ULEVITIKUSI 15 - IsiNdebele 2012 Translation

Isifo sokuvuza kwendoda

¹ USomnini wakhuluma noMosi no-Aroni wathi

² abakhulume nama-Israyeli bathi: “Nangabe indoda inokuvuza ebudodeni bayo, ukuvuza kwayokho kusilaphele.

³ Isilaphele nanyana ukuvuza kwayo kuthonta namkha kungasathonti. Iye, ukuvuza kukusilaphala kiyo.

⁴ Yoke imibhede ovuzako alala kiyo izakuba ngesilapheleko nezinto zoke ahlala phezu kwazo zisilaphele.

⁵ Woke umuntu othinta umbhede womuntu onjalo kuzakufanela bona ahlanze izambatho zakhe, adude bese uhlala angosilapheleko bekuhlwe.

⁶ Woke umuntu ohlala phezu kwananyana yini ehlezwi ngovuzako kuzakufanela bona ahlanze izambatho zakhe, adude bese uhlala angosilapheleko bekuhlwe.

⁷ Othinta umzimba womuntu ovuzako kuzakufanela bona ahlanze izambatho zakhe, adude bese uhlala angosilapheleko bekuhlwe.

⁸ Nakube ovuzako ukhafulela ohlambulukileko, khona-ke ohlambulukileko kufuze ahlanze izambatho zakhe, adude bese uhlala angosilapheleko bekuhlwe.

⁹ Esinye nesinye isihlalo senjomani ekhwelwa ngovuzako sizakuba ngesisilapheleko.

¹⁰ Iye, nanyana ngubani othinta into egade ihlezwi namkha ilelwe ngovuzako uzakuba ngosilapheleko bekuhlwe. Begodu othwala into enjalo kuzakufanela bona ahlanze izambatho zakhe, adude bese uhlala angosilapheleko bekuhlwe.

¹¹ Othintwa ngovuzako angakahlambi izandla zakhe, uzakuhlanza izambatho zakhe, adude bese uhlala angosilapheleko bekuhlwe.

¹² Isitja somdaka esithintwa ngovuzako kufuze sephulwe; kuthi zoke izitja zesigodo zihlanzwe ngamanzi.

¹³ “Nasele ovuzako ahlanjululiwe, uzazibalela amalanga alikhomba wehlambululo bese uhlanza izambatho zakhe, adude ngemanzini agelezako, yeke uzakuba ngohlambulukileko.

¹⁴ Ngelanga lobunane alethe amazuba amabili wommango namkha amazutjana amabili wekhaya kumphristi phambi kwakaSomnini emnyango wetende lokuhlanganela.

¹⁵ Umphristi uzakwenza imihlabelo ngawo. Elinye libe mhlabelo wehlambululo bese kuthi elinye libe mhlabelo wokutjhiswa. Nje-ke umphristi uzamenzela itethelelo kuSomnini ngokuvuza kwakhe.”

Ukuvuza okujayelekileko kwendoda nomfazi

¹⁶ “Nangabe indoda itsanyazile, kufuze idude umzimba woke bese ihlala isilaphele bekuhlwe.

¹⁷ Nanyana ngiyiphi into yetjhila namkha yesikhumba etsanyazelweko, kufuze ihlanzwe bese ihlala ingesilapheleko bekuhlwe.

¹⁸ Nangabe indoda ilala nomfazi bese itsanyaze, bobabili kufuze badude, babe ngabasilapheleko bekuhlwe.

¹⁹ “Nangabe umfazi usesikhathini, uzakuba ngosilapheleko amalanga alikhomba, nomthintako uzakuba ngosilapheleko bekuhlwe.

²⁰ Yoke into alala phezu kwayo nasesikhathini, izakuba ngesilapheleko. Nakho koke ahlala kikho, kuzakuba ngokusilapheleko.

²¹ Naloyo othinta umbhedakhe kufuze ahlanze izambatho zakhe, adude bese uhlala angosilapheleko bekuhlwe.

²² Nothinta nanyana yini ehlezwi nguye, kufuze ahlanze izambatho zakhe, adude bese uhlala angosilapheleko bekuhlwe.

²³ Iye, uzakuba ngosilapheleko bekuhlwe nakube uthinta umbhede nanyana yini egade ihlezwi mfazi loyo.

²⁴ “Nangabe indoda ilala naye anjalo, ukusilaphala kwakhe kuba phezu kwayo. Indoda leyo izakuba ngesilapheleko amalanga alikhomba nombhede elala kiwo, uzakuba ngosilapheleko.”

Ukopha okudluleleko komfazi

²⁵ “Nangabe umfazi wopha iingazi amalanga amanengi kungasi sikhathi sakhe namkha ukudlula esikhathini, uzakuba ngosilapheleko njengalokha nasesikhathini mlunga nje asopha.

²⁶ Omunye nomunye umbhede alala kiwo nasophako, uzakuba ngosilapheleko njengalowo alala kiwo nasesikhathini. Nento yoke ahlala kiyo izakuba ngesilapheleko, ibe njenganyana asesikhathini.

²⁷ Woke umuntu othinta izintwezo uzakuba ngosilapheleko. Kufuze ahlanze izambatho zakhe, adude bese uhlala angosilapheleko bekuhlwe.

²⁸ “Nangabe ukopha kuphelile emfazini loyo, akazibalele yena amalanga alikhomba, emva kwalokho uzakuba ngohlambulukileko.

²⁹ Ngelanga lobunane akalethe amazuba amabili wommango namkha amazutjana amabili wekhaya kumphristi phambi kwakaSomnini emnyango wetende lokuhlanganela.

³⁰ Nje-ke umphristi uzakwenza elinye libe mhlabelo wehlambululo, elinye libe mhlabelo wokutjhiswa. Ngendlela leyo umphristi uzamenzela itethelelo kuSomnini ngokusilaphala kokopha kwakhe.

³¹ “Ngokunjalo nizabe niyelelisa ama-Israyeli ekusilaphaleni kwawo ukuze angafi ngebanga lokusilaphala kwawo ngokurhubutjha ithaberinakeli lami eliphakathi kwenu.

³² “Lowo kumthetho omayelana nomuntu ovuzako okutjho indoda etsanyazako bese iyasilaphala,

³³ umfazi osesikhathini, umuntu ovuzako nowophako kanye nendoda elala nomfazi osilapheleko.”