ULEVITIKUSI 9 - IsiNdebele 2012 Translation

Abaphristi basungula umsebenzabo

¹ Kwathi ngelanga lokugcina lokujanyiswa kwabaphristi uMosi wabiza u-Aroni namadodanakhe kanye nabaphathi bakwa-Israyeli,

² wathi ku-Aroni: “Thatha ikunzana ibe mhlabelwakho wehlambululo neqama libe mhlabelwakho wokutjhiswa, kokubili kube msulwa, ukulethe kuSomnini.

³ Nje-ke khuluma nama-Israyeli uthi, ‘Lethani ipongo ibe mhlabelo wehlambululo, ikunzana neqama okunomnyaka owodwa nokumsulwa, kube mhlabelo wokutjhiswa,

⁴ ikunzana neqama kube mihlabelo yetjhebiswano ehlatjelwa phambi kwakaSomnini kanye nomnikelo weenthoro ohlanganiswe ngamafutha we-oliva. Iye, khona namhlanje uSomnini uzozibonakalisa kini.’ ”

⁵ Baletha koke lokho uMosi ayala ngakho phambi kwetende lokuhlanganela, umkhambathi nawo wabandamela, wajama phambi kwakaSomnini.

⁶ Nje-ke uMosi wathi: “Okuzakwenziwa nje, yinto uSomnini ayale bona yenziwe ukuze iphazimulwakhe ibonakale kini.”

⁷ UMosi wathi ku-Aroni: “Tjhidela e-aldarini unikele umhlabelwakho wehlambululo kanye newokutjhiswa, uzenzele itethelelo, wena nomndenakho. Nikela umhlabelo ongowabantu ubenzele itethelelo njengombana uSomnini ayalile.”

⁸ Nje-ke, u-Aroni watjhidela e-aldarini wafese wahlaba ikunzana yomhlabelwakhe wehlambululo.

⁹ Amadodanakhe amnikela iingazi, watlubhuza umunwakhe kizo, wazininda eempundwini ze-aldari. Iingazi eziseleko wazithululela emanzinzweni we-aldari.

¹⁰ Watjhisa umhlwehlwe, iziso nepundu yesibindi somhlabelo wehlambululo e-aldarini. Kwaba njengombana uSomnini ayale uMosi.

¹¹ Inyama nesikhumba wazitjhisela ngaphandle kwekampa.

¹² Godu wahlaba umhlabelo wokutjhiswa. Amadodanakhe amnikela iingazi, wazifafaza mahlangothi woke we-aldari.

¹³ Amlethela nomhlabelo wokutjhiswa ngezitho zawo kanye nehloko yakhona; wawutjhisa e-aldarini.

¹⁴ Wahlanza iinredlo neenqatha, nazo wazitjhisela phezu komhlabelo wokutjhiswa e-aldarini.

¹⁵ Nje-ke u-Aroni watjhideza imihlabelo yabantu. Wathatha ipongo yomhlabelo wehlambululo, wayihlaba wabenzela ihlambululo njengombana enze ekuthomeni ngomhlabelwakhe wehlambululo.

¹⁶ Wenza umhlabelo wokutjhiswa njengokomyalo.

¹⁷ Godu waletha nomnikelo weenthoro: Wanghwatha kiwo isandla, wawutjhisa phezu kwe-aldari. (Lokhu bekungafani nomhlabelo wokutjhiswa ebewulethwa ekuseni. )

¹⁸ U-Aroni wahlaba ikunzana neqama kwaba mihlabelo yabantu yetjhebiswano. Amadodanakhe amnikela iingazi wazifafaza mahlangothi woke we-aldari.

¹⁹ Amafutha wekunzi neweqama, okumsila ononileko, umhlwehlwe owembese iinredlo, iziso nepundu yesibindi,

²⁰ amadodanakhe awabeka phezu kweemfuba zemihlabelo yetjhebiswano. U-Aroni watjhisa woke amafutha lawo e-aldarini

²¹ kodwana iimfuba nomlenze wangesidleni wakuphakamisa njengomnikelo osibiko kuSomnini. Kwaba njengombana uMosi ayalile.

²² Nje-ke u-Aroni waphakamisela izandla zakhe ngebantwini wababusisa. Njengombana gade sele aqede ukunikela umhlabelo wehlambululo, wokutjhiswa kanye nowetjhebiswano, wasuka e-aldarini.

²³ UMosi no-Aroni bangena ngetendeni lokuhlanganela. Kwathi lokha nabaphumako, babusisa abantu. Iphazimulo kaSomnini yabonakala ebantwini boke:

²⁴ Khonapho kwehla umlilo uvela kuZimu waqothula umhlabelo wokutjhiswa namafutha e-aldarini. Boke abantu nababona lokho, bahlokoma ngelizwi elikhulu, bawa ngobuso phasi.