ULEVITIKUSI 14 - IsiNdebele 2012 Translation

Ukuhlanjululwa komuntu ogade anekhwekhwe

¹ USomnini wakhuluma noMosi wathi:

² “Naku umthetho womuntu ogade anekhwekhwe lokha nahlanjululwako: Akalethwe kumphristi

³ ozakuphumela ngaphandle kwekampa bona ayomhlola. Nakube ikhwekhwe lipholile,

⁴ umphristi uzakuyala bona ozokuhlanjululwa alethelwe iinyoni ezimbili ezihlambulukileko, isigojwana somsedari, nomtiya otlerebede nehlukuzu lehisophi.

⁵ Umphristi uzakuyala bona kukhiwe amanzi agelezako ngomjeka bese kuhlatjelwa enye yeenyoni ngehla kwawo.

⁶ Bese uthatha enye inyoni ephilako, isigojwana somsedari, umtiya otlerebede nehlukuzu lehisophi akutlubhuze eengazini zenyoni ehlatjelwe ngehla komjeka onamanzi akhiweko.

⁷ Akafafaze umuntu ozokuhlanjululwa loyo kalikhomba, amemezele bona uhlambulukile. Nje-ke akalise inyoni ephilako iphaphele emmangweni.

⁸ “Ohlanjululwako kuzakufanela ahlanze izambatho zakhe, arhune iinhluthu noboya boke emzimbeni bese uyaduda. Yeke uzakuba ngohlambulukileko. Emva kwalokho uzakubuyela ngekampeni nokho ahlale ngaphandle kwetende lakhe amalanga alikhomba.

⁹ Ngelanga lekhomba akagude zoke iinhluthu ehloko, esilevini namatjhiya. Iye, akasuse boke uboya emzimbeni. Nje-ke uzakuhlanza izambatho zakhe bese uyaduda. Yeke uzakuba ngohlambulukileko.

¹⁰ “Ngelanga lobunane ohlanjululwako loyo kufuze alethe amaqamanyana amabili nemvana esikazi enomnyaka, zoke zibe msulwa. Akalethe namathungana amathathu weflowuru esefiweko edutjwe ngamafutha we-oliva kanye nekwana yamafutha we-oliva.

¹¹ Umphristi omhlambululako uzamletha kanye nezintwezo phambi kwakaSomnini emnyango wetende lokuhlanganela.

¹² Yeke umphristi uzakuthatha linye lamaqamanyana lawo alihlabe libe mhlabelo wehlawulo kanye nekwana yamafutha bese uziphakamisa njengomnikelo osibiko kuSomnini.

¹³ Iqamanyanelo alihlatjelwe endaweni ecwengileko lapha kuhlatjelwa khona umhlabelo wehlambululo nomhlabelo wokutjhiswa. Umhlabelo wehlawulo njengomhlabelo wehlambululo ungowomphristi, ungocwenge khulu.

¹⁴ Umphristi uzakuthatha ingcenye yeengazi zomhlabelo wehlawulo azininde endlebeni yangesidleni, kuthubha wangesidleni naphezu kothubhakghuru wangesidleni emuntwini ohlanjululwako.

¹⁵ Yeke uzakuthatha ikwana yamafutha we-oliva awathele ngentendeni yesandla sakhe sesincele.

¹⁶ Nje-ke atlubhuze ngokhombabantu wangesidleni emafutheni angentendenakhe yangesinceleni, afafaze amafutha lawo kalikhomba phambi kwakaSomnini.

¹⁷ Amanye amafutha asentendeni yomphristi uzawaninda phezu kweengazi zomhlabelo wehlawulo endlebeni yangesidleni, kuthubha wangesidleni naphezu kothubhakghuru wangesidleni emuntwini ohlanjululwako.

¹⁸ Amafutha aseleko entendeni yomphristi uzawatjhatjha ehloko yomuntu loyo. Yeke umphristi uzakwenzela umuntu loyo itethelelo phambi kwakaSomnini.

¹⁹ Uzakunikela umhlabelo wehlambululo ukwenzela itethelelo yaloyo okufuze ahlanjululwe ekusilaphaleni kwakhe. Emva kwalokho ahlabe umhlabelo wokutjhiswa.

²⁰ Umphristi uzakutjhisa umhlabelo wokutjhiswa noweenthoro phezu kwe-aldari. Ngendlela leyo umphristi uzamenzela itethelelo; yeke umuntu loyo uzakuba ngohlambulukileko.

²¹ “Kodwana nakube umuntu uchakile begodu akanamandla wokwenza koke lokhu, uzakuthatha iqamanyana elilodwa libe mhlabelo wehlawulo osibiko kuSomnini ukumenzela itethelelo. Akalethe umnikelo weenthoro okulithungana leflowuru esefiweko edutjwe ngamafutha we-oliva, ikwana yamafutha we-oliva,

²² amazuba amabili wommango namkha amazutjana amabili wekhaya kube ngilokho angakukghona. Elinye libe ngelomhlabelo wehlambululo bese elinye liba ngelomhlabelo wokutjhiswa.

²³ Kufuze alethe lokho kumphristi ngelanga lobunane emnyango wetende lokuhlanganela phambi kwakaSomnini bona kube ngekokuhlanjululwa kwakhe.

²⁴ Umphristi uzakuthatha imvana yomhlabelo wehlawulo nekwana yamafutha we-oliva bese ukuphakamisa njengomnikelo osibiko kuSomnini.

²⁵ Uzakuhlaba imvana yomhlabelo wehlawulo, athathe ingcenye yeengazi zayo azininde endlebeni yangesidleni, kuthubha wangesidleni naphezu kothubhakghuru wangesidleni emuntwini ohlanjululwako.

