ULEVITIKUSI 11 - IsiNdebele 2012 Translation

Ukudla okuhlambulukileko nokusilapheleko

¹ USomnini wakhuluma noMosi no-Aroni bonyana

² batjele ama-Israyeli bathi: “Kizo zoke iimphili ezikhona enarheni, nanzi eningazidla:

³ Zoke iinlwana ezihlukanisa kabili iinqatha bezetjise zidleni.

⁴ “Kodwana lezo ezetjisa kwaphela namkha ezahlukanisa iinqatha kwaphela, ningazidli. Ikamela liyetjisa kodwana iinqatha zalo azikahlukani; yeke lisilaphele kini.

⁵ Nembila iyetjisa kodwana iindlawu zayo azikahlukani; isilaphele kini.

⁶ Umqasa nawo uyetjisa kodwana iindlawu zawo azikahlukani; usilaphele kini.

⁷ Godu iwotji ineenqatha ezihlukene kabili kodwana ayetjisi; isilaphele kini.

⁸ Ningadli inyamazo begodu ningathinti iindumbu zazo; zisilaphele kini.

⁹ “Kizo zoke eziphila ngemanzini elwandle nemlanjeni, ningadla nanyana yini eneengwedlo neempepha.

¹⁰ Kodwana nanyana ngisiphi isiphili esihlala ngelwandle namkha ngemilanjeni esinganangwedlo neempepha okutjho eziphithizelako nezikulu, zisinyenyiso kini.

¹¹ Nizinyenye ezinjalo, inyamazo ningayidli neendumbu zazo zizakuhlala zingezinyenyisako kini.

¹² Nanyana yini engemanzini enganangwedlo neempepha isinyenyiso kini.

¹³ “Iinyoni ezisinyenyiso kini neningakafaneli ukuzidla ngilezi: yoke imihlobo yamadlanga,

¹⁴ imihlobo yabokholo,

¹⁵ yoke imihlobo yamagubulu,

^16-18 iinciliba, yoke imihlobo yeenrhululurhulu, yoke imihlobo yamakhozi, abotlhame, amalanda,

¹⁹ abonogolantethe, abodoyi, amagqofu nabonomaphelaphelana.

²⁰ “Zoke iinunwana ezineempiko nemilenzana zisinyenyiso kini.

²¹ Kodwana phakathi kweenunwana ezineempiko nemilenzana, ningadla lezo ezinamaqondo wokweqayeqa ehlabathini.

²² Kizo ningadla: isikhonyani ngokwemihlobaso, amaboni ngemihlobawo, amadiye ngokwemihlobawo kanye nezinye iintethe.

²³ Zoke ezinye iinunwana ezineempiko nemilenzana zisinyenyiso kini.

²⁴ “Nasi indlela enizakusilaphala ngayo: Nanyana ngubani othinta isidumbu sesiphili esisilapheleko uzokuba ngosilapheleko bekuhlwe.

²⁵ Nanyana ngubani othwala isidumbu sesiphileso kufuze ahlanze izambatho zakhe, kodwana uzokuba ngosilapheleko bekuhlwe.

²⁶ Zoke iinlwana ezineenqatha ezingakahlukani kabili begodu zingetjisi, zisilaphele kini; nanyana ngubani othinta iindumbu zazo uzakuba ngosilapheleko.

²⁷ Zoke iinlwana ezikhamba ngeendlawu zisilaphele kini. Nanyana ngubani othinta iindumbu zazo uzakusilaphala bekuhlwe.

²⁸ Nanyana ngubani othwala isidumbu sazo kufuze ahlanze izambatho zakhe, kodwana uzokuba ngosilapheleko bekuhlwe ngombana zisilaphele kini.

^29-30 “Phakathi kweenkhakhabi eziphithizela ehlabathini, nanzi ezisilapheleko kini: iimfukwana namakhondlo, yoke imihlobo yeembhadwa nabononkghadanyana kanye namanwabu.

³¹ Lezo zisilaphele kini phakathi kwazo zoke iimbandana ezikhakhaba ehlabathini. Othinta iindumbu zazo uzakuba ngosilapheleko bekuhlwe.

³² Nanyana yini ewelwa ziindumbezo izakuba ngesilapheleko, kungaba ngeyenziwe ngesigodo, ngetjhila, ngesikhumba, ngomgodla namkha ngisiphi isitja esisetjenziselwa nanyana yini. Yeke kufuze sitlubhuzwe ngemanzini kodwana sizakuba ngesisilapheleko bekuhlwe. Emva kwalokho sizakuhlambuluka.

³³ Okungaphakathi kwesitja somdaka esiwelwa nanyana ngisiphi seendumbezo, kusilaphele. Ngalokho kufuze nisephule.

³⁴ Koke ukudla okuqaphakelwe mamanzi wesitjeso, kuzakuba ngokusilapheleko. Zoke iinselo ezingahle ziselelwe ngaphakathi kwaso zisilaphele.

³⁵ Nanyana yini ewelwa ziindumbezo, isilaphele. Kungaba siwulu somdaka namkha iziko, akwephulwe ngombana kusilaphele begodu kuzakuhlala kusilaphele kini.

³⁶ Nakumthombo namkha umphathamanzi kuzakuba ngokuhlambulukileko, kodwana othinta isidumbu esiwele ngaphakathi, usilaphele.

³⁷ Nanyana ngiyiphi imbewu ekufuze itjalwe, nayiwelwa sidumbu sazo izakuba ngehlambulukileko,

³⁸ kodwana nakube imbewu ithambile bese kuthi isidumbu sazo siwele imbewu leyo, khona-ke isilaphele kini.

³⁹ “Nakube kuyenzeka bona kufe isilwana enisidlako, othinta isidumbu sesilwaneso uzakuba ngosilapheleko bekuhlwe.

⁴⁰ Loyo odla inyama yesilwana esizifeleko kufuze ahlanze izambatho zakhe begodu uzakuba ngosilapheleko bekuhlwe. Kanti-ke nothwala isidumbu sesilwaneso kufuze ahlanze izambatho zakhe abe ngosilapheleko bekuhlwe.

⁴¹ “Zoke iimbandana ezikhakhaba ehlabathini ziyanyenyisa kini, azingadliwa,

⁴² kungaba ngokurhurhubako, okukhakhaba ngemilenze emine namkha okuneenyawo ezinengi. Koke okuphithizela ehlabathini ningakudli ngombana kuyanyenyisa kini.

⁴³ Ningazenzi bona nibe ngabanyenyekako ngebanga lananyana ngisiphi isikhakhabi esiphithizelako. Ningazisilaphazi ngazo ukuze ningasilaphali.

⁴⁴ NginguSomnini uZimenu, ngalokho zahlukaniseleni mina. Yibani ngabacwengileko ngombana mina ngicwengile. Ningazisilaphazi nanganyana yini ekhakhaba ehlabathini.

⁴⁵ Iye, nginguSomnini owanikhupha enarheni yeGibhide bona ngibe nguZimu kini. Ngebangelo yibani ngabacwengileko ngombana mina ngicwengile.

⁴⁶ “Lowo-ke mthetho ophathelene neenlwana, iinyoni, iimphili zoke eziphithizela ngemanzini nezikhakhaba ehlabathini.

⁴⁷ Ngawo nizakwazi ukuhlukanisa phakathi kokuhlambulukileko nokusilapheleko, naphakathi kweemphili ezidliwako nezingadliwako.”