UJWANISI 6 - IsiNdebele 2012 Translation

UJesu upha iinkulungwana ezihlanu ukudla

¹ Isikhatjhana ngemva kwalokho, uJesu wayamela ngaphetjheya kwelwandle leGalile, laphakhunye kuthiwa lilwandle leThibheriyasi.

² Isiqubuthu esikhulu samlandela ngombana sabona iimangaliso azenza phezu kwabagulako.

³ UJesu wenyukela entabeni, wafika wahlala phasi nabafundi bakhe.

⁴ Isikhathi somnyanya wePhasika lamaJuda besesitjhidele.

⁵ Kwathi lokha uJesu abona isiqubuthu esikhulu sisiza kuye, wabuza uFlebhe wathi: “Singakuthengaphi ukudla ukupha abantwaba na?”

⁶ Wabuza lokhu amzizinya ngombana gade sele asazi bona uzokwenza njani.

⁷ UFlebhe wamphendula wathi: “Isikwa seempaparwana ezimakhulu amabili wesiliva angekhe sabanela kobana omunye nomunye afumane okuncani.”

⁸ Omunye wabafundi bakhe, u-Andrisi, umfowabo lakaSimoni Pitrosi, wathi:

⁹ “Kunomsana lapha ophethe imilombo emihlanu yesikwa sebhali neenhlambi ezimbili; kodwana kuyini lokho kwabanengi kangaka na?”

¹⁰ UJesu wabatjela bona bahlalise abantu phasi. Bekukhona lapho utjani obunengi, yeke abantu bahlala phasi, pheze bekuziinkulungwana ezihlanu zamadoda.

¹¹ UJesu wathatha isikwa wathokoza kuZimu wabela boke abantu egade bahlezi lapho. Wenza njalo nangeenhlambi.

¹² Kwathi boke sebasuthi, wathi ebafundini bakhe: “Buthelelani iintshutshuru eziseleko; kungalahleki ilitho.”

¹³ Yeke bazibuthelela zoke, bazalisa iinqwebu ezilitjhumi nambili ngeentshutshuru ezisele emilombeni emihlanu yesikwa sebhali ebegade igonywa babantu.

¹⁴ Kwathi lokha abantu nababona iimangaliso ezenziwa nguJesu, bathoma ukuthi: “Kwamambala, lo mphorofidi obekufanele eze ephasinapha!”

¹⁵ UJesu asazi bonyana bazimisele ukuza kobana bamkatelele abe yikosi, wazirhotjha wabuyela entabeni yedwa.

UJesu ukhamba phezu kwamanzi

¹⁶ Kwathi sekurhwaqele, abafundi bakhe behlela ngelwandle,

¹⁷ lapha bafese bangena ngemkhunjini bayamela eKapernawumi. Besele kusebusukwaneni, uJesu angakezi kibo.

¹⁸ Ngesikhatheso ummoya onamandla bewuvunguza namanzi akhephuzela.

¹⁹ Sele bathaye amakhilomitha amahlanu ukuya kwamathandathu, babona uJesu akhamba ngaphezu kwamanzi, atjhidela ngemkhunjinabo, bethuka kwamambala.

²⁰ Kodwana wathi kibo: “Ningesabi! Ngimi!”

²¹ Yeke bamamukela ngemkhunjini, khonokho umkhumbi wafika endaweni lapha gade basiya khona.

UJesu sisikwa sokuphila

²² Ngelanga elilandelako isiqubuthu egade sihlezi ngaphetjheya kwelwandle, sakhumbula bona bekunomkhumbi owodwa kwaphela lapho. Begodu bebazi bonyana uJesu azange angene nabafundi bakhe nokobana bakhambe ngaphandle kwakhe.

²³ Eminye imikhumbi evela eThibheriyasi, yafika hlanu kwalapha isiqubuthu besigomela khona isikwa ngemva kobana iKosi uJesu ithokozile.

²⁴ Kwathi bona isiqubuthu sibone bonyana uJesu bekangekho lapho nabafundi bakhe, sangena ngaphakathi kwemikhumbi saya eKapernawumi, simfuna.

²⁵ Kwathi bona abantu bafumane uJesu ngaphetjheya kwelwandle, bathi kuye: “Mfundisi, ufike nini lapha na?”

²⁶ UJesu waphendula wathi: “Kwamambala ngiqinisile ngithi kini: Aningifuni ngombana nabona iimbonakaliso, kodwana ningifuna ngombana nadla izikwa, nasutha.

²⁷ Ningasebenzeli ukudla okuphelako, kodwana ukudla kokuphila okungapheliko, lokho iNdodana yoMuntu ezanipha khona. Phezu kwayo uZimu uYise, ubeke igunya lakhe.”

²⁸ Yeke bambuza bathi: “Alo-ke kufuze senzeni ukwenza okufunwa nguZimu na?”

²⁹ UJesu wabaphendula wathi: “Umsebenzi kaZimu kukobana nikholwe kiloyo amthumileko.”

³⁰ Baphendula bathi: “Ungenza isibonakaliso bani esingenza bona sikukholwe na? Ungenzani na?

³¹ Abokhokho bethu bagoma imana ngerhalawumbeni, njengombana kutloliwe ukuthi, ‘Wabapha amabele wezulwini bona bagome.’ ”

³² Yeke uJesu wathi kibo: “Kwamambala ngiqinisile ngithi: Akusuye uMosi owanipha isikwa esivela ezulwini; nguBaba opha isikwa samambala esivela ezulwini

³³ ngombana isikwa sakaZimu ngiloyo owehla ezulwini, anikele ukuphila ephasini.”

