ULEVITIKUSI 4 - IsiNdebele 2012 Translation

Umhlabelo wehlambululo

¹ USomnini wakhuluma noMosi wathi kuye

² akakhulume nama-Israyeli athi kiwo: “Nanyana ngubani owona ngokungakahlosi ngokwenza okuphambene neminye yemiyalo kaSomnini, akaphathwe nganasi indlela:

³ “Nangabe kona umphristi ozesiweko, abangele abantu umlandu, akalethe ikunzana emsulwa kuSomnini kube mhlabelwakhe wehlambululo mayelana nesono asenzileko.

⁴ Akalethe ikunzana leyo phambi kwakaSomnini emnyango wetende lokuhlanganela. Abeke isandla sakhe phezu kwehloko yekunzana bese uyihlabela phambi kwakaSomnini.

⁵ Yeke umphristi ozesiweko uzakuthatha ezinye zeengazi zekunzana leyo angene nazo ngetendeni lokuhlanganela.

⁶ Kufuze atlubhuze umunwakhe ngeengazinapho bese ufafaza ezinye zazo kalikhomba phambi kwakaSomnini ngaphambi kwesiyaya sendawo ecwengileko.

⁷ Godu umphristi uzabese uninda ezinye iingazi phezu kweempundu ze-aldari letjhwalo phambi kwakaSomnini ngetendeni lokuhlanganela. Inengi leengazi zekunzana leyo azithululele emanzinzweni we-aldari lomhlabelo wokutjhiswa phambi komnyango wetende lokuhlanganela.

⁸ Kufuze asuse woke umhlwehlwe wekunzana yomhlabelo wehlambululo okutjho umhlwehlwe weenredlo nakho koke okuhlangene nazo,

⁹ iziso zombili nomhlwehlwe wakhona namanoni wesifunzi kanye nepundu yesibindi ekufuze ikhutjhwe neziso.

¹⁰ Koke lokho akube njengalokha nakukhutjhwa umhlwehlwe ekomeni eyenzelwa umhlabelo wetjhebiswano. Yeke umphristi uzakutjhisa lokho e-aldarini lomhlabelo wokutjhiswa.

¹¹ Kodwana isikhumba sekunzana nenyama yayo yoke, ihloko nemilenze, iinredlo nemiswanayo

¹² okutjho koke okuseleko kwekunzana kufuze akuthathe aphumele nakho ngaphandle kwekampa endaweni ekhethekileko, lapha kuthululwa khona umlotha we-aldari. Abase umlilo ezalenapho atjhise koke lokho.

¹³ “Nangabe woke umkhambathi wama-Israyeli owona ngokungakahlosi ngokweqa imiyalo kaSomnini kodwana ihlangano ingakuboni lokho bese umkhambathi lowo uzizwe unomlandu,

¹⁴ ihlangano ayilethe ikunzana njengomhlabelo wehlambululo, masinyana nasele isono somkhambathi sazekile. Kufuze ilethwe phambi kwetende lokuhlanganela,

¹⁵ bese abaphathi bomkhambathi babeka izandla zabo phezu kwehloko yekunzana, bayihlabe phambi kwakaSomnini.

¹⁶ Umphristi ozesiweko uzakuthatha ezinye zeengazi zekunzana angene nazo ngetendeni lokuhlanganela.

¹⁷ Uzakutlubhuza umunwakhe ngeengazinapho bese uzifafaza phambi kwakaSomnini kalikhomba ngaphambi kwesiyaya sendawo ecwengileko.

¹⁸ Godu umphristi uzabese uninda ezinye iingazi phezu kweempundu ze-aldari letjhwalo phambi kwakaSomnini ngetendeni lokuhlanganela. Inengi leengazi zekunzana leyo azithululele emanzinzweni we-aldari lomhlabelo wokutjhiswa phambi komnyango wetende lokuhlanganela.

¹⁹ Kuzakufanela bona asuse woke umhlwehlwe bese uwutjhisa e-aldarini.

