ULEVITIKUSI 22 - IsiNdebele 2012 Translation

¹ Godu uSomnini wakhuluma noMosi wathi:

² “Tjela u-Aroni namadodanakhe bona bahloniphe iminikelo ecwengileko yama-Israyeli ayihlukanisele mina ukuze bangarhubutjhi ibizo lami elicwengileko. NginguSomnini.

³ Yithi kibo, ‘Nanyana ngubani wesizukulwana senu othi asilaphele atjhidele eminikelweni ecwengileko, ama-Israyeli ayinikele ngokuyihlukanisela mina Somnini, akakhawulwe ekungilotjheni. NginguSomnini.’

⁴ “Nangabe kunomuntu wesizukulwana saka-Aroni onekhwekhwe namkha onokuvuza ebudodeni akakavunyelwa ukugoma ukudla okubuya eminikelweni ecwengileko angakahlambuluki. Othinta okusilapheleko, kungaba sidumbu, indoda etsanyazileko,

⁵ isikhakhabi esingamsilaphaza namkha ngubani ongahle amsilaphaze nanyana kukusilaphala kwaliphi ihlobo,

⁶ uzakuba ngosilapheleko bekuhlwe. Kufuze angadli ukudla okubuya eminikelweni ecwengileko angakadudi umzimba mantange.

⁷ Nakutjhinga ilanga uzabe sele ahlambulukile, emva kwalokho angadla ukudlokho ngombana lokho kusisabelo sakhe.

⁸ Kodwana akakavunyelwa nakancani ukudla okuzifeleko nokudatjulwe ziimbandana zommango ukuze angazisilaphazi ngalokho. NginguSomnini.

⁹ “Abaphristi abalonde imiyalwami ukuze bangabi nomlandu bebafele endawenami ecwengileko ngebanga lokuyirhubutjha kwabo. NginguSomnini okucwengisako lokho.

¹⁰ “Woke umuntu ongaphandle kwendlu yobuphristi akakafaneli ukugoma ukudla okubuya eminikelweni ecwengileko, ngitjho nanyana kusithekeli somphristi namkha isisebenzi sakhe.

¹¹ Kodwana ikhoboka elithengwe mphristi ngemali bona libe njengepahlakhe nalawo abelethelwe endlinakhe, angakudla ukudlokho.

¹² Nangabe indodakazi yomphristi ithethwe ngongasuye wendlu yobuphristi, akukafaneli idle iminikelo esibiko kuSomnini.

¹³ Kodwana nakube imhlolokazi namkha ilibuya begodu ayinamntwana bese ibuyela kwabo ibe njengalokha isese mntazana, ingadla koke okudliwa nguyise. Nakuliphandle lona, lingeze ladla ukudla okubuya eminikelweni ecwengileko.

¹⁴ “Nakwenzeka bona umuntu agome ukudla kweminikelo ecwengileko ngephoso, akakubuyisele kumphristi kungezelelwe ngokwesihlanu sobungako bokudla.

¹⁵ Abaphristi bangavumeli bona kurhubutjhwe ukudla kweminikelo ecwengileko okusibiko ama-Israyeli asiletha kuSomnini

¹⁶ begodu bafanele bathwese ama-Israyeli umlandu wokuwahlawulisa lokha nadle ukudla okucwengileko kwabaphristi. NginguSomnini ocwengisa ukudlokho.”

¹⁷ USomnini wabuya wakhuluma noMosi wathi

¹⁸ akakhulume no-Aroni namadodanakhe kanye nawo woke ama-Israyeli athi: “Nanyana ngubani wendlu yakwa-Israyeli namkha osikhonzi oletha umnikelo njengomhlabelo wokutjhiswa kuSomnini, ekungaba ngewesifungo namkha wesihle,

¹⁹ kufuze kube liduna elimsulwa: ikunzi, iqama namkha ipongo ukuze amukeleke.

²⁰ Ninganikeli ngesilwana esinomphambo ngombana lokho angeze kwanibhadekela.

²¹ Nakube umuntu unikela ngekomo, imvu namkha imbuzi njengomhlabelo wetjhebiswano kuSomnini ukwenzela ukuzalisa isifungo namkha umnikelo wesihle, kufuze kube ngemsulwa; ingabi nomphambo.

²² Ninganikeli ngesilwana esiphopheleko, esirholopheleko, esilimeleko, esineensupa, esibhibhidlhako namkha esinesibabu. Ningalethi nasinye sazo e-aldarini njengomnikelo okhethekileko kuSomnini.

²³ Unganikela ngekunzi namkha ngeqama elinesitho eside namkha esifitjhani kunezinye kube mhlabelo wesihle, kodwana emhlabelweni wokuzalisa isifungo, azamukeleki.

²⁴ Ninganikeli kuSomnini ngesilwana esiphakulwe ngokuncinzwa, ngokupatlazwa, ngokudatjulwa namkha ngokuquntwa. Ningathomi niphakule iinlwana enarheni yekhenu,

²⁵ godu ningamukeli iinlwana ezinjalo kewakosozizwe bona nenze ngazo umhlabelo njengokudla kwakaZimenu. Iye, ngebanga lokobana ziqanduliwe, angeze zanibhadekela.”

²⁶ Godu uSomnini wakhuluma noMosi wathi:

²⁷ “Lokha nakuzalwa ikonyana, imvana namkha imbuzana, akuhlale nonina amalanga alikhomba, kodwana ukusukela elangeni lobunane ukuya phambili kuzakwamukeleka njengomnikelo okhethekileko kuSomnini.

²⁸ Ningahlabi ikomo nekonyana layo namkha imvana nonina ngalanga linye.

²⁹ “Lokha naninikela umhlabelo wokuthokoza kuSomnini, qinisekani bona uyamukeleka:

³⁰ Awudliwe khona mhlokho uphele. Ningatjhiyi ngitjho neqatjhana lenyama bekuse. NginguSomnini.

³¹ “Londani imiyalwami niyenze. NginguSomnini.

³² Begodu ningarhubutjhi ibizo lami elicwengileko, kodwana liphatheni ngokukhethekileko phakathi kwama-Israyeli. Mina NginguSomnini onicwengisako

³³ nowanikhupha enarheni yeGibhide bona ngibe nguZimu kini. NginguSomnini.”