UJWANISI 7 - IsiNdebele 2012 Translation

UJesu nabafowabo

¹ Ngemva kwalokhu uJesu wazomba eGalile; angafuni ukukhamba ngeJudiya ngombana amaJuda bekafuna ukumbulala.

² Kwathi lokha isikhathi somnyanya wemitlhatlhana nasele sitjhidele,

³ abafowabo lakaJesu bathi kuye: “Kufuze usuke lapha uye eJudiya, khona abafundi bakho bazakubona okwenzako.

⁴ Akakho ofihla akwenzako nafuna ukwaziwa. Njengombana wenza izintwezi nje, zibonakalise ephasini loke!”

⁵ Ngitjho nabafowabo akhange khebamkholwe.

⁶ UJesu wathi kibo: “Isikhathi sami asikafiki, kodwana senu sona sihlala sikhona.

⁷ Iphasi angekhe linihloye nina, kodwana lihloye mina ngombana ngifakaza bona izenzo zalo zimbi.

⁸ Khambani niye emnyanyeni. Mina angikazukuya nje emnyanyeni lowo ngombana isikhathi sami esifaneleko asikafiki.”

⁹ Sele atjhwile lokhu, wahlala eGalile.

UJesu emnyanyeni weMitlhatlhana

¹⁰ Ngemva kobana abafowabo sebakhambile baye ngemnyanyeni, naye waya; kodwana akhange aye bamqalile, waya bukhukhutha.

¹¹ Nje-ke emnyanyeni, amaJuda bekamfuna, abuza athi: “Kanti uphi?”

¹² Bekukhona ukuwomuzela okukhulu ngaye esiqubuthwini. Abanye bathi: “Umumuntu olungileko.” Abanye bathi: “Awa, udosela abantu ngerharheni.”

¹³ Kodwana ngokwesaba amaJuda akakho owakhuluma ngaye tjhatjhalazi.

¹⁴ Kuthe sekuphakathi komnyanya, uJesu wenyukela ethempelini wathoma ukufundisa.

¹⁵ AmaJuda bekararekile, yeke athi: “Kwenziwa yini umuntu lo azi kangaka angakafundi na?”

¹⁶ UJesu wawaphendula wathi: “Ifundiswami akusiyo yami kodwana ivela kongithumileko.

¹⁷ Nanyana ngubani ozimisela ukwenza intando kaZimu, uzakwazi bona lokho engikufundisako kuvela kuZimu namkha ngizikhulumela kwami.

¹⁸ Umuntu ozikhulumela ngeyakhe intando, ulinga ukuzizuzela idumo. Kodwana osebenzela idumo laloyo omthumileko umumuntu weqiniso, akukho okumamanga ngaye.

¹⁹ Angitjho uMosi wanipha umthetho? Kodwana akakho noyedwa kini olonda umthetho. Alo, nilingelani ukungibulala na?”

²⁰ Isiqubuthu saphendula sathi: “Unedimoni wena! Ngubani ofuna ukukubulala na?”

²¹ UJesu waphendula wathi: “Ngenze isimangaliso esisodwa, noke nirarekile.

²² Ngebanga lokobana uMosi wanipha ukusoka, nanyana bekungasuye uMosi kodwana bekubokhokho benu abakuthomako, ngalokho nisoka umntwana ngeSabatha.

²³ Nakube namukela ukusoka ngeSabatha ukuze umthetho kaMosi ungaphuki, alo-ke nithukuthelelani ngami nangipholisa umuntu ngeSabatha na?

²⁴ Ningagwebi ngokwamehlo, kodwana gwebani ngokulungileko.”

UJesu unguKrestu na?

²⁵ Abanye babantu beJerusalema bebabuza bathi: “Kanti akusuye umuntu abafuna ukumbulala lo na?

²⁶ Qalani ukhuluma tjhatjhalazi, abebatjho ilitho kuye! Ingabe abaphathi bamukele bona unguKrestu na?

²⁷ Umuntu lo siyamazi lapha avela khona, kodwana uKrestu nakezako akakho ozakwazi bona ubuyaphi.”

