ULEVITIKUSI 26 - IsiNdebele 2012 Translation

Iimbusiso zabalalela uSomnini

¹ “Ningazenzeli abosingazimu: Ningazijamiseli iinthombembazwa namkha amatje akhethekileko begodu kungabi khona imifanekiso yamatje abaziweko ekhothanyelwako enarhenenu. Mina Somnini nginguZimenu.

² Londani amaSabatha wami nihloniphe nendawami ecwengileko. NginguSomnini.

³ “Nanikhamba ngeemiso zami, nilonde benenze imiyalwami,

⁴ khona-ke ngizanipha izulu ngeenkhathi zalo, inarha ibe nesivuno esihle nemithi yommango ithele iinthelo zayo.

⁵ Nizakubhula iinthoro bekube sikhathi sokuvuna amadiribe, nivune amadiribe bekube sikhathi sokutjala iinthoro. Nizakudla ukudla kwenu nisuthe nihlale enarhenenu niphephile.

⁶ Inarhenu ngizayipha ukuthula, nilale nitjhaphulukile kungabi nalitho eliniphazamisako. Ngizakususa neembandana eziyingozi enarheni, ngenze kungabi nezipi enarhenenu.

⁷ Nizakugijimisa izitha zenu, nizirhayile ngesabula.

⁸ Abahlanu benu bazakugijimisa abalikhulu, kuthi abalikhulu benu bagijimise iinkulungwana ezilitjhumi. Iye, nizakurhayila izitha zenu ngesabula.

⁹ Ngizanitjheja, ngibusise imbelekwenu benginenze nande. Ngizakuhlala esivumelwaneni sami engasenza nani.

¹⁰ Nizakudla isivuno esidala bekube sikhathi sokuvuna esitjha, nitjhidise amasalela ukuze nilonde esitjha.

¹¹ Ngizakuzenzela indawo yokuhlala phakathi kwenu, ngingakghabhudlheki ngani.

¹² Ngizakutjhidelana nani; ngibe nguZimu kini, nina nibe babantu bami.

¹³ NginguSomnini uZimenu owanikhupha enarheni yeGibhide bona ningasabi makhobokawo. Ngiwephulile amajogi agade aseentanyeni zenu nganenza nakhamba amahlombenu aphakamile.”

Amanikelela wabangalaleli uSomnini

¹⁴ “Nje-ke naningangilaleliko ngokungenzi yoke imiyalwami leyo,

¹⁵ nidela iimiso zami nehliziywenu ikghabhudlhwa mithethwami kobana niphambane nemiyalwami yoke bese nephule isivumelwano sami,

¹⁶ nakhu engizokwenza kini: Ngizonehlisela isizi, isifo esiqeda amandla, umkhuhlani orhwahlisa amehlo nodambisa ipilo. Nizakutjalela ilize ngombana ukudla kwenu kuzakudliwa zizitha zenu.

¹⁷ Ngizanifulathela ukuze izitha zenu zinimadlhe. Nizakubuswa ngabanizondako, nibaleke nanyana kungekho onigijimisako.

¹⁸ “Nangabe naphezu kwakho koke lokho anizungilalela, ngizokungezelela isibetho sezono zenu sibuyelelwe kalikhomba:

¹⁹ Ngizoniqeda amandla wokuzazi kwenu, ngenze umkayi ngaphezu kwenu ufane nesimbi nehlabathenu ifane nekoporo.

²⁰ Ukusebenza kwenu kuzakuba lilize ngombana amasimenu angeze aba nesivuno nemithi yenarhenenu ayisoze yathela iinthelo zayo.

²¹ “Nangabe nisaragalala, nala ukungilalela, ngizonehlisela amanye amatlhuwo abe manengi nangaphezu kokubuyelelwe kalikhomba njengokwezono zenu.

²² Ngizokuliselela neembandana zommango zibe hlangana nani bona zitle abantwabenu nefuywenu, zinenze niphunguke ngesibalo ukuze nemizilenu ingasabi nabantu.

²³ “Nangabe nangaphezu kwakho koke lokho anifuni ukuzwa, kodwana nisoloko niphambene nami,

²⁴ nami ngizakuphambana nani: Ngimi ozonibetha ngokubuyelelwe kalikhomba ngebanga lezono zenu.

²⁵ Ngizakwehlisela isabula phezu kwenu, yona izakuba sibuyiselelo sokwephula kwenu isivumelwano. Lokha nanibalekela emadorobhenenu, ngizokuthumela izifo phakathi kwenu, niwele ezandleni zesitha.

