UJWANISI 8 - IsiNdebele 2012 Translation

Umfazi obanjwe ahlobonga

¹ Khona uJesu waya entabeni ye-Oliva.

² Kwathi ekuseni ngesamarimarima wabuyela ngethempelini lapha abungelelwa khona babantu; nje-ke wahlala phasi bona abafundise.

³ Abafundisi bomthetho nabaFarisi baletha kuye umfazi obanjwe ahlobonga, bamjamisa phambi kwabo boke.

⁴ Bathi kuJesu: “Mfundisi, umfazi lo simbambe sele asendimeni yokuhlobonga.

⁵ Emthethweni uMosi wasiyala bona umfazi onjalo simkhande ngamatje. Alo, wena uthini na?”

⁶ Batjho lokhu bathiya uJesu, khona bazakuba nesibambelelo sokummangalela. Kodwana uJesu wakhothama watlola phasi ngomunwakhe.

⁷ Basajame lapho bambuza imibuzo, wathabuluka wathi kibo: “Onganaso isono phakathi kwenu, akabe ngewokuthoma ukumkhanda ngelitje.”

⁸ Wakhothama godu watlola phasi.

⁹ Bathi ukuzwa lokho, bakhamba boke ngamunye ngamunye, abaphathi ntange. UJesu wasala yedwa, nomfazi loyo asolo ajame lapho.

¹⁰ UJesu wathabuluka godu wathi kuye: “Sifazana, baphi na? Akakho noyedwa okulahlileko na?”

¹¹ Waphendula wathi: “Sengitjho namunye, Kosi.” UJesu wathi: “Njeke-ke nami angikulahli ngomlandu, ngalokho khamba kodwana ungabe usona.”

UJesu kukhanya kwephasi

¹² UJesu wakhuluma ebaFarisini godu wathi: “Mina ngikukhanya kwephasi. Loyo ongilandelako angekhe akhamba ebumnyameni kodwana uzakuba nokukhanya kokuphila.”

¹³ AbaFarisi bathi kuye: “Manjesi khona, uzifakazela wena ngekwakho; nje-ke okutjhoko akutjho ilitho.”

¹⁴ UJesu waphendula wathi: “Nanyana ngizifakazela ngokwami, ubufakazi bami buqinisile ngombana ngiyazi lapha ngivela khona nalapha ngiyako. Kodwana nina anazi lapha ngibuya khona nalapha ngiyako.

¹⁵ Nina nigweba ngokwabantu, mina angigwebi muntu.

¹⁶ Kodwana nangabe bekufanele ngenze njalo, ukugweba kwami bekuzokuba ngokweqiniso ngombana angisingedwa; uBaba ongithumileko unami.

¹⁷ Angithi kutloliwe emthethweni wekhenu bona ubufakazi bababili buliqiniso.

¹⁸ Mina ngingozifakazelako noBaba ongithumileko uyangifakazela.”

¹⁹ Nje-ke bambuza bathi: “Ukuphi uyihlo na?” UJesu waphendula wathi: “Mina aningazi, noBaba animazi. Nakube beningazi mina noBaba benizomazi naye.”

²⁰ Wakhuluma amezwi lawo afundisa ngethempelini lapha bekubekwe iinlulu zomnikelo. Akakho noyedwa owambambako ngombana isikhathi sakhe besingakafiki.

²¹ Godu uJesu wathi kibo: “Ngizakukhamba, nina nizangifuna kodwana nizakufela ezonweni zenu. Angekhe naya lapha ngiyako.”

²² Lokhu kwenza amaJuda azibuze athi: “Kghani uzazibulala na? Kungabe libangelo asithi, ‘Lapha ngiya khona angeze nafika’?”

²³ UJesu waphendula wathi: “Nina ningebephasinapha, mina ngingowaphezulu. Mina angisuye wephaseli.

²⁴ Ngithe nizakufela ezonweni zenu ngombana mbala naningakholwako bona nginguye enginguye, nizakufela ezonweni zenu.”

²⁵ Bambuza bathi: “Ungubani wena na?” UJesu waphendula wathi: “Nginguloyo ebe soloko ngizitjho bona nginguye.

²⁶ Nginakunengi engingakutjho nenginganigweba ngakho. Kodwana loyo ongithumileko wethembekile begodu lokho engikuzwe kuye ngikutjela iphasi.”

²⁷ Azange balemuke bona gade akhuluma kibo ngoYise.

²⁸ Nje-ke uJesu wathi: “Nasele niphakamise iNdodana yoMuntu, nizakwazi bona nginguye engizitjho bona nginguye, nokobana angenzi ilitho ngokwami kodwana ngikhuluma lokho uBaba angifundise khona.

²⁹ Loyo ongithumileko unami, akakangitjhiyi ngedwa ngombana ngenza njalo okumthokozisako.”

³⁰ Asakhuluma lokhu, abanengi bamkholwa.