²⁶ Godu umphristi uzakuthela amanye wamafutha ngentendeni yesandla sakhe sesincele

²⁷ bese ufafaza amafutha angentendenakhe yangesinceleni ngokhombabantu wangesidleni kalikhomba phambi kwakaSomnini.

²⁸ Amanye amafutha asentendeni yomphristi uzawaninda phezu kweengazi zomhlabelo wehlawulo endlebeni yangesidleni, kuthubha wangesidleni naphezu kothubhakghuru wangesidleni emuntwini ohlanjululwako.

²⁹ Amafutha aseleko entendeni yomphristi uzawatjhatjha ehloko yomuntu loyo. Yeke umphristi uzakwenzela umuntu loyo itethelelo phambi kwakaSomnini.

³⁰ Umphristi uzakwenza imihlabelo ngamazutjana, kube ngendlela umuntu loyo aphumelela ngayo ukunikela.

³¹ Elinye libe ngelomhlabelo wehlambululo bese kuthi elinye libe ngelomhlabelo wokutjhiswa linikelwe kanye nomnikelo weenthoro. Ngendlela leyo umphristi uzakwenza itethelelo yomuntu ohlanjululwako loyo phambi kwakaSomnini.

³² “Lowo mthetho womuntu onekhwekhwe, ozihlulekelako ukuletha imihlabelo yehlambululo ejayelekileko.”

Ukusilaphala kwendlu

³³ USomnini wakhuluma noMosi no-Aroni wathi:

³⁴ “Lokha nanifika enarheni yeKanana enganinikela yona bona ibe lilifa lenu bese ngibangela ukukghora endlini enye nenye enarhenenu,

³⁵ umninindlu kuzakufanela bona eze kumphristi azokubika athi, ‘Ngibona kwangasuthi kwamapha kungene umkhokha.’

³⁶ Yeke umphristi uzakuyala bona kukhutjhwe koke okungendlini ngaphambi kokobana angene bona azoyihlola. Nakungasinjalo koke okungendlini kungahle kumenyezelwe bona kusilaphele. Nasele kukhutjhwe koke, umphristi uzakungena bona ahlole indlu.

³⁷ Nje-ke umphristi uzakuhlola umkhokha lowo. Nangabe ufunyana bona iboda linokukghora okuhlazana namkha okubovana okubonakala kungenelele ebodeni,

³⁸ umphristi uzakuphuma ngendlini ajame emnyango ngaphandle bese uvala indlu leyo amalanga alikhomba.

³⁹ Ngelanga lekhomba umphristi uzakubuya azokuhlola indlu. Nangabe ufunyana ukukghora kusabalele neboda lendlu,

⁴⁰ uzakuyala bonyana kukhutjhwe amatje anokukghora, aphoselwe ngaphandle komuzi ezaleni.

⁴¹ Uzakwenza bona kurhwayiwe umpharo wendlu ngaphakathi, kuthi koke okuqeqebuliweko, kuthululelwe ngaphandle komuzi ezaleni.

⁴² Kuzakuthathwa amanye amatje ajamiselele alahliweko bese usinda indlu leyo butjha ngehlabathi.

⁴³ “Nakube ukukghora kuyabuya ngendlinapho bekusabalale ngemva kokobana sele kususwe amatje, kwarhwaywa bekwasindwa,

⁴⁴ umphristi kufuze abuyele ayokuhlola godu. Nakubonakala bona isifo sisabalele nendlu godu, yeke lokho kukukghora okukhambeleleko. Indlu leyo isilaphele.

⁴⁵ Yeke ayibhuruzwe indlu leyo, kuthi yoke iququ okutjho amatje, iingodo nehlabathi ebekusindwe ngayo, kukhutjhelwe ngaphandle komuzi ezaleni.

⁴⁶ Loyo ozakungena ngendlini ngesikhathi sokuvalwa kwayo uzakuba ngosilapheleko bekuhlwe;

⁴⁷ naloyo olala namkha adlele ngendlini leyo uzakuhlanza izambatho zakhe.

⁴⁸ “Kodwana nangabe umphristi uthi nangena ngendlini azoyihlola, afunyane bona ukukghora akukasabalali ngemva kokobana indlu besele isindiwe, uzakumemezela bona indlu leyo ihlambulukile okutjho bona ukukghora kusukile.

⁴⁹ Mayelana nokuhlanjululwa kwendlu leyo umniniyo uzaletha iinyoni ezimbili, isigojwana somsedari, umtiya otlerebede nehlukuzu lehisophi.

⁵⁰ Umphristi uzakuyala bona kukhiwe amanzi agelezako ngomjeka bese kuhlatjelwa enye yeenyoni ngehla kwawo.

⁵¹ Godu akathathe isigojwana somsedari, ihlukuzu lehisophi nomtiya otlerebede kanye nenyoni ephilako bese utlubhuza izintwezo ngemanzini aneengazi zenyoni ehlatjiweko, afafaze indlu leyo kalikhomba.

⁵² Ngendlela leyo uzabe uhlambulula indlu ngeengazi zenyoni leyo, amanzi asemjekeni, inyoni ephilako, isigojwana somsedari, ihisophi nangomtiya otlerebede.

⁵³ Uzakulisa inyoni ephilako iphaphele ngaphandle komuzi emmangweni. Ngalokho uzabe enzele indlu leyo ihlambululo, ibe ngehlambulukileko.

⁵⁴ “Lowo-ke mthetho wanyana ngisiphi isifo sekhwekhwe, ubuthana bembuzana,

⁵⁵ ukukghora engutjeni nangendlini,

⁵⁶ ukuvuvuka, ukukaruka nebala.

⁵⁷ Nako-ke umthetho wezifezo umuntu angakghona ukuhlukanisa ngawo bona into isilaphele nini namkha ihlambuluke nini.”