle kokwesaba,

⁷⁵ ngokucwenga nangokulunga, ebusweni bakhe imihla yoke yokuphila kwethu.

⁷⁶ “Wena mntanami, uzakubizwa bona umphorofidi wongoPhezulu ngombana uzakukhamba phambi kweKosi, uyilungisele indlela,

⁷⁷ kobana utlhadlhule abantu bayo mayelana nelwazi lesindiso ngokuthethelelwa kwezono zabo.

⁷⁸ Ngesirhawu esikhulu sakaZimethu, ukusa kuzakudabuka kuvela phezulu,

⁷⁹ kukhanyisele abaphila ebumnyameni nethunzini lokufa, kunqophise iinyawo zethu endleleni enokuthula.”

⁸⁰ Umntwana wakhula, waqina emmoyeni. Wahlala erhalawumbeni bekwaba kumhlana abonakala tjhatjhalazi kwa-Israyeli.