ULEVITIKUSI 23 - IsiNdebele 2012 Translation

¹ USomnini wakhuluma noMosi wathi

² akakhulume nama-Israyeli athi kiwo: “Nasi iminyanya kaSomnini ekumele nibize ngayo imihlangano ekhethekileko. Leyo-ke minyanyami ejanyisiweko.”

ISabatha

³ “Umsebenzi awenziwe emalangeni asithandathu, kodwana ilanga lekhomba liliSabatha elihlukaniselwe umhlangano okhethekileko. KuliSabatha kuSomnini, ningenzi umsebenzi ngalo kuphi nakuphi lapha nizakuhlala khona.”

IPhasika nesiKwa esinganaNgumelo

⁴ “Nasi iminyanya ejanyisiweko kaSomnini ekumele nibize ngayo imihlangano ekhethekileko ngeenkhathi zayo ezibekiweko:

⁵ IPhasika lakaSomnini lizakuba ntambama elangeni letjhumi nane ngenyanga yokuthoma emnyakeni.

⁶ Kuthi mhlana zilitjhumi nahlanu khona enyangeni leyo kuthome umnyanya kaSomnini wesiKwa esinganaNgumelo. Nizakudla isikwa esinganangumelo amalanga alikhomba.

⁷ Elangeni lokuthoma lomnyanya lowo nibe nomhlangano okhethekileko, nje-ke ningawuphathi umsebenzenu wangemihla.

⁸ Amalanga alikhomba lawo, nizakunikela iminikelo ekhethekileko kuSomnini. Kuthi ngelanga lekhombelo, nibe nomhlangano okhethekileko, yeke ningawuphathi umsebenzenu wangemihla.”

⁹ USomnini wabuya wakhuluma noMosi wathi

¹⁰ akakhulume nama-Israyeli athi: “Lokha naningena enarheni engininikela yona bese nivuna isivuno sakhona, lethani iinqwambi zebhali zokuthoma kumphristi.

¹¹ Umphristi uzabese uphakamisa iinqwambezo njengomnikelo osibiko kuSomnini ukuze namukeleke. Kufuze aziphakamise ngakusasa ngemva kwelanga leSabatha.

¹² Ngelanga mhlana niphakamisa iinqwambi kuSomnini, mhlokho nizakunikela iqamanyana elimsulwa nelinomnyaka munye bona libe mhlabelo wokutjhiswa kuSomnini.

¹³ Nikelani iqamanelo kanye nomnikelo weenthoro omathungana amabili weflowuru esefiweko edutjwe ngamafutha we-oliva libe mnikelo owamukelekako kuSomnini. Godu kube nomnikelo wewayini elingaba lilitha nesiquntu.

¹⁴ Ningadli isikwa, iinthoro ezikhanzingiweko namkha ibhali etja bekufike ilangelo lapha niletha khona umnikelo kuZimenu. Lokhu kusimiso sanini nanini eenzukulwaneni zenu kuphi nakuphi lapha nizakuhlala khona.

¹⁵ “Nizakuthoma ukubala ilanga emva kweSabatha, okutjho ilanga eniletha ngalo iinqwambi zomnikelo wokuphakanyiswa, kube ziimveke ezilikhomba ezigcweleko.

¹⁶ Balani bekube lilanga lamatjhumi amahlanu, okulilanga emva kweSabatha lekhomba bese kuthi mhlokho nilethe umnikelo wekoroyi etja kuSomnini.

¹⁷ Kuphi nakuphi lapha nizakuhlala khona lethani amapani amabili wesikwa sokuphakanyiswa esiwunyelweko esibhagwe ngamathungana amabili weflowuru esefiweko, sibe njengesilumo kuSomnini uZimenu.

¹⁸ Lethani izikwezo kanye namaqamanyana amsulwa alikhomba abe nomnyaka munye, ikunzana kanye namaqama amabili kube mhlabelo wokutjhiswa kuSomnini kanye nomnikelo weenthoro newokuselwako kube mnikelo owamukelekako kuSomnini.

¹⁹ Godu kufuze ninikele ipongo ibe mhlabelo wehlambululo namaqamanyana amabili anomnyaka abe mhlabelo wetjhebiswano.

²⁰ Umphristi kufuze aphakamise izikwa zesilumo njengomnikelo osibiko kuSomnini kanye namaqamanyana amabili. Amaqamanyana lawo akhethekile kuSomnini, asisabelo somphristi.

²¹ Mhlokho nimemezele umhlangano okhethekileko begodu ningawuphathi umsebenzenu wangemihla. Lokhu kusimiso sanini nanini eenzukulwaneni zenu kuphi nakuphi lapha nizakuhlala khona.

