ULEVITIKUSI 3 - IsiNdebele 2012 Translation

Umnikelo wetjhebiswano

¹ “Nakube umnikelo womuntu kumnikelo wetjhebiswano awuthethe emhlambini weenkomo, akube ngeduna namkha esikazi emsulwa, ilethwe phambi kwakaSomnini.

² Umuntu loyo uzakubeka isandla sakhe phezu kwehloko yomhlabelwakhe. Kuzakufanele bonyana awuhlabe phambi komnyango wetende lokuhlanganela bese kuthi amadodana ka-Aroni okubaphristi bafafaze iingazi zawo mahlangothi woke we-aldari.

³ Emhlabelweni wetjhebiswano umuntu loyo kufuze alethe umnikelo okhethekileko kuSomnini. Lokho kutjho umhlwehlwe owembese iinredlo nakho koke okuphathelene nawo,

⁴ iziso zombili nomhlwehlwe wakhona, amanoni wesifunzi kanye nepundu yesibindi ekufuze ikhutjhwe neziso.

⁵ Amadodana ka-Aroni akatjhise koke lokho e-aldarini phezu kweenkuni ezivuthako ngemva kobana enze umhlabelo wokutjhiswa. Lokho kumnikelo okhethekileko, owamukeleka kuSomnini.

⁶ “Nakube umnikelwakhe uwuthethe emhlambini wezimvu namkha weembuzi bona kube mhlabelo wetjhebiswano, khona akube ngeduna namkha esikazi emsulwa, ilethwe kuSomnini.

⁷ Nakube unikela ngeqamanyana, akalilethe phambi kwakaSomnini,

⁸ abeke isandla sakhe phezu kwehloko yomhlabelwakhe lowo, awuhlabe phambi komnyango wetende lokuhlanganela. Amadodana ka-Aroni afafaze iingazi zawo mahlangothi woke we-aldari.

⁹ Emhlabelweni wetjhebiswano umuntu loyo kufuze alethe amanoni njengomnikelo okhethekileko kuSomnini. Lokho kutjho woke umsila ononileko oquntwe emngolweni, umhlwehlwe owembese iinredlo nakho koke okuphathelene nawo,

¹⁰ iziso zombili nomhlwehlwe wakhona, amanoni wesifunzi kanye nepundu yesibindi ekufuze ikhutjhwe neziso.

¹¹ Umphristi uzakutjhisa koke lokhu phezu kwe-aldari. Lokho kukudla okumnikelo okhethekileko wakaSomnini.

¹² “Nakube unikela ngembuzi, akayilethe phambi kwakaSomnini,

¹³ abeke isandla sakhe phezu kwehloko yomhlabelwakhe lowo, awuhlabe phambi komnyango wetende lokuhlanganela. Amadodana ka-Aroni afafaze iingazi zawo mahlangothi woke we-aldari.

¹⁴ Emnikelwenakhe umuntu loyo kufuze alethe umnikelo okhethekileko kuSomnini. Lokho kutjho umhlwehlwe owembese iinredlo nakho koke okuphathelene nawo,

¹⁵ iziso zombili nomhlwehlwe wakhona, amanoni wesifunzi kanye nepundu yesibindi ekufuze ikhutjhwe neziso.

¹⁶ Umphristi uzakutjhisa koke lokhu phezu kwe-aldari. Lokho kukudla okumnikelo okhethekileko, owamukeleka kuSomnini. “Woke umhlwehlwe ngowakaSomnini.

¹⁷ Lokhu kusimiso sanini nanini eenzukulwaneni ngeenzukulwana lapha nizakuhlala khona: Ningalingi nidle umhlwehlwe, amanoni namkha ububende.”