ULEVITIKUSI 20 - IsiNdebele 2012 Translation

Ukuhlunguphazelwa isono

¹ USomnini wakhuluma noMosi wathi

² akakhulume nama-Israyeli athi: “Nanyana ngubani wama-Israyeli namkha isikhonzi esikhonze kwa-Israyeli onikela ngomntwanakhe kuMoleki, akabulawe. Izakhamuzi zimkhande ngamatje.

³ Nakungasinjalo ngizakujamelana naye ngokwami ngokumjuba ebantwini bekhabo ngombana unikele umntwanakhe kuMoleki. Usilaphaze indawami ecwengileko bewarhubutjha nebizo lami elicwengileko.

⁴ Iye, nakube izakhamuzi zisitheza ubuso bazo emuntwini loyo ngokungambulali lokha nanikela umntwanakhe kuMoleki,

⁵ ngizakujamelana naye kanye nomndenakhe ngokwami. Ngizamjuba ebantwini bekhabo ngokudlhemadlhema kwakhe ngemva kwakaMoleki, yena nejima loke elimlandelako.

⁶ “Nangabe umuntu uphendukela ebezimini namkha kwabanemimoya, adlhemadlheme emva kwabo, ngizakujamelana naye umuntu loyo, ngimjube ebantwini bekhabo.

⁷ Ngalokho zahlukaniseleni, nibe ngabacwengileko ngombana mina nginguSomnini uZimenu.

⁸ Londani iimiso zami nizenze. NginguSomnini onihlukaniselako.

⁹ Nanyana ngubani othuka uyise namkha unina akabulawe. Iye, umuntu othuka uyise nonina iingazi zakhe zizakuba phezu kwakhe.

¹⁰ “Nangabe indoda ihlobonga nomfazi wenye indoda ababulawe bobabili njalo, isihlobongi nesihlobongikazi.

¹¹ Umuntu olala nomkayise wambule ubuze bakayise. Bobabili indodana nomfazi lowo ababulawe; iingazi zabo zizakuba phezu kwabo.

¹² Nangabe indoda ilala nomalukazanayo, bobabili ababulawe, iingazi zabo zizakuba phezu kwabo ngombana benze ubuhlola.

¹³ Indoda elalana nenye indoda kanjenganyana ilala nomfazi, womabili akabulawe. Iingazi zawo zizakuba phezu kwawo ngombana enze isinyenyiso.

¹⁴ Nangabe indoda ithatha umfazi kanye nomkhwekazayo, buhlola lokho. Abatjhiswe bobathathu njalo ukuze kungabi nobuhlola phakathi kwenu.

¹⁵ Umuntu olala nesilwana akabulawe kanye nesilwaneso.

¹⁶ Nangabe umfazi uzinikela esilwaneni bona simlale, bulala umfazi kanye nesilwaneso. Akubulawe kokubili njalo; iingazi zakho zizakuba phezu kwakho kokubili.

¹⁷ “Nangabe umuntu uthatha udadwabo namkha umntamamakhe bahlubulelane, kulihlazo lokho. Bobabili abajutjwe ebantwini bekhabo emtarini ngombana umuntu loyo wambule ubuze bakadadwabo, nje-ke uzazizwa ngesono sakheso.

¹⁸ Nangabe umuntu ulala nomfazi amyame asesikhathini, angene efindweni lomfazi, nomfazi loyo amngenise-ke efindweni lakhelo, bobabili abajutjwe ebantwini bekhabo.

¹⁹ Ungabambuli ubuze bakadadwabo kanyoko namkha bakakghariyakho ngombana lokho kukukwambula ubuze besihlobo sakho, abenza njalo bazazizwa ngesono sabeso.

²⁰ Nangabe umuntu ulala nomfazi womfowabo kayise, wambule ubuze bakayise; umuntu nomfazi loyo bazazizwa ngesono sabo: Bazakufa banganabizo.

²¹ Nangabe umuntu uthatha umkamfowabo, kumphambo lokho. Wambule ubuze bakamfowabo, nje-ke bobabili bazakuswela ibizo.

²² “Londani iimiso zami zoke, nenze imiyalwami yoke ukuze inarha enginiletha bona nihlale kiyo inganiphalazi.

²³ Ningakhambi ngemikhuba yabantu engizobaqotjha phambi kwenu ngombana bona bebazenza zoke izinto ezimbezi, ngebangelo ngibasuthi.

²⁴ Kodwana nina nganithembisa ngathi, ‘Nizakuzuza inarhabo. Ngimi oninikela yona bona ibe lilifa lenu. Kuyinarha egeleza ibisi neliju.’ NginguSomnini uZimenu owanihlukanisa nezinye izizwe.

²⁵ Ngalokho yahlukanisani phakathi kwesilwana esihlambulukileko nesisilapheleko, naphakathi kwenyoni esilapheleko nehlambulukileko. Ningazenzi ninyenyeke ngesilwana, inyoni namkha yini ekhakhaba ehlabathini leyo engazahlukanisa nani ngathi zisilaphele.

²⁶ Yibani ngabacwengileko kimi ngombana mina Somnini ngicwengile begodu nginahlukanisile nezinye izizwe bona nibe ngabami.”

²⁷ “Indoda namkha umfazi onabezimu nanyana onommoya, akabulawe. Abakhandwe ngamatje; iingazi zabo zizakuba phezu kwabo.”