ULEVITIKUSI 7 - IsiNdebele 2012 Translation

Umyalo wabaphristi mayelana nomhlabelo wehlawulo nesabelo sabo

¹ “Naku umyalo womhlabelo wehlawulo: Lowo kumhlabelo ocwenge khulu.

² Umhlabelo wehlawulo kufuze uhlatjelwe lapha kuhlatjelwa khona umhlabelo wokutjhiswa. Iingazi zawo zifafazwe mahlangothi woke we-aldari.

³ Woke umhlwehlwe wawo kufuze kunikelwe ngawo. Lokho kutjho umsila ononileko, umhlwehlwe owembese iinredlo,

⁴ iziso zombili nomhlwehlwe wakhona, amanoni wesifunzi kanye nepundu yesibindi ekufuze ikhutjhwe neziso.

⁵ Umphristi akutjhise koke lokho phezu kwe-aldari kube mnikelo okhethekileko kuSomnini. Lokho kumhlabelo wehlawulo.

⁶ Boke abaduna phakathi kwabaphristi bangawudla. Abawudlele endaweni ecwengileko ngombana kumhlabelo ocwenge khulu.

⁷ “Umyalo womhlabelo wehlawulo usebenza ngokufana nowehlambululo: Uzakuba ngowomphristi owenzela umuntu itethelelo ngawo.

⁸ Umphristi owenzela umuntu umhlabelo wokutjhiswa angazithathela isikhumba somhlabelo lowo.

⁹ Woke umnikelo weenthoro obhagwe nge-ondweni, ophekwe ngesithetjhelelo namkha edendelekweni, ungowomphristi osebenza e-aldarini.

¹⁰ Kodwana woke umnikelo weenthoro ongakaphekwa, kungaba ngodutjwe ngamafutha we-oliva namkha owomileko ungowamadodana ka-Aroni begodu kufuze bawabelane.”

Umyalo wabaphristi mayelana nomhlabelo wetjhebiswano

¹¹ “Naku umyalo womhlabelo wetjhebiswano ongahle ulethwe kuSomnini:

¹² Nakube umuntu uwunikela ngokutjengisa ukuthokoza anakho, kufuze anikele ngezikwa ezimasongo ezidutjwe ngamafutha we-oliva, izikwa ezisipara ezitjhatjhwe ngamafutha we-oliva nezikwa ezimasongo zeflowuru esefiweko ehlanganiswe kuhle ngamafutha we-oliva. Izikwezo zingabi nengumelo.

¹³ Emnikelweni wezikwa awuletha nomhlabelo wetjhebiswano athokoza ngawo, kufuze angezelele izikwa ezimasongo eziwunyelweko.

¹⁴ Komunye nomunye umhlobo wesikweso, sinye saso kufuze sibe mnikelo kaSomnini. Lokho kungokomphristi ofafaza iingazi zomhlabelo wetjhebiswano.

¹⁵ Inyama yomhlabelo wetjhebiswano umuntu awunikela ngokuthokoza kufuze idliwe ngelanga enikelwa ngalo, angayitjhiyeli ikusasa.

¹⁶ “Kodwana nakube umhlabelo olethwa mumuntu ungebanga lesifungo namkha ungowesihle kufuze udliwe ngelanga awunikela ngalo, okuseleko kudliwe ngelanga elilandelako.

¹⁷ Yoke inyama yomhlabelo esalako bekube lilanga lesithathu, kufuze itjhiswe.

¹⁸ Nakube inyama yomhlabelo wetjhebiswano idliwa ngelanga lesithathu, umuntu olethe umhlabelo lowo angeze amukeleka begodu angeze wambhadekela. Inyama leyo isinyenyiso begodu nanyana ngubani oyidlako uzazizwa.

¹⁹ “Inyama yomhlabelo wetjhebiswano ethinta nanyana yini into engakahlambuluki ingeze yadliwa, kufuze itjhiswe. Inyama yomhlabelo wetjhebiswano idliwa ngohlambulukileko kwaphela.

²⁰ Umuntu ongakahlambuluki odla inyama yomhlabelo wetjhebiswano owenzelwe uSomnini, akajutjwe ebantwini bekhabo.

²¹ Iye, nanyana ngubani othinta into engakahlambuluki, kungaba mumuntu, isilwana namkha ngikuphi okunyenyisako bese udla inyama yomhlabelo wetjhebiswano owenzelwe uSomnini, akajutjwe ebantwini bekhabo.”

Umhlwehlwe, amanoni neengazi akungadliwa

²² USomnini wakhuluma noMosi wathi

²³ akakhulume nama-Israyeli athi: “Nakumhlwehlwe namanoni akungadliwa, kungaba ngewekomo, wemvu namkha wembuzi.

²⁴ Amanoni wesilwana esifunyenwe sidindilizile namkha sidatjulwe ziimbandana, angasetjenziselwa nanyana ngiliphi ibanga, kodwana angadliwa nakancani.

²⁵ Nanyana ngubani odla umhlwehlwe womnikelo okhethekileko kuSomnini akajutjwe ebantwini bekhabo.

²⁶ Ningalingi nidle inyama isese neengazi, kungaba ngezenyoni namkha zesilwana kuphi nakuphi lapha nizakuhlala khona.

²⁷ Umuntu odla nanyana ngiziphi iingazi akajutjwe ebantwini bekhabo.”

Isabelo sabaphristi

²⁸ USomnini wakhuluma noMosi wathi

²⁹ akakhulume nama-Israyeli athi kiwo: “Umuntu onikela umhlabelo wetjhebiswano, akanikele ingcenye yawo kuSomnini.

³⁰ Akube zizandla zakhe eziletha umnikelo okhethekileko kuSomnini. Alethe umhlwehlwe, amanoni nesifuba ukuze isifubeso siphakanyiswe njengomnikelo osibiko kuSomnini.

³¹ Umphristi uzabese utjhisa umhlwehlwe namanoni e-aldarini, kodwana isifuba singesika-Aroni namadodanakhe.

³² Umlenze wangesidleni womhlabelo wetjhebiswano awunikelwe umphristi ube sibiko sakhe,

³³ okutjho indodana ka-Aroni enikela ngeengazi, umhlwehlwe namanoni womhlabelo e-aldarini. Umlenze wangesidleni uzakuba sisabelo sayo.

³⁴ Iye, isifuba nomlenze okuphakanyiswa njengomnikelo osibiko ngikuthethe emihlabelweni yetjhebiswano yama-Israyeli, ngakunikela u-Aroni umphristi omkhulu namadodanakhe bona kube simiso sanini nanini kuma-Israyeli.

³⁵ “Lokhu kusisabelo saka-Aroni namadodanakhe esithethwe eminikelweni ekhethekileko kaSomnini ukusuka ngelanga abahlukaniselwa ngalo bona babe baphristi bakaSomnini.

³⁶ USomnini wayala bonyana banikelwe isifuba nomlenze ngelanga abazeswa ngalo. Lokhu kuzakuba simiso esijame nini nanini sama-Israyeli iinzukulwana ngeenzukulwana.”

³⁷ Leyo-ke miyalo emayelana nomhlabelo wokutjhiswa, umnikelo weenthoro, umhlabelo wehlambululo, umhlabelo wehlawulo, umhlabelo wokuhlukaniselwa kanye nomhlabelo wetjhebiswano,

³⁸ uSomnini awunikela uMosi phezu kwentaba yeSinayi erhalawumbeni mhlana ayala ama-Israyeli bona alethe umnikelo kuye.