ULEVITIKUSI 13 - IsiNdebele 2012 Translation

Imithetho mayelana nesifo esisilaphazako sesikhumba

¹ USomnini wakhuluma noMosi no-Aroni wathi:

² “Lokha umuntu nanendawo evuvukileko emzimbeni nanyana anokukaruka namkha ibala elikhanyelako okungahle kubonakale inga likhwekhwe, akalethwe ku-Aroni umphristi namkha kwenye yamadodanakhe.

³ Umphristi loyo uzabese uhlola indawo enesifo esikhumbeni. Nakube uboya besikhumba buphenduke baba mhlophe nokobana isifo singenelele esikhumbeni, kulikhwekhwe lokho. Kuzakuthi umphristi nabona lokho amemezele bona umuntu loyo usilaphele.

⁴ Kodwana nakube isilonda siyakhanyela kwaphela nokobana asikangeneleli esikhumbeni, noboya abukaphenduki baba mhlophe, umphristi akakhuphe umuntu loyo hlangana nabantu amalanga alikhomba.

⁵ Ngelanga lekhomba umphristi akamhlole godu. Nangabe kubonakala emehlweni womphristi bona isilonda asikasabalali esikhumbeni, kufuze amkhuphe godu amanye amalanga alikhomba.

⁶ Kuzakuthi ngelanga lekhomba amhlole godu. Nangabe isilonda asisakhanyeli kuhle begodu asikasabalali esikhumbeni, umphristi uzakumemezela bona uhlambulukile. Lokho sesibabu nje kwaphela. Umuntu loyo akahlanze izambatho zakhe, ahlambuluke.

⁷ Kodwana nangabe isibabu leso sisabalala nesikhumba emva kobana sele azibonakalise kumphristi ngokuhlanjululwa kwakhe, kufuze azibonakalise phambi komphristi godu.

⁸ Umphristi uzabese uyamhlola. Nangabe isibabu sisabalele nesikhumba, umphristi uzakumemezela bona usilaphele. Likhwekhwe lelo.

⁹ “Nangabe umuntu unekhwekhwe, kufuze alethwe kumphristi.

¹⁰ Umphristi akamhlole, nakube mbala kunendawo ekhanyela ngokuvuvuka esikhumbeni okuphendule uboya baba mhlophe nokobana sekunesilonda,

¹¹ lelo likhwekhwe elingeneleleko esikhumbeni. Nje-ke umphristi uzakumemezela bona usilaphele. Loyo-ke akahlukaniswe nabantu kwesikhatjhana ngombana usilaphele.

¹² Kodwana nangabe isifo sisabalele nesikhumba ukufika lapha sele sembese umzimba woke womuntu, ihloko neenyawo okutjho zoke izitho ezibonakala kumphristi,

¹³ umphristi uzabese uyamhlola. Nangabe isikhumba sakhe simhlope, uzakumemezela bona uhlambulukile. Nanyana isifo besele sembese woke umzimba, ungohlambulukileko.

¹⁴ Kodwana nakube masinyana uba nesilonda, khona-ke usilaphele.

¹⁵ Umphristi akahlole isilondeso bese amemezele bona umuntu loyo usilaphele. Isilonda sisilaphele, silikhwekhwe.

¹⁶ Kodwana nakube isilonda siyabutha bese siba mhlophe, akeze kumphristi,

¹⁷ umphristi amhlole. Nangabe isilonda siphenduke saba mhlophe, umphristi uzakumemezela bona uhlambulukile; yeke mbala uhlambulukile.

¹⁸ “Nangabe umuntu unethumba elipholako esikhumbeni sakhe

¹⁹ bese kuthi esikhundleni salo kube nokuvuvuka okubuthako namkha ibala elibovu elingakhanyeliko, naloyo kufuze azibonakalise phambi komphristi.

²⁰ Umphristi akamhlole. Nangabe indawo ethintekileko ibonakala bona sele ingenelele esikhumbeni noboya buphenduke baba mhlophe, umphristi uzakumemezela bona usilaphele. Kulikhwekhwe eliqubuke esilondeni.

²¹ Kodwana nangabe umphristi uhlola indawo ethintekileko afunyanise bona ayikangeneleli esikhumbeni nokobana ayikakhanyeli kuhle begodu uboya abukaphenduki baba mhlophe, khona-ke umphristi akamkhuphe hlangana nabantu amalanga alikhomba.