²⁰ Lokho akwenze ngekunzana leyo yaphambilini, akakwenze nangekunzana yomhlabelo wehlambululo lo. Ngendlela leyo umphristi uzabe wenzela umkhambathi itethelelo. Ngalokho umkhambathi uzakuhlambuluka esonweni sawo.

²¹ Nje-ke uzakukhuphela ikunzana leyo ngaphandle kwekampa, ayitjhise njengombana atjhise yokuthoma. Lokho kumhlabelo wehlambululo wehlangano.

²² “Nangabe kona umrholi ngokungakahlosi ngokwenza okuphambene neminye yemiyalo kaSomnini uZimakhe bese uzizwa anomlandu,

²³ akalethe ipongo emsulwa njengomhlabelwakhe wehlambululo, masinyana nasele alemukile ngesono asenzileko.

²⁴ Uzakubeka isandla sakhe phezu kwehloko yepongo bese uyihlabela phambi kwakaSomnini lapha kuhlatjelwa khona umhlabelo wokutjhiswa. Lokho kumhlabelo wehlambululo.

²⁵ Nje-ke umphristi uzakuthatha ezinye zeengazi zomhlabelo wehlambululo ngomunwakhe azininde eempundwini ze-aldari lomhlabelo wokutjhiswa bese uthulula inengi leengazezo emanzinzweni we-aldari.

²⁶ Uzakutjhisa woke umhlwehlwe phezu kwe-aldari kube njengombana atjhisa umhlwehlwe womhlabelo wetjhebiswano. Ngendlela leyo umphristi uzabe enzela umuntu loyo itethelelo ngebanga lezono zakhe. Ngalokho uzakuhlambuluka esonweni sakheso.

²⁷ “Nangabe kona umuntukazana ngokungakahlosi ngokwenza okuphambene neminye yemiyalo kaSomnini bese uzizwa anomlandu,

²⁸ akalethe imbuzi esikazi emsulwa njengomhlabelwakhe wehlambululo, masinyana nasele alemukile ngesono asenzileko.

²⁹ Uzakubeka isandla sakhe phezu kwehloko yembuzi, ayihlabe njengomhlabelo wehlambululo lapha kuhlatjelwa khona umhlabelo wokutjhiswa.

³⁰ Nje-ke umphristi uzakuthatha ezinye zeengazi zomhlabelo wehlambululo ngomunwakhe, azininde eempundwini ze-aldari lomhlabelo wokutjhiswa bese uthulula inengi leengazezo emanzinzweni we-aldari.

³¹ Umuntukazana loyo uzakususa woke umhlwehlwe kube njengalokha nakasusa umhlwehlwe womhlabelo wetjhebiswano. Umphristi uzawutjhisa phezu kwe-aldari ube mhlabelo owamukeleka kuSomnini. Ngendlela leyo umphristi uzabe umenzela itethelelo. Ngalokho uzakuhlambuluka esonweni sakheso.

³² “Umuntukazana loyo uvunyelwe ukuletha imvana njengomhlabelwakhe wehlambululo. Yona kufuze ibe ngesikazi emsulwa.

³³ Uzakubeka isandla sakhe phezu kwehloko yemvana, ayihlabe njengomhlabelo wehlambululo lapha kuhlatjelwa khona umhlabelo wokutjhiswa.

³⁴ Nje-ke umphristi uzakuthatha ezinye zeengazi zomhlabelo wehlambululo ngomunwakhe, azininde eempundwini ze-aldari lomhlabelo wokutjhiswa bese uthulula inengi leengazezo emanzinzweni we-aldari.

³⁵ Umuntukazana loyo uzakususa woke umhlwehlwe kube njengalokha nakawususa emvaneni yomhlabelo wetjhebiswano. Umphristi uzawutjhisa phezu kwe-aldari neminikelo ekhethekileko kuSomnini. Ngendlela leyo umphristi uzabe umenzela itethelelo ngesono asenzileko. Ngalokho uzakuhlambuluka esonweni sakheso.”