²⁶ Ngizokwephula umphekgho wesikwa senu bese abafazi abalitjhumi bahlanganyele ekubhageleni imindenabo ipani eyodwa nge-ondweni yinye. Isikwa sakhona sihlukaniselwane ngokulinganisiweko. Nizakudla kodwana ningasuthi.

²⁷ “Nangabe nangaphezu kwezintwezi soloko anifuni ukungilalela kodwana niphambana nami,

²⁸ nami ngizokuphambana nani ngivutha ngobukhali. Ngizonibetha ngokubuyelelwe kalikhomba ngebanga lezono zenu:

²⁹ Nizokudla ngitjho nenyama yamadodanenu, iye neyamadodakazenu niyirhiribidele.

³⁰ Ngizokutjhabalalisa iindunduma zenu, ngiphohloze ama-aldarenu wetjhwalo, ngilahlele iindumbu zenu phezu kweenthombembazwa zenu ezingaphiliko. Ngizokukghabhudlheka ngani.

³¹ Amadorobhenu ngizowenza amarubhi, iindawo ezicwengileko zenu zibe maqubi. Iminikelwenu angizukuyamukela.

³² Ngizokwenza inarhenu ibe libhudu kangangombana nezitha zenu ezingena kiyo bona zihlale, zikhuze ngayo.

³³ “Nina-ke ngizonihlakazela hlangana nezinye izizwe nesabula ihlale irhwatjhiwe ngemuva kwenu. Iye, inarhenu izakuba libhudu namadorobhenu abe marubhi.

³⁴ Ngesikhatheso inarha izakuba nethuba lokuba namaSabatha ebegade inganawo. Iye, lokha naniseenarheni zezitha zenu inarha izabe iphumule, ivuselela iminyaka yamasabhathayo.

³⁵ Ngesikhathi soke inarha isese libhudu, izakuba nokuphumula engazange kheyibe nakho eminyakeni yamaSabatha lokha nanisahlala kiyo.

³⁶ Nakungabanye benu eniseleko, ngizonenza nibe nommoya odanileko eenarheni zezitha zenu. Ngitjho netjhada lokuphephuka kwekari lomuthi lizonenza nibaleke inga mumuntu ubalekela ipi, niwe kungekho onigijimisako!

³⁷ Nizokukhubeka niwelane phezulu kube inga niphepha ibutho, nanyana kungekho onigijimisako. Angeze naba nesibindi sokujamelana nezitha zenu.

³⁸ Niyokufela hlangana nebakosozizwe, niginywe yinarha yezitha zenu.

³⁹ Abanye benu abasaseleko bazokuphela eenarheni zezitha zabo ngebanga lezono zabo nangenca yeemphambeko zaboyisemkhulu.

⁴⁰ “Nje-ke bazokuvuma izono zabo nezaboyisemkhulu bona akhange bathembeke kimi nokobana baphambene nami

⁴¹ kangangobana nami ngaphambana nabo bengabanikela eenarheni zezitha zabo. Nangabe bathoba iinhliziyo zabo ezikhunyaleleko begodu bamukele isibetho sezono zabo,

⁴² ngizokukhumbula isivumelwano sami engasenza noJakopo, no-Isaka kanye no-Abrahamu, ngikhumbule nenarhabo.

⁴³ Inarha kufuze khebayitjhiye ukuze iphumule, ithabele iminyaka yamaSabathayo ngokungabikho kwabo kiyo, nje-ke bona kufuze bamukele isibetho sezono zabo ngombana bahlubuka imithethwami bebakghabhudlhwa ziimiso zami.

⁴⁴ “Nanyana baseenarheni zezitha zabo angeze ngabahlubuka namkha bangikghabhudlhe kangangobana ngingabeze ngibabhubhise nya bengephule nesivumelwano sami nabo ngombana nginguSomnini uZimabo.

⁴⁵ Ngenca yabo ngizakukhumbula isivumelwano sami engasenza naboyisemkhulu lokha nangibenyula tjhatjhalazi phambi kwezizwe enarheni yeGibhide ukuze ngibe nguZimu kibo. NginguSomnini!”

⁴⁶ Lezo kwaba ziimiso, imithetho kanye nemiyalo uSomnini ayinikela ngoMosi entabeni yeSinayi ukuze yakhe ubudlelwano phakathi kwayo nama-Israyeli.