²² Nangabe ibala lisabalala nesikhumba, umphristi uzakumemezela bona usilaphele. Likhwekhwe-ke lelo.

²³ Kodwana nakube ibala lihlala linjalo alisabalali, kusibazi sethumba kwaphela. Umphristi uzakumemezela bona umuntu loyo uhlambulukile.

²⁴ “Nakube umuntu unenceba lokutjha esikhumbeni bese isilonda sakhona siba nebala elimthuthu namkha elimhlophe

²⁵ umphristi akalihlole ibalelo. Nakube uboya bebala buphenduke baba mhlophe begodu ibala libonakala lingenelele esikhumbeni, lelo likhwekhwe elivele encebeni lokutjha. Yeke umphristi uzakumemezela bona usilaphele. Lokho sisifo sekhwekhwe.

²⁶ Kodwana nakube umphristi uyalihlola bese afunyanise bona uboya bebala abusi mhlophe nokobana alikangeneleli esikhumbeni begodu alikhanyeli kuhle, akamkhuphe hlangana nabantu amalanga alikhomba.

²⁷ Kuzakuthi ngelanga lekhomba umphristi amhlole godu. Nakube lisabalala nesikhumba akamemezele bona umuntu loyo usilaphele. Lokho sisifo sekhwekhwe.

²⁸ Kodwana nakube ibala lihlala lisendaweni eyodwa alisabalali nesikhumba begodu alikhanyeli kuhle, lokho sekuvuvuka kwenceba lokutjha nje. Umphristi uzakumemezela bona uhlambulukile ngombana lokho sibazi sokutjha.

²⁹ “Nakube indoda namkha umfazi unesifo ehloko nanyana esilevini,

³⁰ umphristi akahlole isifeso. Nakube sibonakala singenelele esikhumbeni nokobana uboya obukiso bumthubi ngombala begodu buthambile, umphristi uzakumemezela bona umuntu loyo usilaphele. Lobo kubuthana bembuzana okulikhwekhwe lehloko namkha lesilevu.

³¹ Nakube umphristi uhlola ubuthana bembuzanobo, bekubonakale bona akukangeneleli esikhumbeni nokobana akunaboya obunzima tshu phezu kwabo, khona umphristi uzakhupha umuntu onesifo hlangana nabantu amalanga alikhomba.

³² Ngelanga lekhomba umphristi uzakuhlola isifo godu. Nakube ubuthana bembuzana abukasabalali begodu abukangeneleli esikhumbeni nokobana akunaboya obumthubi,

³³ umuntu loyo uzakurhunwa, kodwana lapha kunobuthana bembuzana khona angakurhuni. Umphristi uzamkhupha hlangana nabantu amanye amalanga alikhomba.

³⁴ Ngelanga lekhomba umphristi akahlole ubuthana bembuzana godu. Nakube ubuthana bembuzana abukasabalali begodu abukangeneleli esikhumbeni, khona-ke umphristi uzakumemezela bona uhlambulukile. Yeke umuntu loyo uzakuhlanza izambatho zakhe abe ngohlambulukileko.

³⁵ Kodwana nakube ubuthana bembuzana busabalala nesikhumba emva kokuhlanjululwa kwakhe,

³⁶ umphristi uzamhlola godu. Nakube ubuthana bembuzana busabalele nesikhumba, akudingeki bona umphristi ahlole uboya obumthubi. Nanjalo ungosilapheleko.

³⁷ Kodwana nangabe ekuboneni komphristi ubuthana bembuzana bujame ndawonye noboya obunzima bumilile, khona-ke ubuthana bembuzana bupholile nomuntu uhlambulukile. Yeke umphristi uzakumemezela bona uhlambulukile.

³⁸ “Nakube indoda nanyana umfazi unamabala amhlophe esikhumbeni,

³⁹ umphristi akamhlole. Nangabe amabala asesikhumbeni amthuthu, lobo bumhlophe besikhumba obujayelekileko, umuntu loyo uhlambulukile.

⁴⁰ “Nakube indoda ineenhluthu eziqothukileko ehlokwayo yaba liphandla, ihlambulukile.

⁴¹ Godu nakube indoda iqothuke iinhluthu ukusuka epandlayo, ihlambulukile ngombana seliphandla nje.

