ULEVITIKUSI 2 - IsiNdebele 2012 Translation

Umnikelo weenthoro

¹ “Nakube kunomuntu oletha umnikelo weenthoro kuSomnini umnikelwakhe awube yiflowuru esefiweko. Kufuze athele amafutha we-oliva phezu kwayo, afake namakha

² bese alethe umnikelo lowo emadodaneni ka-Aroni okubaphristi. Umphristi uzakunghwatha isandla seflowuru enamafutha kanye namakha woke. Koke lokho uzakutjhisa e-aldarini kube sisabelo sesikhumbuzo. Lokho bekumnikelo okhethekileko, owamukeleka kuSomnini.

³ Omunye umnikelo weenthoro oseleko ungewaka-Aroni namadodanakhe. Umnikelo lowo ungocwenge khulu ngombana bewulethwa njengomnikelo okhethekileko kuSomnini.

⁴ “Nawuletha umnikelo weenthoro obhagwe nge-ondweni, awube zizikwa ezimasongo ezidutjwe ngamafutha we-oliva namkha izikwa ezisipara ezitjhatjhwe ngamafutha we-oliva. Izikwezo zingabi nengumelo begodu zenziwe ngeflowuru esefiweko.

⁵ Nakube umnikelwakho weenthoro ungokhanzingwe ngedengela, akube ngoweflowuru esefiweko edutjwe ngamafutha we-oliva; kube siphaphatha esinganangumelo.

⁶ Usihlephule iinquqwana uzithele ngamafutha we-oliva. Lokho kumnikelo weenthoro.

⁷ Nakube umnikelwakho weenthoro uphekwe ngesithetjhelelo, akube ngodutjwe ngeflowuru esefiweko namafutha we-oliva.

⁸ “Nawuletha umnikelo weenthoro owenziwe ngezintwezo kuSomnini uwunikele umphristi ozawuthatha awulethe e-aldarini.

⁹ Umphristi loyo uzakuthatha isabelo sesikhumbuzo emnikelweni weenthoro asitjhise e-aldarini. Lokho bekumnikelo okhethekileko, owamukeleka kuSomnini.

¹⁰ Omunye umnikelo weenthoro oseleko ungewaka-Aroni namadodanakhe. Lowo bekumnikelo ocwenge khulu ngombana bewulethwa njengomnikelo okhethekileko kuSomnini.

¹¹ “Akungalethwa umnikelo weenthoro onengumelo kuSomnini. Iye, akungatjhiswa isikwa esinengumelo namkha iliju njengomnikelo okhethekileko kuSomnini.

¹² Nokho nakube mnikelo wesilumo, ningawuletha kuSomnini kodwana nakuse-aldarini khona, ungakhe unganikelwa kobana wamukeleke kuSomnini.

¹³ Nungani yoke iminikelwenu yeenthoro ngetswayi. Ningalikhohlwa itswayi lesivumelwano sakaZimenu eminikelweni yeenthoro. Fakani itswayi njalo kiyo yoke iminikelwenu.

¹⁴ “Lokha nawuletha umnikelo weenthoro okungewesilumo kuSomnini rhabula iinqwambi zekoroyi etja leyo emlilweni, uzitlhutlhure bese ugaya ikoroyi yakhona. Ulethe ikoroyi leyo njengomnikelwakho wesilumo.

¹⁵ Thela amafutha we-oliva phezu kwayo bese ufaka amakha ngaphezulu. Lowo kumnikelo weenthoro.

¹⁶ Umphristi uzakutjhisa isabelo sesikhumbuzo seenthoro ezigayiweko namafutha we-oliva kanye namakha woke. Lokho kumnikelo okhethekileko kuSomnini.”