ULEVITIKUSI 1 - IsiNdebele 2012 Translation

Umhlabelo wokutjhiswa

¹ USomnini angetendeni lokuhlanganela, wabiza uMosi wakhuluma naye wathi

² akakhulume nama-Israyeli athi: “Lokha nanyana ngubani phakathi kwenu naletha umnikelo wefuyo kuSomnini kufuze kube yikomo, imvu nanyana imbuzi.

³ “Nangabe umnikelwakhe umhlabelo wokutjhiswa, kumele kube yikunzi emsulwa. Ayilethe emnyango wetende lokuhlanganela kube ngendlela eyamukelekako kuSomnini:

⁴ Umuntu loyo uzakubeka isandla sakhe phezu kwehloko yekunzi emhlabelo leyo. Umhlabelwakhe uzakwamukeleka njengetethelelo.

⁵ Kuzakufanela bona ahlabe ikunzana leyo phambi kwakaSomnini bese kuthi amadodana ka-Aroni okubaphristi bathathe iingazi zayo bazifafaze mahlangothi woke we-aldari ngaphambi komnyango wetende lokuhlanganela.

⁶ Umuntu loyo akahlinze umhlabelwakhe abe awuhlahlele.

⁷ Amadodana ka-Aroni umphristi akalungise iinkuni bese aphemba umlilo phezu kwe-aldari.

⁸ Amadodana ka-Aroni abaphristi lawo, akabeke izitho, ihloko kanye nomhlwehlwe phezu kweenkuni ezivuthako e-aldarini.

⁹ Umuntu loyo akahlanze iinredlo neenqatha ngamanzi ukuze umphristi akwazi ukutjhisa woke umhlabelo e-aldarini. Lokho kuzakuba mhlabelo wokutjhiswa okumnikelo okhethekileko, owamukeleka kuSomnini.

¹⁰ “Nakube umnikelwakhe uwuthethe emhlambini wezimvu namkha weembuzi bona kube mhlabelo, khona kumele alethe iduna elimsulwa.

¹¹ Kufuze ahlabele idunelo ngehlangothini elingetlhagwini ye-aldari phambi kwakaSomnini bese abaphristi okumadodana ka-Aroni bathathe iingazi zedunelo bazifafaze mahlangothi woke we-aldari.

¹² Umuntu loyo akalihlahlele idunelo ngezitho zalo. Umphristi ahlele izithwezo, ihloko nomhlwehlwe phezu kweenkuni ezivuthako e-aldarini.

¹³ Umuntu loyo akahlanze iinredlo neenqatha ngamanzi ukuze umphristi akwazi ukutjhisa woke umhlabelo e-aldarini. Lokho kuzakuba mhlabelo wokutjhiswa okumnikelo okhethekileko, owamukeleka kuSomnini.

¹⁴ “Nakube umnikelwakhe kuSomnini kumhlabelo wokutjhiswa weenyoni, khona-ke umuntu loyo kufuze enze umhlabelo wezuba lommango namkha izutjana lekhaya.

¹⁵ Umphristi akalethe umhlabelo wenyoni leyo e-aldarini, aquntule ihlokwayo, ayitjhise e-aldarini. Iingazi zayo aziphophisele ngeqadi kwe-aldari.

¹⁶ Asuse ingingila neensiba azilahlele ezaleni ngepumalanga ye-aldari.

¹⁷ Umuntu loyo kufuze ayivule ukufikela emaphikweni, kodwana angayiphadlhuli bona ihlukaniseke yoke. Umphristi ayitjhise phezu kweenkuni ezivuthako e-aldarini. Lokho kuzakuba mhlabelo wokutjhiswa okumnikelo okhethekileko, owamukeleka kuSomnini.”