²⁸ UJesu asafundisa ngethempelini, wathi ngelizwi elikhulu: “Iye, niyangazi mina, nalapha ngibuya khona, kodwana angikazizeli ngokwami. Loyo ongithumilekho uneqiniso; nina animazi,

²⁹ kodwana mina ngiyamazi ngombana ngibuya kuye, ungithumile.”

³⁰ Yeke balinga ukumbamba, kodwana akakho noyedwa okhe wamphakamisela isandla ngombana isikhathi sakhe besingakafiki.

³¹ Nokho abanengi esiqubuthwini bamkholwa bebathi: “Lokha uKrestu nezako, uzakwenza iimbonakaliso ezinengi kunomuntu lo na?”

Amabutho athunyelwa ukubamba uJesu

³² AbaFarisi bezwa isiqubuthu sihlebeza izintwezi ngaye; yeke abaphristi abakhulu nabaFarisi bathumela abalindi bethempeli bona bayombamba.

³³ UJesu wathi kibo: “Nginani isikhatjhana esifitjhani bese ngibuyela kiloyo ongithumileko.

³⁴ Nizangifuna ningangifumani, nalapha ngikhona angekhe nifike.”

³⁵ AmaJuda athi omunye komunye: “Umuntu lo uyaphi lapha esingekhe samfumana khona na? Kghani uzakuya lapha abantu bekhethu bahlakazekele khona hlangana namaGirigi na?

³⁶ Bekatjho ukuthini lokha nakathi, ‘Nizangifuna kodwana angekhe ningifumane’, nokuthi, ‘Lapha ngiya khona angekhe nafika’?”

Imilambo yamanzi wokuphila

³⁷ Ngelanga lamaphelelo neliqakathekileko lomnyanya, uJesu wasikima wathi ngelizwi elikhulu: “Loyo owomileko akeze kimi azokusela.

³⁸ Okholwa kimi njengokutjho komtlolo, imilambo yamanzi aphilako izakugeleza ngaphakathi kwakhe.”

³⁹ Watjho lokho ngoMoya oCwengileko ebebazamamukela abakholwa kuye ngombana uMoya bekangakanikelwa, ngebanga lokobana uJesu bekangakaphazimuliswa.

Ukuphikisana kwabantu ngoJesu

⁴⁰ Abanye esiqubuthwini nabezwa amezwi lawo, bathi: “Kwamambala umuntu lo mphorofidi!”

⁴¹ Abanye bathi: “UnguKrestu!” Kodwana abanye bathi: “UKrestu angavela njani eGalile!

⁴² Kanti umtlolo akhange utjho bonyana uKrestu uzakuvela emndenini kaDavida, eBhethelehema emzini lapha bekuhlala uDavida.”

⁴³ Yeke kwaba khona ukwahlukana ebantwini ngebanga lakaJesu.

⁴⁴ Abanye bafuna ukumbamba, kodwana akakho owambeka isandla.

Ukungakholwa kwabaphathi bamaJuda

⁴⁵ Nje-ke abalindi bethempeli babuyela emuva ebaphristini abakhulu nebaFarisini abababuza bathi: “Kubangelwe yini ningamlethi na?”

⁴⁶ Abalindi baphendula bathi: “Akakho owakhe wakhuluma njengomuntu loyo!”

⁴⁷ AbaFarisi babuza bathi: “Nitjho bona nani unikhohlisile na?

⁴⁸ Ukhona umrholi namkha umFarisi okholwa kuye na?

⁴⁹ Kodwana isiqubuthu esingazi ilitho ngomthethwesi, sinikelelwe!”

⁵⁰ UNikhodemusi owakhe waya kuJesu ngaphambilini nobekungomunye wabo wabuza wathi:

⁵¹ “Ingabe umthetho uyamlahla umuntu ngaphandle kokobana ezwiwe kufunyaneke bona wenzeni na?”

⁵² Baphendula bathi: “Kghani nawe ubuya eGalile na? Hlolisisa kuhle, uzakufunyana bonyana azange khekuvele umphorofidi eGalile.”

⁵³ Yeke woke umuntu wabuyela ekhaya.