³⁴ Bathi kuye: “Kosi, sipha isikweso njalonjalo.”

³⁵ UJesu wathi kibo: “Mina ngisisikwa sokuphila, loyo ozako kimi angekhe alamba; naloyo okholwako kimi angekhe oma.

³⁶ Nje-ke, nginitjelile bonyana ningibonile, kodwana anikholwa.

³⁷ Koke uBaba anginikela khona kuzakuza kimi; ozako kimi angekhe ngamnina

³⁸ ngombana ngivela ezulwini, ingasibona ngenze intando yami kodwana kobana ngenze intando yaloyo ongithumileko.

³⁹ Godu kuyintando yongithumileko bona ngingalahlekelwa lilitho lalokho anginikele khona, kodwana ngikuvuse ngomhla wokuphela.

⁴⁰ Lokhu kuyintando kaBaba kobana omunye nomunye obona iNdodana akholwe kiyo uzokuba nokuphila okungapheliko, yeke ngizamvusa ngomhla wokuphela.”

⁴¹ Abantu bathoma ukurhonona ngaye ngombana uthe: “Ngisisikwa esivela ezulwini.”

⁴² Yeke bathi: “Kanti lo akasuye uJesu indodana kaJosefa esazi uyise nonina na? Alo-ke, utjho njani gadesi bona uvela ezulwini?”

⁴³ UJesu waphendula wathi: “Lisani ukurhonona phakathi kwenu!

⁴⁴ Akakho ongeza kimi nakube uBaba ongithumileko akamdoseli kimi; mina-ke ngizamvusa ngomhla wokuphela.

⁴⁵ Kutloliwe kubaphorofidi kwathiwa, ‘Boke bazakufundiswa nguZimu.’ Ngiloyo naloyo ozwa uBaba afunde kuye, uza kimi.

⁴⁶ Akakho owakhe wabona uBaba ngaphandle kwaloyo obuya kuZimu; ngiloyo-ke kwaphela obone uBaba.

⁴⁷ Kwamambala ngiqinisile ngithi kini: Okholwako unokuphila okungapheliko.

⁴⁸ Mina ngisisikwa sokuphila.

⁴⁹ Abokhokho benu bagoma imana erhalawumbeni, kodwana bafa.

⁵⁰ Kodwana nasi isikwa esivela ezulwini okuthi umuntu angasigoma angafi.

⁵¹ Mina ngisisikwa sokuphila esehla ezulwini, osigomako uzakuphila ngokungapheliko. Isikwesi siyinyamami engiyinikela kobana ibe kuphila kwephasi.”

⁵² Yeke kwathoma ukuphikisana hlangana namaJuda, athi: “Umuntu lo angasipha njani inyamakhe bona sigome na?”

⁵³ UJesu wathi kibo: “Kwamambala ngiqinisile ngithi kini: Naningagomi inyama yeNdodana yoMuntu nisele neengazi zayo, angekhe naba nokuphila.

⁵⁴ Loyo ogoma inyamami asele neengazi zami, unokuphila okungapheliko; ngizamvusa ngomhla wokuphela

⁵⁵ ngombana inyamami ikukudla kwamambala neengazi zami zisiselo samambala.

⁵⁶ Loyo ogoma inyamami, asele iingazi zami, uhlala ngaphakathi kwami nami ngaphakathi kwakhe.

⁵⁷ Njengombana uBaba ophilako angithumile, nami ngiphila ngoBaba; njalo-ke loyo ogoma mina uzakuphila ngebanga lami.

⁵⁸ Lesi sisikwa esehla sivela ezulwini. Abokhokho benu badla imana bafa, kodwana ogoma mina uzakuphila ngokungapheliko.”

⁵⁹ Lokhu wakutjho lokha nafundisa ngesinagogini eKapernawumi.

Amezwi wokuphila okungapheliko

⁶⁰ Lokha abanengi babafundi bakhe nabezwa lokhu, bathi: “Ifundiso le ibudisi, ngubani ongayamukela na?”

⁶¹ UJesu wayelela bona abafundi bakhe bayarhonona ngalokhu, wathi kibo: “Lokhu kuyanikhubekisa na?

⁶² Alo, kuzokubanjani lokha nanibona iNdodana yoMuntu inyukela lapha ivela khona na?

⁶³ NguMoya onikela ukuphila; inyama ayisizi ngalitho. Amezwi engiwakhulume kini anguMoya nokuphila.

⁶⁴ Kodwana nanyana kunjalo, kukhona abanye benu abangafuni ukukholwa!” UJesu bekasazi kwekuthomeni bona bobani ebebangakholwa nokobana ngubani ozamkhaphela.

⁶⁵ Godu wathi: “Kungebangelo nginitjele bonyana akakho ongeza kimi ngaphandle kobana enziwe nguBaba.”

⁶⁶ Ngesikhathesi inengi labafundi bakhe lajika, azange belisamlandela godu.

⁶⁷ Yeke uJesu wabuza abalitjhumi nambili wathi: “Angithi nani nifuna ukutlhera, akusinjalo?”

⁶⁸ USimoni Pitrosi wamphendula wathi: “Kosi, sizakuya kubani na? Nguwe onamezwi wokuphila okungapheliko.

⁶⁹ Nje-ke siyakholwa besiyazi bona ungoCwengileko ovela kuZimu.”

⁷⁰ UJesu waphendula wathi: “Angithi ngakhetha nina abalitjhumi nambili, kodwana omunye wenu nguSathana!”

⁷¹ Bekakhuluma ngoJudasi, indodana kaSimoni Iskariyodi, obangomunye wabalitjhumi nambili ozomkhaphela.