ULEVITIKUSI 19 - IsiNdebele 2012 Translation

Imithetho eyahlukahlukeneko

¹ USomnini wakhuluma noMosi wathi

² akakhulume nomkhambathi woke wama-Israyeli athi: “Yibani ngabacwengileko ngombana mina Somnini uZimenu ngicwengile.

³ Omunye nomunye wenu ahloniphe unina noyise. Gcinani amaSabatha wami. NginguSomnini uZimenu.

⁴ Ningalandeli abosingazimu begodu ningazenzeli abozinyana ababaziweko. NginguSomnini uZimenu.

⁵ “Lokha nanihlabela uSomnini umhlabelo wetjhebiswano, uhlabeni ukuze namukeleke kuye.

⁶ Umhlabelo lowo uzakudliwa ngelanga ohlatjwa ngalo namkha ngakusasa. Okuseleko bekwaba lilanga lesithathu, akutjhiswe.

⁷ Nakube inyama leyo idliwa ngelanga lesithathu izakuba sinyenyiso. Umhlabelo lowo angeze wamukeleka.

⁸ Nanyana ngubani oyidlako uzazizwa ngombana usilaphaze okucwengileko kwakaSomnini. Umuntu onjalo akajutjwe ebantwini bekhabo.

⁹ “Lokha nanivuna isivuno senarhenu, ningakhothululi koke namkha niburukuje emva kwesivuno.

¹⁰ Ningakhi isidiribe senu sidududu begodu ningadobhi amadiribe awele phasi. Lokho kuliseleleni odududu nosikhonzi. NginguSomnini uZimenu.

¹¹ “Ningebi, ningakhohlisani begodu ningephuli isithembiso omunye komunye.

¹² Ningafungi ibizo lami ngamanga ukuze ningarhubutjhi ibizo lakaZimenu. NginguSomnini.

¹³ “Ungagandeleli umakhelwanakho begodu ungamdlelezeli. “Ungabambeli isisebenzi esitorhako ikokhelo bekube ngakusasa.

¹⁴ Ngokwesaba uZimakho ungathuki ongezwako begodu ungabeki isikhubekiso phambi kwesiphofu. NginguSomnini.

¹⁵ “Ningahlanakezeli isigwebo; ungakhethi ubuso besichaka namkha nijamele onothileko. Gwebani abantu bekhenu ngokulunga.

¹⁶ Ungafaki abantu bekhenu engozini ngokukhamba ubahleba. NginguSomnini.

¹⁷ “Ungabi nevunda nomfowenu kodwana mkhalimele epanyameni ungamgegi ukuze ungakhambi uqumbelene.

¹⁸ Ungazibuyiseleli namkha ube nevunda ebantwini ophila nabo, kodwana thanda umakhelwanakho njengombana uzithanda wena. NginguSomnini.

¹⁹ “Londani iimiso zami. Ungavumeli ifuywakho izekwe ngelinye ihlobo lefuyo. Nesiminakho ungatjali imihlobo emibili yembewu begodu ungembathi isambatho esilukwe ngemihlobo emibili yemicu eyahlukeneko.

²⁰ “Nangabe umnini khobokakazi ulala nalo sele lithengwe ngenye indoda, nokho khibe alikabi ukukhokhelwa imali begodu alikabi ukutjhatjhululwa uzakuhlawula umthengi. Bangeze babulawa ngombana ikhobokakazelo belingakabi ukutjhatjhululwa.

²¹ Kodwana umuntu olele nalo kufuze alethe iqama njengomhlabelo wehlawulo kuSomnini emnyango wetende lokuhlanganela.

²² Nje-ke umphristi uzamenzela itethelelo kuSomnini ngeramelo ngesono asenzileko. Ngalokho uzakuhlambuluka esonweni sakheso.

²³ “Lokha nasele ningenile enarheni benatjala yoke imihlobo yemithi edliwako, kuzakuba minyaka emithathu yoke iinthelo zemithi leyo ningakavunyelwa ukuzidla.

²⁴ Ngomnyaka wesine zoke iinthelo zemithi zizakuba ngezikhethekileko kudunyiswa ngazo uSomnini uZimu.

²⁵ Ngomnyaka wesihlanu ningadla iinthelo. Ngendlela leyo imithi izakuhloma khulu. NginguSomnini uZimenu.

²⁶ “Ningahlanganyeli emihlatjelweni yabarhedeni. Ningafuniseli begodu ningaphenguli.

^27-28 Lokha nanihlobokako ningarhuni iinhloko zenu ngokuzigega namkha niphungule iindevu zenu. Ningazirhayi begodu ningazidali amabala emizimbenenu. NginguSomnini.

²⁹ “Ungarhubutjhi indodakazakho ngokuyivumela bona ingwadle. Nawenza njalo inarha izakudlhemadlhema ngemva kwabosingazimu beyigcwale ubuhlola.

³⁰ Gcinani amaSabatha wami, nihloniphe indawami ecwengileko. NginguSomnini.

³¹ “Ningaphendukeli ebezimini namkha kwabanemimoya. Ningaziphenguli kibo ngombana nanenza njalo bazanisilaphaza. NginguSomnini uZimenu.

³² “Ngokwesaba uZimu, thulelani othukgheleko ingwani, nihloniphe omdala. NginguSomnini.

³³ “Naninesikhonzi enarhenenu, ningasigandeleli.

³⁴ Niphathe kuhle isikhonzi enihlala naso njenganyana nenza ebantwini bekhenu. Thandani isikhonzi njengombana nizithanda nina ngombana nani naniziinkhonzi enarheni yeGibhide. NginguSomnini uZimenu.

³⁵ “Ningakhwabanisi lokha nanenza iinlinganiso zobudisi, ubude nomthamo.

³⁶ Linganisani ngokulunga, nisebenzise iinkala neenlinganiso ezifaneleko kube mthamo kapumpana weqiniso nekwana yeqiniso. NginguSomnini uZimenu owanikhupha enarheni yeGibhide.

³⁷ Londani iimiso zami zoke, nenze imiyalwami yoke. NginguSomnini.”