⁴² Kodwana nakube kunebala elibovu nokumhlophe phezu kwephandla nepandla, lokho kungatjho bona likhwekhwe elisabalalako.

⁴³ Yeke umphristi kufuze amhlole. Nangabe ukuvuvuka kwebala phezu kwephandla lakhe namkha epandla kunebala elibovu nokumhlophe elifana nekhwekhwe lomzimba,

⁴⁴ khona-ke sekumumuntu onekhwekhwe nosilapheleko. Umphristi kufuze amemezele bona usilaphele. Isifo sakhe siphezu kwehloko.

⁴⁵ “Umuntu onesifo sekhwekhwe kufuze embathe amanikiniki abe aliselele neenhluthu zakhe zimatlharatlhara bese avale isibhena sakhe somlomo esingehla arhuwelele athi, ‘Ngisilaphele! Ngisilaphele!’

⁴⁶ Uzakuhlala angosilapheleko njalo mlunga anesifeso. Usilaphele yena begodu kufuze ahlale yedwa endaweni engaphandle kwekampa.”

Ukusilaphala kwezambatho

⁴⁷ “Kungaba nokukghora esambathweni esenziwe ngewulu namkha ngelineni,

⁴⁸ namkha phezu kwentambo ephothiweko netjhila elenziwe ngelineni nanyana ngewulu namkha phezu kwesikhumba esitjhukiweko nanyana yini yesikhumba.

⁴⁹ Nakube kubonakala ubuhlazana namkha ububovana phezu kwesambatho, isikhumba esitjhukiweko, intambo ephothiweko netjhila, namkha naphezu kwananyana yini yesikhumba, kukghora-ke lokho. Okunjalo akutjengiswe umphristi.

⁵⁰ Umphristi uzakuhlola indawo ethintekileko bese ubekela into leyo eqadi amalanga alikhomba.

⁵¹ Kuzakuthi ngelanga lekhomba ayihlole godu. Nakube ukukghora kusabalele nesambatho, intambo ephothiweko, itjhila nesikhumba esitjhukiweko namkha kungaba nanyana yini eyenziwe ngesikhumba, lokho kukukghora okukhambeleleko. Ipahla leyo isilaphele.

⁵² Umphristi akatjhise nanyana yini enokukghora okukhambeleleko eyenziwe ngewulu namkha ngelineni, kungaba sisambatho, intambo ephothiweko namkha itjhila nananyana yini eyenziwe ngesikhumba. Iye, nayinokukghora okukhambeleleko kufuze itjhiswe.

⁵³ “Nangabe umphristi uthi nahlolako afunyane bona ukukghora akukasabalali nesambatho, intambo ephothiweko, itjhila namkha nanyana yini eyenziwe ngesikhumba,

⁵⁴ khona-ke uzakuyala bona kuhlanzwe into enokukghora leyo abe ayibekele eqadi amanye amalanga alikhomba.

⁵⁵ Emva kwalokho umphristi kufuze ahlole into leyo. Nakube indawo ethintekileko ayikatjhugululi umbala namkha ayikasabalali, nanyana injalo isilaphele. Into leyo ayitjhiswe nanyana ukukghora kungemuva namkha ngaphambili kwayo.

⁵⁶ “Kodwana nakube umphristi uhlola into leyo afunyane ukukghora kufiphele ngemva kokobana ihlanziwe beyabekelwa eqadi, kuzakufanela bona adabule indawo ethintekileko esambathweni, entweni yesikhumba namkha entanjeni ephothiweko netjhileni.

⁵⁷ Nakube kuyenzeka ukukghora kuvele godu esambathweni, entanjeni ephothiweko, etjhileni nakunanyana yini yesikhumba, kutjho bona kuyasabalala. Into enokukghora leyo ayitjhiswe.

⁵⁸ Kodwana isambatho, intambo ephothiweko, itjhila nanyana yini yesikhumba ukukghora okususiweko kikho emva kokobana kuhlanziwe, kufuze ihlanzwe ngokwesibili. Nje-ke kuzakuba ngokuhlambulukileko.

⁵⁹ “Lowo mthetho wokukghora okuhlolwa ngawo bona isambatho sewulu namkha selineni, intambo ephothiweko, itjhila nanyana yini yesikhumba kuhlambulukile namkha kusilaphele.”