ULEVITIKUSI 24 - IsiNdebele 2012 Translation

Amafutha weembani nesikwa sobukhona bakaZimu

¹ USomnini wakhuluma noMosi wathi:

² “Yala ama-Israyeli bona alethe kuwe amafutha we-oliva atsengileko nacwebileko wokukhanyisa ilithi leembani. Iimbani azihlale zivutha njalo

³ ngetendeni lokuhlanganela ngaphandle kwesiyaya esingaphambi kobufakazi. U-Aroni kufuze abone bonyana iimbani zihlala zikhanya phambi kwakaSomnini ukusukela ntambama bekuse. Lokhu kuzakuba simiso sanini nanini eenzukulwaneni zenu.

⁴ Akathi ngantambama ahlele iimbani phezu kwelithi legolidembala phambi kwakaSomnini.

⁵ “Thatha iflowuru esefiweko bese ubhage izikwa ezimasongo ezilitjhumi nambili ngayo. Isikwa ngasinye sidutjwe ngamathungana amabili weflowuru.

⁶ Kufuze uzibeke ngamahla amabili, zibe zithandathu elihleni ngalinye, zibekwe phezu kwetafula legolidembala .

⁷ Elihleni ngalinye utjhise uburegu obutsengileko bomuthi welebhona, esikhundleni sezikwa kube mnikelo okhethekileko kuSomnini.

⁸ ISabatha elinye nelinye u-Aroni kufuze ahlele izikwezo phambi kwakaSomnini. Lokho akwenziwe njalo esikhundleni sama-Israyeli, kube sibopho sanini nanini.

⁹ Izikwezo zingezaka-Aroni namadodanakhe, bazazidlela endaweni ecwengileko ngombana zimnikelo ocwenge khulu, zisisabelo sakhe eminikelweni ekhethekileko kuSomnini. Lokhu kusimiso sanini nanini.”

Ukuhlunguphazwa malungana neemphambeko ezahlukahlukeneko

^10-11 Gade kunomfazi wakwa-Israyeli ibizo lakhe kunguTjhelomithi oyindodakazi kaDibhiri wekoro yakwaDani. Bekanendodana uyisayo egade kumGibhide, ihlala nama-Israyeli. Ngelinye ilanga kwaba khona ukulwa ngekampeni phakathi kwendodana leyo nomIsrayeli othileko. Ekulwenapho indodana leyo yahlambalaza ibizo lakaZimu lokha nayithukanako. Nje-ke abantu bayiletha kuMosi.

¹² Yavalelwa ngesikhungweni, kwalindelwa ukwizwa bona intando kaSomnini uZimu izakuthini kibo ngayo.

¹³ Nje-ke uSomnini wakhuluma noMosi wathi:

¹⁴ “Khupha umhlambalazi loyo ngekampeni, kuthi boke abamizwe athukana babeke izandla phezu kwehlokwakhe bese umkhambathi woke umkhanda ngamatje.

¹⁵ Godu tjela woke ama-Israyeli uthi, ‘Nanyana ngubani othuka uZimu uzakuthwala umlandu wesono sakheso.

¹⁶ Akabulawe ohlambalaza ibizo lakaSomnini. Umkhambathi woke umkhande ngamatje. Woke umuntu ohlambalaza ibizo lakaSomnini, kungaba sikhonzi namkha umuntu wendabuko, akabulawe.’ ”

¹⁷ Godu uSomnini wathi: “Obulala umuntu, naye akabulawe.

¹⁸ Obulala ifuyo yomunye kufuze ayijamiselele, kube yipilo ngepilo.

¹⁹ Olimaza omunye umuntu, naye akalinyazwe:

²⁰ ithambo ngethambo, ilihlo ngelihlo, izinyo ngezinyo, abuyiselelwe njengombana enze komunye.

²¹ Iye, obulala ifuyo yomunye kufuze ayijamiselele, kodwana obulala omunye umuntu akabulawe.

²² Nibe nomthetho munye owembethe isikhonzi naloyo ongowendabuko. Mina nginguSomnini uZimenu.”

²³ UMosi wakhuluma njalo-ke nama-Israyeli. Ngalokho bamkhupha ngekampeni loyo ogade athukene, bamkhanda ngamatje. Ngokunjalo ama-Israyeli enza njengombana uSomnini ayale uMosi.