ULEVITIKUSI 17 - IsiNdebele 2012 Translation

Imihlabelo ayisenzelwa noma kukuphi

¹ USomnini wakhuluma noMosi wathi

² akakhulume no-Aroni namadodanakhe kanye nawo woke ama-Israyeli athi: “Nakhu uSomnini ayale ngakho:

³ Nangabe umuntu wendlu yakwa-Israyeli uhlaba ikomo, imvu nanyana imbuzi ekampeni namkha ngaphandle kwekampa,

⁴ angayihlabeli emnyango wetende lokuhlanganela, okutjho ngaphambi kwethaberinakeli lakaSomnini, njengomnikelo kaSomnini, uzakubekwa umlandu wokuthulula iingazi. Iye, uthulule iingazi ngalokho uzakujutjwa ebantwini bekhabo.

⁵ Lokho kutjho bona imihlabelo yama-Israyeli avane ayihlabele emmangweni, kufuze ayilethe kumphristi emnyango wetende lokuhlanganela njengemihlabelo kaSomnini. Ahlabele uSomnini imihlabelo yetjhebiswano leyo lapho.

⁶ Nje-ke umphristi uzakufafaza iingazi e-aldarini lakaSomnini emnyango wetende lokuhlanganela bese utjhisa umhlwehlwe bona ube ngowamukeleka kuSomnini.

⁷ Angeze asahlabela uzinyana onesimo seembuzi adlhemadlheme ngemva kwakhe. Lokho kuzakuba simiso sanini nanini kibo eenzukulwaneni ngeenzukulwana.”

⁸ USomnini wathi godu akawatjele athi: “Nangabe umuntu wendlu yakwa-Israyeli nanyana osikhonzi phakathi kwenu uletha umhlabelo wokutjhiswa namkha omunye umhlabelo nje,

⁹ bese angawulethi emnyango wetende lokuhlanganela bona ube mhlabelo kuSomnini, umuntu loyo uzakujutjwa ebantwini bekhabo.”

Ukudla iingazi akukavumeleki

¹⁰ Godu uSomnini wathi kuMosi akakhulume nama-Israyeli athi: “Nangabe umuntu wendlu yakwa-Israyeli nanyana osikhonzi phakathi kwenu udla iingazi, ngizakujamelana nomuntu loyo. Ngizamjuba ebantwini bekhabo

¹¹ ngombana ukuphila kwenyama kuseengazini. Ngimi oninikele iingazi bona nenze ngazo itethelelo yemiphefumulwenu e-aldarini. Ngebanga lokobana iingazi ziletha itethelelo ngepilo ekizo

¹² ngalokho nginiyale nina ma-Israyeli ngathi, ‘Kungabi nomuntu phakathi kwenu namkha isikhonzi esihlala nani esidla iingazi’.

¹³ “Nangabe umuntu wakwa-Israyeli nanyana isikhonzi esiphakathi kwenu sikhamba siyokuzuma inyamazana namkha inyoni edliwako, kufuze siyikhuphe iingazi bese sizivala ngehlabathi.

¹⁴ Ngebanga lokobana ukuphila kwenyama yoke kuseengazini, ngiyale nina ma-Israyeli ngathi, ‘Nakuziingazi, akungabi nomuntu ozidlako ngombana ukuphila kwenyama yoke kuseengazini. Ozidlako uzakujutjwa ebantwini bekhabo.’

¹⁵ “Woke umuntu odla okuzifeleko namkha okudatjulwe ziimbandana, kungaba ngowendabuko namkha sikhonzi, kufuze ahlanze izambatho zakhe bese adude umzimbakhe. Uzakuhlala angosilapheleko bekuhlwe, emva kwalokho uzakuba ngohlambulukileko.

¹⁶ Kodwana nangabe akahlanzi izambatho zakhe abe adude umzimbakhe, uzazizwa ngesono sakheso.”