UJWANISI 9 - IsiNdebele 2012 Translation

UJesu uphophulula umuntu owabelethwa asiphofu

¹ Kwathi uJesu asakhamba, wabona umuntu owabelethwa asiphofu.

² Abafundi bakhe bambuza bathi: “Mfundisi, ngubani owonileko, mumuntu lo namkha babelethi bakhe ukuze abelethwe asiphofu na?”

³ UJesu waphendula wathi: “Akhange kone yena namkha ababelethi. Lokhu kwenzeka khona amandla kaZimu azakubonakala ngaye.

⁴ Ikani kusemini, kufanele sisebenze umsebenzi waloyo ongithumileko. Ubusuku buyeza lapha kungekhe kwasebenza muntu khona.

⁵ Ikani ngisesephasini, ngimkhanyo wephasi.”

⁶ Ngemva kobana atjho lokhu, wakhafulela equlwanini wabhica idaka ngamathe, walininda emehlweni womuntu loyo.

⁷ Wathi kuye: “Khamba uyokuhlamba ngesizibeni seSilowama.” (Ibizweli litjho ukuthi Thunyiwe). Yeke wakhamba wayokuhlamba, wabuya sele abona.

⁸ Abomakhelwana bakhe nabantu abambona nakhombelako ngaphambi kwalokhu, bathi: “Akusuye umuntu lo ogade aphele ahlale phasi akhombele na?”

⁹ Abanye bathi: “Nguye,” kodwana abanye bathi: “Awa, akasuye; uzifanela naye kwaphela.” Yeke umuntu ngokwakhe wathi: “Nginguye.”

¹⁰ Bathanda ukwazi bathi: “Kwenzeke njani bona amehlwakho avuleke?”

¹¹ Waphendula wathi: “Umuntu okuthiwa nguJesu wabhica idaka, walininda emehlwenami wathi, ‘Khamba uye eSilowama uyokuhlamba khona.’ Yeke ngaya ngahlamba, ngase ngiyabona.”

¹² Bambuza bathi: “Alo, uphi umuntu loyo na?” Waphendula wathi: “Angazi.”

AbaFarisi bahlolisisa ukuphophululwa

¹³ Yeke umuntu ogade angaboni loyo, bamusa ebaFarisini.

¹⁴ Mhlana uJesu enza idaka amphophulula, bekungeSabatha.

¹⁵ AbaFarisi bambuza godu umuntu loyo bona waphophuluka njani. Wabatjela wathi: “Waninda idaka emehlwenami; ngahlamba ngase ngiyabona.”

¹⁶ Abanye babaFarisi bathi: “Umuntu loyo akaveli kuZimu ngombana akalilondi iSabatha.” Kodwana abanye bathi: “Kungenzeka njani isoni senze iimangaliso ezinje na?” Ngalokho kwaba nokuhlukana phakathi kwabo.

¹⁷ Ekugcineni bambuza obekaphophele, bathi: “Alo-ke wena uthini ngaye njengombana avule amehlwakho nje?” Waphendula wathi: “Umphorofidi.”

¹⁸ AmaJuda akhange akholwe bona bekasiphofu manjesi selabona, kufikela babiza khona ababelethi bomuntu loyo.

¹⁹ Bababuza bathi: “Yindodana yenu le na? Nithi yabelethwa isiphofu; nje-ke kwenzeke njani bonyana kwanjesi ibone na?”

²⁰ Ababelethi bakhe baphendula bathi: “Siyazi bona yindodana yethu, besiyazi bona yabelethwa isiphofu.

²¹ Kodwana bonyana kuze bunjani ikghone ukubona nokobana iphophululwe ngubani, thina asazi. Ibuzeni, ikhulile ingakghona ukuziphendulela!”

²² Ababelethi bayo batjho lokhu ngombana gade besaba amaJuda, ngebanga lokobana amaJuda besele enze isiqunto bona nanyana ngubani ovuma bona uJesu unguKrestu uzakurijwa ngesinagogini.

²³ Kungebangelo ababelethi bayo bathi: “Ikhulile, buzani yona.”

²⁴ Kwesibili godu bambiza umuntu owabelethwa asiphofu, bathi kuye: “Funga phambi koZimu bona uzakhuluma iqiniso! Siyazi thina bona umuntu lo sisoni.”

²⁵ Waphendula wathi: “Ukuthi sisoni namkha akasiso, lokho angikwazi. Kunye engikwaziko kukobana bengisiphofu, manjesi sengiyabona.”

²⁶ Bambuza bathi: “Ukwenzeni na? Ukuphophulule njani na?”

²⁷ Waphendula wathi: “Senginitjelile, kodwana anifuni ukuzwa. Yini enifuna ukukuzwa godu na? Nani nifuna ukuba bafundi bakhe na?”

²⁸ Bamtemeleja ngamagama bathi: “Nguwe omfundi womrhali loyo! Thina sibafundi bakaMosi!

²⁹ Siyazi bona uZimu wakhuluma noMosi, kodwana nakumrhali loyo, asazi bona uvelaphi!”

³⁰ Umuntu loyo waphendula wathi: “Lokho kuyinto erarako! Abe anazi bona uvelaphi, nanyana kunjalo mina ungiphophulule!

³¹ Siyazi bona uZimu akazilaleli izoni kodwana ulalela loyo omlotjhako enze intando yakhe.

³² Kwakade azange khekuzwakale bona kukhona owakhe waphophulula obelethwe asiphofu.

³³ Nakube umuntu lo bekangaveli kuZimu, bengekhe enza ilitho.”

³⁴ Bamphendula bathi: “Wena watlujuzwa ngesonweni usabelethwa; alo, ungalinga ukufundisa thina na?” Bamribha ngesinagogini.

Ubuphofu ngokommoya

³⁵ UJesu wezwa bonyana umuntu loyo urijiwe, nje-ke kwathi nakamfumanako wathi: “Uyakholwa eNdodaneni yoMuntu na?”

³⁶ Umuntu loyo wathi: “Nomzana, ingubani yona na? Ngitjele khona ngizakukholwa kiyo!”

³⁷ UJesu wathi kuye: “Sele uyibonile, begodu ngiyo okhuluma nayo njenganje.”

³⁸ Wathi: “Ngiyakholwa, Kosi!” Waguqa phambi koJesu.

³⁹ UJesu wathi: “Ngize ephasinapha ukuzokugweba kobana iimphofu zibone, kuthi labo ababonakho baphophale.”

⁴⁰ Abanye abaFarisi egade banaye lapho nabamuzwa atjho lokhu, bambuza bathi: “Uthini? Utjho bona nathi siphophele na?”

⁴¹ UJesu waphendula wathi: “Nakube beniziimphofu, beningekhe nibe nomlandu wesono; kodwana njengombana nithi niyabona, umlandu wenu uhlezi.”