ULEVITIKUSI 18 - IsiNdebele 2012 Translation

Imithetho yokulalana

¹ USomnini wakhuluma noMosi wathi

² akakhulume nama-Israyeli athi: “Mina nginguSomnini uZimenu.

³ Ningenzi njengombana kwenza amaGibhide lapha benihlala khona begodu ningenzi njengombana kwenza abantu benarha yeKanana enginisa kiyo. Ningakhambi ngemikhubabo

⁴ kodwana yenzani imithethwami, nilonde neemiso zami, niphile ngazo. NginguSomnini uZimenu.

⁵ Iye, londani iimiso zami nemithethwami ngombana umuntu owenza njalo uzakuphila ngayo. NginguSomnini.

⁶ “Akungabi khona owambula ubuze bomuntu wekhabo ngokwamabhayi. NginguSomnini.

⁷ Ungambuli ubuze bakanyoko ngombana bungebakayihlo; ngunyoko, ungambuli ubuze bakhe.

⁸ Ungambuli ubuze bomkayihlo ngombana bungebakayihlo.

⁹ “Ungambuli ubuze bakadadwenu, kungaba mntwana kayihlo namkha kanyoko okhulele ekhaya namkha ngaphandle.

¹⁰ Ungambuli ubuze bomntwana womntwanakho ngombana ubuze bakhe bububuze bakho.

¹¹ Ungambuli ubuze bendodakazi kayihlo ebelethwe ngomunye umfazi ngombana ingudadwenu.

¹² Ungambuli ubuze bakakghariyakho ngombana uziingazi zakayihlo.

¹³ Ungambuli ubuze bakadadwabo lakanyoko ngombana uziingazi zakanyoko.

¹⁴ Ungambuli ubuze bomfazi wakamfowabo lakayihlo ngombana bungebakayihlo begodu ngunyoko.

¹⁵ Ungambuli ubuze bomalukazanakho ngombana mfazi wendodanakho, ungabumbuli ubuze bakhe.

¹⁶ Ungambuli ubuze bomfazi womfowenu ngombana bungebomfowenu.

¹⁷ “Ungambuli ubuze bomfazi kanye nomntwanakhe omntazana begodu ungalali nanomntwana womntwana womfazi loyo ngombana batjhidelene khulu nawe; lokho kubuhlola.

¹⁸ Ungathathi umlamu wakho njengehlanzi wambule ubuze bakhe umkakho asaphila.

¹⁹ “Ungatjhideli emfazini bona wambule ubuze bakhe lokha nasasilapheleko ngebanga lokobana asesikhathini.

²⁰ Ungalali nomfazi womuntu womphakathi uzisilaphaze ngalokho.

²¹ “Unganikeli ngananyana ngimuphi wabantwana bakho bona bahlukaniselwe uMoleki njengeengwadla, ngombana akukafaneli ulirhubutjhe ibizo lakaZimakho. NginguSomnini.

²² Ungalalani nenye indoda njenganyana ulala wesifazana. Lokho kuyanyenyisa.

²³ Ungalingi ulale isilwana uzisilaphaze ngalokho. Godu akungabi khona umfazi ozinikela esilwaneni bona simlale. Lokho kubuhlola.

²⁴ “Ungazisilaphazi nangasinye sezintwezo ngombana izizwe engiziqotjha phambi kwenu zazisilaphaza ngazo

²⁵ nenarha yasilaphala. Yeke ngakhambela ukonakala kwayo. Ngebangelo inarha yabaphalaza abahlali bayo.

²⁶ Kodwana nina londani iimiso zami nemithethwami. Iye, tjhejani nina bantu bendabuko neenkhonzi eziphakathi kwenu bona ningenzi neyodwa yezinto ezinyenyisakwezo

²⁷ ngombana abantu bendawo le ebebahlala lapho phambilini benza zoke iinyenyiswezo, yeke inarha yasilaphala.

²⁸ Nanisilaphaza inarha, nayo izoniphalaza njengombana kwenzeka ezizweni ebezihlala enarheni ngaphambi kwenu.

²⁹ Iye, boke abenza nanyana ngiziphi iinyenyiswezo, bazakujutjwa ebantwini bekhabo.

³⁰ “Yeke londani imiyalwami, ningalingi nenze nayinye yemikhuba enyenyisako leyo eyayenziwa phambilini. Ningazisilaphazi ngayo. NginguSomnini uZimenu.”