Iqiniso liyatjhaphulula

³¹ Yeke emaJudeni amkholwako uJesu wathi: “Nanijame efundiswenami, nibafundi bami bamambala.

³² Nje-ke nizakwazi iqiniso neqiniso lizanitjhaphulula.”

³³ Bamphendula bathi: “Siziinzukulwana zaka-Abrahamu, azange khesibe makhoboka wamuntu. Alo-ke utjho ukuthini nawuthi sizakutjhaphululwa na?”

³⁴ UJesu wathi kibo: “Kwamambala ngiqinisile ngithi: Woke owonako ulikhoboka lesono.

³⁵ Ikhoboka alinayo indawo yesiphelani emndenini, kodwana indodana ingeyomndeni nini nanini.

³⁶ Lokha iNdodana nayinitjhaphululako nizabe nitjhaphulukile kwamambala.

³⁷ Ngiyazi bona niziinzukulwana zaka-Abrahamu. Kodwana nilinga ukungibulala ngombana ilizwi lami alinandawo kini.

³⁸ Nginitjela lokho engikubone kuBaba, kodwana nina nenza lokho uyihlo anitjele khona.”

³⁹ Bamphendula bathi: “Ubaba wethu ngu-Abrahamu.” UJesu wabaphendula wathi: “Nangabe benibantwana baka-Abrahamu, ngabe nenza lokho u-Abrahamu gade akwenza.

⁴⁰ Njengombana nifuna ukungibulala mina muntu onitjele iqiniso engilizwe kuZimu, kodwana u-Abrahamu azange akhe akwenze okufana nalokhu.

⁴¹ Nenza lokho ubaba wenu akwenzako.” Bamphendula bathi: “Asisibo abantwana bokonakala, sinoBaba oyedwa, nguZimu ngokwakhe.”

⁴² UJesu wathi kibo: “Nangabe kwamambala uZimu bekanguBaba wenu, benizangithanda ngombana ngibuya kuZimu, nje-ke ngilapha. Angikazizeli ngeyami intando, kodwana yena ungithumile.

⁴³ Kubayini ningazwisisi engikutjhoko na? Kungombana aniwuzwa umlayezwami.

⁴⁴ Nibantwana bakayihlo uSathana, nithanda ukwenza iinkanuko zakayihlo. Kusukela ekuthomeni bekambulali, azange akhabe neqiniso ngombana akukho iqiniso kuye. Nakaleya amanga, ukhuluma lokho okuyimvelo yakhe ngombana ungusomalakazi noyise wamanga.

⁴⁵ Kodwana ngombana mina nginitjela iqiniso, aningikholwa.

⁴⁶ Kukhona phakathi kwenu ongafakaza bona nginomlandu wesono na? Alo-ke nangabe nginitjela iqiniso, kubayini ningakholwa na?

⁴⁷ OngewakaZimu ulalela amezwi kaZimu. Isizathu sokobana ningalaleli kungoba anisibo bakaZimu.”

UJesu no-Abrahamu

⁴⁸ AmaJuda amphendula athi: “Utjho bona besingakaqinisi lokha sithi wena umSamariya begodu unedimoni na?”

⁴⁹ UJesu waphendula wathi: “Anginadimoni, ngihlonipha uBaba; kodwana nina niyangilulaza.

⁵⁰ Angizifuneli mina idumo lami, kodwana kukhona olifunako nogwebako.

⁵¹ Kwamambala ngiqinisile ngithi kini: Olonda ifundiswami angeze afa.”

⁵² Bathi kuye: “Kwanjesi khona sesineqiniso bona unedimoni. U-Abrahamu wafa nabaphorofidi bafa, nanyana kunjalo uthi loyo olonda ifundiswakho angeze ezwa ngitjho ukufa.

⁵³ Wena umkhulu kunobaba wethu u-Abrahamu na? Yena walala, ngokunjalo nabaphorofidi. Alo, wena udlumbana bona ungubani na?”

⁵⁴ UJesu waphendula wathi: “Nangabe bengingazidumisa mina, idumo lami lingaba lilize. UBaba, ngitjho loyo enimthatha njengoZimenu, nguye ongidumisako.

⁵⁵ Azange khenimazi, kodwana mina ngiyamazi. Ngathana bengingathi angimazi, bengingaba ngusomanga njengani. Kodwana ngiyamazi, begodu ngiyalihlonipha ilizwi lakhe.

⁵⁶ Uyihlomkhulu u-Abrahamu wakuthabela ukubona ilanga lami, iye, walibona bewathaba.”

⁵⁷ Bathi kuye: “Abe awunayo neminyaka ematjhumi amahlanu. Alo, sewumbone nini u-Abrahamu?”

⁵⁸ UJesu waphendula wathi: “Kwamambala ngithi kini: Angakabikho u-Abrahamu, mina besele ngikhona.”

⁵⁹ Yeke badobha amatje bona bamkhande, kodwana uJesu wazifihla waphuma ngethempelini wakhamba.