ULEVITIKUSI 6 - IsiNdebele 2012 Translation

¹ Godu uSomnini wakhuluma noMosi wathi:

² “Nangabe umuntu wona ngokwenza isiphambeko kuSomnini ngokuba nobuqili emuntwini womphakathi ngento esiswe kuye netjhiywe kuye bona ayitjheje, ngokumgalaja, ngokumdlelezela

³ namkha ngokufunyana into yomuntu womphakathi ilahlekile bese ufunga ngekohliso ngananyana yini yezintwezi umuntu angona ngazo phambi kwakaSomnini,

⁴ nakubanyana wona ngendlela enjalo kodwana azizwe anomlandu, akabuyisele akwebileko, akuthethe ngokudlelezela, lokho egade kusiswe kuye namkha ipahla ayifunyene ilahlekile

⁵ okutjho nanyana yini afunge ngakho ngekohliso. Kufuze abuyise lokho kuphelele, abe angezelele ngokwesihlanu sobungako bepahla leyo. Akakubuyisele kumninipahla ngelanga aletha ngalo umhlabelwakhe wehlawulo.

⁶ Kufuze alethe ihlawulo kuSomnini okuliqama elimsulwa alithethe emhlambinakhe. Iqama aliletha njengomhlabelo wehlawulo alibe nobungako besiliva obubekwa mphristi.

⁷ Ngendlela leyo umphristi uzabe enzela umuntu loyo itethelelo kuSomnini. Ngalokho uzakuhlambuluka kinanyana ngiyiphi yezinto okuthi umuntu nakayenzileko abe nomlandu.”

Umyalo wabaphristi mayelana nomhlabelo wokutjhiswa

⁸ USomnini wakhuluma noMosi wathi

⁹ akayale u-Aroni namadodanakhe athi: “Naku umyalo womhlabelo wokutjhiswa: Umhlabelo wokutjhiswa kufuze uhlale ezikweni le-aldari ubusuku boke, godu nomlilo uhlale uvutha phezu kwe-aldari. Ekuseni

¹⁰ umphristi embathe iphuraphurakhe yelineni, athekeleze nedzeredzere ngaphasi kwayo, akhuphe umlotha womhlabelo wokutjhiswa otjhiswe mlilo phezu kwe-aldari awuthululele eqadi kwalo.

¹¹ Uzabese uhlubula izambatho zakhe afake ezinye. Nje-ke uzakuwola umlotha ayowulahlela ngaphandle kwekampa endaweni ekhethekileko.

¹² Awuhlale uvutha umlilo phezu kwe-aldari, ungacimi. Njalo ekuseni umphristi kufuze abaselele umlilo abese ulungisa umhlabelo wokutjhiswa phezu kwawo, godu atjhise nemihlwehlwe yemihlabelo yetjhebiswano emlilweni lowo.

¹³ Iye, umlilo kufuze uhlale uvutha njalo phezu kwe-aldari, ungacimi.”

Umyalo wabaphristi mayelana nomnikelo weenthoro

¹⁴ “Naku umyalo womnikelo weenthoro: Amadodana ka-Aroni kufuze alethe umnikelo lowo kuSomnini ngaphambi kwe-aldari.

¹⁵ Umphristi uzakunghwatha isandla seflowuru esefiweko enamafutha we-oliva kanye namakha woke aphezu komnikelo weenthoro. Koke uzakutjhisa e-aldarini kube sisabelo sesikhumbuzo. Lokho kumnikelo owamukeleka kuSomnini.

¹⁶ U-Aroni namadodanakhe bazakudla koke okuseleko. Kufuze kudliwe kunganangumelo endaweni ecwengileko ngesirhodlweni setende lokuhlanganela.

¹⁷ Kungaphekwa ngengumelo. Ngikunikele abaphristi bona kube sisabelo sabo. Njengomhlabelo wehlambululo newehlawulo umnikelo lowo ungocwenge khulu ngombana bewulethwa njengomnikelo okhethekileko kuSomnini.

¹⁸ Boke abaduna baka-Aroni bangakudla. Eminikelweni ekhethekileko kuSomnini lokhu kuzakuba sisabelo sabo sanini nanini eenzukulwaneni ezizako. Nanyana yini ethinta umnikelo lowo izakuba ngecwengileko.”

¹⁹ Godu uSomnini wakhuluma noMosi wathi:

²⁰ “Naku umnikelo ekufuze ulethwe ngu-Aroni namadodanakhe kuSomnini ngelanga azeswa ngalo: isitjhutjana seflowuru esefiweko kube mnikelo weenthoro wangemihla, ingcenye ekuseni nengcenye ngamarhwaqela.

²¹ Awuhlanganiswe kuhle namafutha we-oliva, ubhagwe phezu kwedengela. Awuhletjhulwe ube ziinquqwana kube mnikelo owamukeleka kuSomnini.

²² Awulungiswe yindodana ezakulandela u-Aroni esikhundleni sokuba mphristi ozesiweko. Umnikelo lowo utjhiswe woke ngombana ungokaSomnini isiphelani.

²³ Woke uminikelo weenthoro olethwa mphristi uzakutjhiswa ngokupheleleko, awungadliwa.”

Umyalo wabaphristi mayelana nomhlabelo wehlambululo

²⁴ USomnini wakhuluma noMosi godu wathi

²⁵ akakhulume no-Aroni namadodanakhe athi: “Naku umyalo womhlabelo wehlambululo: Umhlabelo wehlambululo kufuze uhlatjelwe phambi kwakaSomnini endaweni lapha kuhlatjelwa khona umhlabelo wokutjhiswa. Lowo kumhlabelo ocwenge khulu.

²⁶ Umphristi owunikelako akawudle. Kufuze udlelwe endaweni ecwengileko ngesirhodlweni setende lokuhlanganela.

²⁷ Nanyana yini ethinta inyama leyo izakuba ngecwengileko. Begodu nanyana ngiziphi iingazi zomhlabelo lowo ezithontela esambathweni kufuze sihlanzelwe endaweni ecwengileko.

²⁸ Ipoto yomdaka ebekuphekwe ngayo ayiphadlhwe. Kodwana nakube bekuphekwe ngeyekoporo, ayiphalwe kuhle iyakazwe ngamanzi.

²⁹ Boke abaduna emndenini wobuphristi bangayidla. Lokho kumnikelo ocwenge khulu.

³⁰ Kodwana nanyana ngimuphi umhlabelo wehlambululo okulethwa iingazi zawo etendeni lokuhlanganela bona kwenzelwe itethelelo ngawo endaweni ecwengileko akukafuzi udliwe, kodwana utjhiswe.”