ULEVITIKUSI 21 - IsiNdebele 2012 Translation

Imithetho yabaphristi

¹ USomnini wakhuluma noMosi wathi akakhulume nabaphristi okumadodana ka-Aroni athi: “Akungabi namunye ozisilaphaza ngokuphatha isidumbu sabantu bekhabo,

² ngaphandle kwesesihlobo seengazi okutjho unina, uyise, indodana, indodakazi, umnakwabo

³ namkha udadwabo osese litlawana ohlala naye ngombana angakendi. Ngaye angazisilaphaza ngokuthinta isidumbu sakhe.

⁴ Angazisilaphazi ngabantu ahlobene nabo ngobukhazi abe ngongakahlambuluki.

⁵ Abaphristi akukafuzi bona bazigude ibande ehloko namkha bazigege emaphethelweni weenlevu zabo nanyana bazirhaye imizimbabo ngebanga lohlongakeleko.

⁶ Kufuze babe ngabacwengileko kuZimabo bangarhubutjhi ibizo lakaZimabo ngombana ngibo abaletha e-aldarini iminikelo ekhethekileko kuSomnini okukukudla kwakaZimabo. Nje-ke kufuze babe ngabacwengileko.

⁷ Abaphristi bangathathi ingwadla namkha ithari begodu bangathathi ibuya ngombana abaphristi bangabakhethekileko kuZimabo.

⁸ Hloniphani isikhundla somphristi ngombana unikela ukudla kuZimenu. Mthatheni njengocwengileko ngombana mina Somnini enginicwengisako, ngicwengile.

⁹ Nangabe indodakazi yomphristi izirhubutjha ngobungwadla, irhubutjha uyise, yeke kufuze itjhiswe ngomlilo.

¹⁰ “Umphristi ongomkhulu kubafowabo, nongowazeswa ngamafutha ehlokwakhe, wahlukaniselwa ukwembatha izambatho ezikhethekileko, akukafaneli aliselele iinhluthu zakhe zimatlharatlhara namkha atlebhule izambatho zakhe ngebanga lohlongakeleko.

¹¹ Angatjhideli esidunjini; iye, angazisilaphazi ngitjho nanyana kusidumbu sakayise namkha sakanina,

¹² begodu angaphumi endaweni ecwengileko kaZimakhe ngombana angayirhubutjha. Yena wahlukaniselwe uZimakhe ngokuzeswa kwakhe ngamafutha. NginguSomnini.

¹³ “Umphristi omkhulu kufuze athathe umfazi osese litlawu.

¹⁴ Angathathi umhlolokazi, ibuya, ithari namkha ingwadla. Kodwana akathathe kwaphela itlawu ebantwini bekhabo;

¹⁵ nakungasinjalo uzakurhubutjha isizukulwana sakhe. Ngimi mina Somnini omenza abe ngocwengileko.”

¹⁶ Godu uSomnini wathi kuMosi

¹⁷ akakhulume no-Aroni athi kuye: “Akungabi noyedwa esizukulwaneni sakho onomphambo ozakuletha ukudla kwakaZimakhe e-aldarini.

¹⁸ Iye, kungabi namunye onomphambo ozakutjhidela ekunikeleni: ophopheleko, ohluzako, okhubazeke ebusweni namkha emzimbeni,

¹⁹ orhwahlaphele inyawo namkha isandla,

²⁰ onesifumba, osirhonodwana, onelihlo elithunyileko, obhibhidlhako namkha onesibabu nopatlazwe amahlwayi.

²¹ Akungabi nomphristi onomphambo esizukulwaneni saka-Aroni ozakutjhidela e-aldarini alethe iminikelo ekhethekileko kuSomnini. Njengombana anomphambo nje, angatjhideli bona anikele ukudla kwakaZimakhe.

²² Yena nokho angakudla ukudla kwakaZimakhe, okutjho ukudla okubuya eminikelweni ecwenge khulu nakecwengileko.

²³ Kodwana ngebanga lokobana anomphambo akakafaneli angene lapha kunesiyaya setjhila lokusitha umfaji wobufakazi namkha atjhidele e-aldarini ukuze angarhubutjhi indawami ecwengileko. Ngimi mina Somnini engenze izintwezo zaba ngezicwengileko.”

²⁴ Ngokunjalo uMosi watjela u-Aroni namadodanakhe kanye nama-Israyeli woke iindabezo.