ULEVITIKUSI 27 - IsiNdebele 2012 Translation

Ukuhlenga lokho okungekwakaSomnini

¹ USomnini wakhuluma noMosi wathi

² akakhulume nama-Israyeli athi kiwo: “Lokha umuntu enza isithembiso sokuhlukanisela umuntu kuSomnini bese kudingeke bona kubekwe inani lokumhlenga

³ kuzakusetjenziswa imithetho elandelako: Inani lomuntu omduna ukusungula eminyakeni ematjhumi amabili ukuya kwematjhumi asithandathu simagremu amakhulu amahlanu namatjhumi alikhomba wesiliva ngokwesilinganiso sendawo ecwengileko.

⁴ Nangabe kumumuntu omsikazi kuzakuba magremu amakhulu amathathu namatjhumi amane wesiliva.

⁵ Nangabe kumumuntu oneminyaka emihlanu ukuya ematjhumini amabili, inani lizakuba magremu amakhulu amabili namatjhumi amathathu wesiliva nakumsana, kube magremu alikhulu netjhumi nahlanu wesiliva nakumntazana.

⁶ Nangabe kumntwana onenyanga eyodwa ukuya eminyakeni emihlanu, inani lizakuba magremu amatjhumi amahlanu nekhomba wesiliva nakumsanyana, kube magremu amatjhumi amathathu nane wesiliva nakumntazanyana.

⁷ Nangabe umuntu uneminyaka ematjhumi asithandathu ukudlula, inani lizakuba magremu alikhulu namatjhumi alikhomba wesiliva nakuliqhegu, esilukazini kube magremu alikhulu netjhumi nahlanu.

⁸ Nangabe owenza isifungo uchake kangangobana uhluleka ukuhlenga umuntu ofungelweko ngokwenani elibekiweko, khona-ke akamlethe phambi komphristi bona kube mphristi ohlosa inani. Umphristi uzakuhlosa inani elingakghonwa ngowenze isifungo.

⁹ “Nangabe umuntu uthembisa ifuyo kuSomnini ekungaba ngeyomhlabelo, ingekaSomnini. Ifuyo leyo icwengile

¹⁰ nomuntu oyinikelako akakavunyelwa ukuyijamiselela. Angayenani ngehle namkha ngembi. Nangabe mbala ujamiselela ifuyo ngenye ifuyo, zombili njalo zingezicwengileko, ngezakaSomnini.

¹¹ “Nangabe umuntu uthembisa uSomnini ifuyo esilapheleko nekungakghonakali bona kwenziwe umhlabelo ngayo, ifuyo leyo ayilethwe phambi komphristi.

¹² Umphristi uzabese uhlosa ubungako bayo ngokuqala bona yihle namkha yimbi na. Okuquntwe mphristi ngayo kujamile.

¹³ Nangabe umniniyo uthanda ukuyihlenga, uzakungezelela ngokwesihlanu sobungako benani lefuyo leyo.

¹⁴ “Lokha umuntu ahlukanisela indlwakhe uSomnini, icwengile kuSomnini. Umphristi kufuze ahlose ubungako benani layo ngokuqala bona yihle namkha yimbi na. Okuquntwe mphristi ngayo kujamile.

¹⁵ Nangabe umniniyo uthanda ukuyihlenga, uzakungezelela ngokwesihlanu sobungako benani lendlu leyo. Nje-ke izakuba ngeyakhe godu.

¹⁶ “Nangabe umuntu wahlukanisela uSomnini ingcenye yesimu elilifa lakhe, ubungako benani lesimu leyo kufuze buhloswe ngokulinganiswa kwembewu etjalwa kiyo: Intundu eyodwa kadumbana yebhali ibiza amagremu amakhulu amahlanu namatjhumi alikhomba wesiliva.

¹⁷ Nakubana uhlukanisela isimakhe ukusukela ngomnyaka wokubuyisela, inani layo lizakuhlala lijamile.

¹⁸ Kodwana nakube uhlukanisela isimakhe emva komnyaka wokubuyisela, umphristi kufuze abale iminyaka eseleko bese wehlisa inani.

¹⁹ Nangabe ohlukanisela ngesimakhe usafuna ukuyihlenga, uzakungezelela ngokwesihlanu sobungako benani lesimu leyo. Nje-ke izakuba ngeyakhe godu.

²⁰ Kodwana nangayihlengiko bese uthengisela omunye umuntu ilungelo lokuyisebenzisa, angekhe asayihlenga godu.

²¹ Kuzakuthi lokha nayitjhatjhululwako ngomnyaka wokubuyisela, ibe ngecwengileko kuSomnini. Njengesimu ezilwako iba ngeyabaphristi, kube lilifa labo.

²² Nangabe umuntu uhlukanisela uSomnini isimu anelungelo lokuyisebenzisa nekungasiyo ingcenye yelifa lakhe,

²³ umphristi kufuze abale inani lokuhlengwa kwayo bekube mnyaka wokubuyisela. Umuntu loyo uzakukhokha khona mhlokho inani lokuhlengwa njengesipho esikhethekileko kuSomnini.

²⁴ Ngomnyaka wokubuyisela isimu izakubuyela keyathengwa kuye, ekunguye umniniyo ngokwelifa.

²⁵ Koke ukuhlosa kufuze kwenziwe ngokwesilinganiso sendawo ecwengileko.

²⁶ “Khumbulani bona amazibulo wefuyo angawakaSomnini, nje-ke akungabi khona owahlukanisela uSomnini. Kungaba ngelekomo namkha lemvu lingelikaSomnini.

²⁷ Kodwana nangabe ngelefuyo esilapheleko, umninilo kufuze alihlenge ngenani elibekwe phezu kwalo bese angezelele ngokwesihlanu. Nakube alikahlengwa lizakuthengiswa ngenani lalo esele libekiwe.

²⁸ “Khumbulani bona nanyana yini umuntu azilela ngayo uSomnini epahlenakhe angeze yathengiswa namkha ihlengwe, kungaba mumuntu, isilwana namkha ingcenye yesimu yelifa lakhe. Koke okuzilelwa ngakho uSomnini kucwenge khulu kuSomnini.

²⁹ Umuntu osele azilelwe kuSomnini, akabulawe; angeze asahlengwa.

³⁰ “Koke kwetjhumi kwenarha, kungaba ngokweenthoro namkha kweenthelo, kungokwakaSomnini. Yeke kucwengile kuSomnini.

³¹ Nangabe umuntu ufuna ukuhlenga nanyana yini yokwetjhumi kwakhe, kufuze angezelele ngokwesihlanu enanini lentweleyo.

³² Koke kwetjhumi kwemihlambi yeenkomo namkha kwezimvu neembuzi, okutjho lokho okudlula ngaphasi kwentonga yomelusi, kucwengile kuSomnini.

³³ Umuntu akukafuzi aqale bona kuhle namkha kumbi nanyana akwenane ngokhunye. Nangabe mbala ujamiselela ifuyo ngenye ifuyo, zombili njalo zingezicwengileko, ngezikaSomnini. Akukafaneli bona zihlengwe.”

³⁴ Leyo miyalo uSomnini ayala ngayo uMosi entabeni yeSinayi mayelana nama-Israyeli.