²² “Lokha nanivuna isivuno senarhenu, ningakhothululi koke namkha niburukuje emva kwesivuno. Tjhiyelani odududu nosikhonzi. NginguSomnini uZimenu.”

²³ USomnini wabuya wakhuluma noMosi wathi

²⁴ akakhulume nama-Israyeli athi: “Elangeni lokuthoma enyangeni yekhomba akube liSabatha elikhethekileko, isikhumbuzo sokubetha iimporompita zomhlangano okhethekileko.

²⁵ Ningawuphathi umsebenzenu wangemihla. Nikelani iminikelo ekhethekileko kuSomnini.”

²⁶ Godu uSomnini wakhuluma noMosi wathi:

²⁷ “Elangeni letjhumi lenyanga yekhomba kulilanga letethelelo kuSomnini. Kini kuzakuba mhlangano okhethekileko, nizakuzila ukudla, nilethe iminikelo ekhethekileko kuSomnini.

²⁸ Ningawuphathi nakancani umsebenzi ngelangelo ngombana kulilanga letethelelo enizenzela yona phambi kwakaSomnini uZimenu.

²⁹ Ongazithobi ngokuzila ukudla mhlokho akajutjwe ebantwini bekhabo.

³⁰ Owenza umsebenzi mhlokho, ngizamthanyela ebantwini bekhabo.

³¹ Iye, ningawuphathi nakancani umsebenzi. Lokhu kusimiso sanini nanini eenzukulwaneni zenu kuphi nakuphi lapha nizakuhlala khona.

³² Lelo kuliSabatha elihlukaniselweko kini, yeke nizakuzila ukudla. Elangeni lethoba lenyanga leyo ukuthoma ntambama bekube ngakusasa ntambama niphumule ngokupheleleko.”

Umnyanya wemiTlhatlhana

³³ USomnini wabuyelela wakhuluma noMosi wathi

³⁴ akakhulume nama-Israyeli athi kiwo: “Mhlana zilitjhumi nahlanu enyangeni yekhomba, amalanga alikhomba kumnyanya wemiTlhatlhana kuSomnini.

³⁵ Ngelanga lokuthoma kumhlangano okhethekileko, ningawuphathi umsebenzenu wangemihla.

³⁶ Amalanga alikhomba woke nizakuletha iminikelo ekhethekileko kuSomnini. Kuzakuthi ngelanga lobunane nibe nomhlangano okhethekileko nalapha niletha khona iminikelo ekhethekileko kuSomnini. Lowo mgidi omkhulu, yeke ningawuphathi umsebenzenu wangemihla.

³⁷ “Leyo-ke minyanya kaSomnini ekumele bona niyimemezele njengemihlangano ekhethekileko, ibe ngeyokuletha iminikelo ekhethekileko kuSomnini, ekumihlabelo yokutjhiswa, iminikelo yeenthoro, imihlabelo yetjhebiswano kanye neminikelo yokuselwako njengombana kubekelwe ilanga nelanga.

³⁸ Iminikelo leyo ayifaki phakathi izipho zenu zamaSabatha, iminikelwenu yesithembiso neminikelwenu yesihle eniyinikela kuSomnini.

³⁹ “Yelelani ukugidinga umnyanya kaSomnini amalanga alikhomba ngelanga letjhumi nahlanu enyangeni yekhomba, lokha nasele nibuthelele isivuno senarha. Ilanga lokuthoma kuzakuba liSabatha elikhethekileko godu kube njalo nangelanga lobunane.

⁴⁰ Ngelanga lokuthoma kufuze nikhe iinthelo zemithi ekhethekileko, iingala zamasundu, zemithi enamakari amahle nezemiyezani yemilanjaneni bese nijekezela phambi kwakaSomnini uZimenu amalanga alikhomba.

⁴¹ Gidingani umnyanya kaSomnini amalanga alikhomba emnyakeni. Lokho kusimiso sanini nanini eenzukulwaneni zenu. Ugidingeni ngenyanga yekhomba.

⁴² Nizakuhlala emitlhatlhaneni amalanga alikhomba. Boke abantu bendabuko kwa-Israyeli bazakuhlala emitlhatlhaneni

⁴³ ukuze iinzukulwana zenu zazi bona ngathi lokha nangenyula ama-Israyeli enarheni yeGibhide, ngawenza bonyana ahlale emitlhatlhaneni. NginguSomnini uZimenu.”

⁴⁴ UMosi wawethulela njalo-ke ama-Israyeli iminyanya kaSomnini.