ULEVITIKUSI 8 - IsiNdebele 2012 Translation

Ukujanyiswa kwaka-Aroni namadodanakhe

¹ USomnini wakhuluma noMosi wathi:

² “Yewize no-Aroni namadodanakhe, izambatho zabo, amafutha wokuzesa, ikunzana yomhlabelo wehlambululo, amaqama amabili kanye nomqebethu onezikwa ezinganangumelo,

³ bese uhlanganisa umkhambathi woke emnyango wetende lokuhlanganela.”

⁴ Mbala uMosi wenza njengombana uSomnini amyalile, umkhambathi nawo wabuthana emnyango wetende lokuhlanganela.

⁵ UMosi wathi kumkhambathi: “Okuzakwenziwa nje, yinto uSomnini ayale bona yenziwe.”

⁶ Nje-ke watjhideza u-Aroni namadodanakhe bewabahlambulula ngamanzi.

⁷ Wembesa u-Aroni iphuraphura, wambopha edinini ngomkhungo wokuthekeleza, wamembathisa ijasi ekhambisana ne-efodi bewameleka nge-efodi wayibopha ngebhande endawenayo.

⁸ Wamfaka iporiyana yomphristi bewabeka ngembadeni yeporiyana amatje wefumbe okuyi-urimi nethumimi.

⁹ Ehloko wamthwesa ingwani yomphristi wabophelela ithuthumbo legolidembala okutjho isihlohlo esahlukaniselweko. Kwaba njengombana uSomnini ayale uMosi.

¹⁰ Nje-ke uMosi wathatha amafutha wokuzesa, wazesa ngawo ithaberinakeli nakho koke okungaphakathi, walihlukanisela.

¹¹ Enye ingcenye yamafutha wayifafaza e-aldarini kalikhomba, wazesa i-aldari nakho koke okusetjenziswa kilo kanye nesitja sokuhlambela nesinzinziso saso ukuze kwahlukaniselwe.

¹² Amanye amafutha wawathela ehloko ka-Aroni, wamzesa bona amhlukanisele.

¹³ Watjhideza amadodana ka-Aroni, wawembesa iimphuraphura zabaphristi, wawabopha emadinini ngemikhungo yokuthekeleza bewawathwesa iingwani. Kwaba njengombana uSomnini ayale uMosi.

¹⁴ Waletha ikunzana yomhlabelo wehlambululo. U-Aroni namadodanakhe babeka izandla zabo phezu kwehlokwayo.

¹⁵ Nje-ke uMosi wahlaba ikunzana leyo, wathatha ingcenye yeengazi zekunzana wazininda phezu kweempundu ezisemajikeni we-aldari ngomunwakhe bona alihlambulule. Iingazi eziseleko wazithululela emanzinzweni we-aldari. Ngendlela leyo-ke, walihlukanisela ngokulenzela itethelelo.

¹⁶ UMosi wathatha woke umhlwehlwe owembese iinredlo, ipundu yesibindi, iziso zombili nomhlwehlwe wakhona, wakutjhisa e-aldarini.

¹⁷ Kodwana yoke ikunzana, okutjho isikhumba sayo, inyama nomswani wakhona, wakutjhisela ngaphandle kwekampa. Kwaba njengombana uSomnini ayale uMosi.

¹⁸ Wabese utjhideza iqama lomhlabelo wokutjhiswa. U-Aroni namadodanakhe babeka izandla zabo phezu kwehlokwalo.

¹⁹ Nje-ke uMosi walihlaba, wafafaza iingazi zalo magegana ne-aldari.

²⁰ Walihlahlela bewatjhisa ihloko, izitho nomhlwehlwe.

²¹ Wahlanza iinredlo neenqatha ngamanzi wabese utjhisa iqamelo loke e-aldarini. Lokhu bekumhlabelo wokutjhiswa okumnikelo okhethekileko, owamukeleka kuSomnini. Kwaba njengombana uSomnini ayale uMosi.

²² Watjhideza godu elinye iqama okuliqama abajanyiswa ngalo. U-Aroni namadodanakhe babeka izandla zabo phezu kwehlokwalo.

²³ UMosi wahlaba iqamelo, wathatha ingcenye yeengazi zalo, wazininda endlebeni yangesidleni ka-Aroni, kuthubha wangesidleni nakuthubhakghuru wangesidleni.

²⁴ Watjhideza amadodana ka-Aroni wafese waninda eendlebeni zawo zangesidleni, kibothubha bawo bangesidleni nakibothubhakghuru bawo bangesidleni. Iingazi eziseleko wazifafaza magegana ne-aldari.

²⁵ Wathatha amafuthalo okutjho amanoni womsila nomhlwehlwe weenredlo woke, ipundu yesibindi, iziso zombili nomhlwehlwe wakhona kanye nomlenze wangesidleni,

²⁶ ngesiqwebini sesikwa esinganangumelo ebesibekwa phambi kwakaSomnini wathatha sinye isikwa esilisongo, nasinye esihlanganiswe ngamafutha we-oliva kanye nasinye esisipara, wakubeka phezu kwamafutha weqama naphezu komlenze wangesidleni;

²⁷ koke lokhu wakubeka ezandleni zaka-Aroni nezamadodanakhe. Bakuphakamisa njengomnikelo osibiko kuSomnini.

²⁸ Yeke uMosi wakuthatha ezandleni zabo wakutjhisa e-aldarini phezu komhlabelo wokutjhiswa. Lokhu bekumhlabelo wokujanyiswa, okumnikelo okhethekileko, owamukeleka kuSomnini.

²⁹ Wathatha godu isifuba seqama wasiphakamisa njengomnikelo osibiko kuSomnini. Isifuba seqama lokujanyisweso bekusisabelo sakhe. Kwaba njengombana uSomnini ayale uMosi.

³⁰ UMosi wathatha ingcenye yamafutha wokuzesa nengcenye yeengazi ezise-aldarini wafafaza phezu kwaka-Aroni nezambatho zakhe, naphezu kwamadodanakhe nezambatho zawo. Njalo-ke wahlukanisela u-Aroni nezambatho zakhe, amadodanakhe kanye nezambatho zawo.

³¹ UMosi wathi ku-Aroni namadodanakhe: “Phekelani inyama emnyango wetende lokuhlanganela bese niyigomela khonapho nesikwa esingesiqwebini sokujanyiswa ngombana ngayalwa kwathiwa, ‘Asidliwe ngu-Aroni namadodanakhe.’

³² Kodwana woke amasalela wenyama newesikwa niwatjhise.

³³ Ningasuki ebungenweni betende lokuhlanganela bekube malanga alikhomba, ukufikela lapha kuphela khona amalanga wokujanyiswa kwenu. Iye, ukujanyiswa kufuze kuthathe amalanga alikhomba.

³⁴ USomnini wayala bona okwenziwe namhlanjesi kwenziwe amalanga alikhomba kobana nenzelwe itethelelo.

³⁵ Kufuze nihlale ebungenweni betende lokuhlanganela imini nobusuku amalanga alikhomba. Gcinani imiyalo kaSomnini ukuze ningafi ngombana ngilokho nami engayalwa ngakho.”

³⁶ Nje-ke u-Aroni namadodanakhe benza koke uSomnini akuyala ngoMosi.